هات هین بوون کو چەکدارێن پەکەکێ ل باشوورێ کوردستانێ پرسگرێکن زێدەتر چێدکەن و سەرەرای کو خوە ب پارێزڤانێن سروشتێ کوردستانێ و تەخا کەدکار و رێنجبەران دزانن، لێ بەلێ ل دژی داخوازێن وان دسەکنن و رێ نادەن حکوومەتا باشوور پیچەکێ بارێ وان سڤک بکەت.
چاڤکانیێن پێگەها دارکا مازی ل باشوورێ کوردستانێ ئاشکەرا کر، هندەک ژ خوەدیێن سەوالان ل سنۆرێ باژارۆکێ رەواندزێ داخواز ژ قایمقامێ رەواندز کرنە رێیا چوون و هاتنا وان پاکژ بکەت، لێ بەلێ چەکدارێن پەکەکێ ئاستەنگ ژ بۆی ڤێ یەکێ دروست کرینە.
چاڤکانیێن پێگەها دارکا مازێ هەر وەها ئەشکەرە کرن، ل رۆژا 13/6/2021ێ، ل سەر داخوازا خوەدیێن سەوالان ژ بۆی پاکژکرنا رێیا چوون و هاتنا وان، قایمەقامێ رەواندزێ ئاموورێن پێویست ژ بۆی رێیا د نێڤبەرا «زینی گەرەوان و ساوسیوکان» شاندنە داکو رێ بهێتە پاکژکرن، لێ بەلێ چەکدارێن پەکەکێ رێ نەدایە تیمێن قایمەقامیێ ب کارێ خوە رابن و رێیا خەلکێ پاکژ بکەن.
چەکدارێن پەکەکێ گەف ل شۆفێرێن قایمەقامیێ کرنە کو گەر ل وێ دەرێ کار بکەن ئەو دێ گولـلەیان بەردەن وان و وان کوژن.
