ئاکنجیێن گوندێ مالمەکرەک ل پارێزگەھا دێرسما باکورێ کوردستانێ، ئەڤە 8 سالن بێ کارەبانە.
ئەڤ گوندە کو سەر ب باژارۆکێ پولورە، د سالا 1994ێ دا ژبەر شەرێ ناڤبەرا پەکەکێ و ترکیێ ھاتبوو ڤالاکرن و خەلکێ وێ ژی دەرەبدەر ببوون.
وەلاتی عەزیمە ئاکتاش، دبێژیت، “کارەبا مە نینە، سارنج نینە، ئەم ژ چێکرنا نان، شووشتنا جلان بێزار بووین. ئەم پیر و نەخوەشین. جیھان بۆ مە تارییە. ما ئەم د چ سەردەمی دا دژین! د ڤێ تاریێ دا ئەم چ بکەین.”
بەشەکی ئاکنجیێن رەسەنێن ڤی گوندی، ژبەر زەحمەتبوونا ژیانێ ل باژاران ڤەگەریانە وارێ خوە، لێ خەراببوونا رێ و پران، نەبوونا ئاڤ و کارەبێ ئالۆزی بۆ وان چێکرنە.
وەلاتی، خەدیجە سۆیلۆ، دبێژیت، “کارەب یا گرنگە. ئەڤ گوندە بری چەند سالان ھاتە شەوتاندن و ڤالاکرن. ئەم چووین باژارێن دی و پاشێ ڤەگەریانە گوندێ خوە، لێ کارەبا نینە. ئەم نکارین جلێن خوە بشۆین، ئاژەلان خوەدی بکەین. ژ بەر نەبوونا کارەبێ ئەم، دگرین. گوندێ مە خوەشە و ئەم ناخوازین بچین جھەکێ دی.”
بۆ کەسەکێ ئاسایی ژیانا بێ کارەبا ل ڤی گوندی زەحمەتە، لێ بۆ کەسەکێ خوەدی پێویستیێن تایبەت زەحمەتی دبیتە دو قات.
گولەر سۆیلۆ کو خوەدی پێدڤیێن تایبەتە، دبێژیت، “ئەز نەخوەشم و ژ بەر کو کێمەندامم، نکارم جل و فراقان بشۆم. ژیانا ل باژاری زەحمەت بوو، لەوما ئەم ھاتتنە گوندی. بلا کارەبا بۆ گوندێ مە بهێتە دابینکرن.”
ئاکنجیێن ڤی گوندی نکارن ئاموورێن کارەبێ بکار بینن. ل سەر کوچکی خوارنێ ئامادە دکەن و ب دەست جلووبەرگێن خوە دشۆن. ھەروھا ژ ئەگەرا ئێریشا ھرچان دترسن. خەلکێ گوندی ب رێیا رووداوێ داخوازا ئالیکاریا بلەز ژ کاربدەستێن ناڤچەیێ دکەن.
وەلاتی، جەواھر مۆر، دبێژیت، “بەری 27 سالان گوندێ مە ھاتە ڤالاکرن. ئەم ڤەگەریان گوندێ خوە لێ کارەبا، ئاڤ و رێ نینە. ژ ئێرشا ھرچان دترسین. ھەر دەر تارییە. ئەم ژ ترسا نکارین دەرکەڤین و ژ نەچاری زوو دنڤین.”
ل گۆر راپۆرتا وارێ نەئاسایی یا پارێزگەھا دێرسمێ کو سالا 1997ێ ھاتیە بەلاڤکرن، ژبەر شەرێ ناڤبەرا گریلایێن پەکەکێ و ئارتێشا ترکیێ، سالا 1994ێ ژ تەڤاھیا 183ێ گوندان، 823 چەولیگێن دێرسم، 8 ھەزار و 439 مال ھاتینە ڤالاکرن، و 41 ھەزار و 939 کەس بۆ پارێزگەھێن دی یێن باکورێ کوردستانێ و ترکیێ و دەرڤەیی وەلاتی کۆچبەر بوونە.
