د ڤان دو رۆژێن بۆری دا، ھەژمارەکا مەزن ژ سەرکردێن سوپایێ پاسدارێن ئیرانێ، ب سەرۆکاتیا ئیسمایل قاعانی، سەرکردەیێن حەشدا شەعبی، و ھەژمارەک سیاسەتمەدارێن ئیراقی یێن دلسۆزێ ئیرانێ، ل کامپا ئەشرەف ل پارێزگەھا دیالا جڤیانە.
د ڤێ جڤینێ دا ھەروەھا جەندین فەرماندارێن سوپایێ پاسدارێن ئیرانێ، کاربدەستێن ئەنجوومەنا بلندا ئەولەھیا نەتەوەیی یا ئیرانێ، بەرپرسێن بلند یێن سازیا ئیستخباراتا ئیرانێ یا ب ناڤێ ئیتیلاعات، د گەل ھادی عامری و سەرۆکێن میلیشیایێن حیزب الله و میلشیایێن نووجەبا و میلیشیایێن سەیید ئەل-شوھەدا و ئەل-خال بەشدار بوونە.
بەشداربوویان ووسا دایە دیارکرن کو ئارمانجا جڤینێ نیقاشکرنا نەخشەیێن نوو یێن فشارا ل سەر ئەمەریکایێ یە، دا کو پێشی ل ھەبوونا ئەمەریکایێ ل ئیراقێ بهێتە گرتن، لێ بەلێ د ئەساس دا ئارمانجا وان ئەڤەیە کو کێشەیێن زێدەتر ژ بۆ حکومەتا ھەرێما کوردستانێ دروست بکەن و رەوشا ھەرێمێ ئالۆزتر بکەن .
ھاتە زانین کو د ڤێ جڤینێ دا ھەر وەھا، بەرپرسێن پایەبلند یێن پارتیا کارکەرێن کوردستانێ ژی بەشدار بوونە، ب تایبەتی ئەو بەرپرسێن پەکەکێ یێن کو د ڤان دەمێن داوی دا دەست ب خورتکرنا تێکلییێن خوە ل گرل سەرکردێن حەشدا شەعبی کری.
ل گۆری ئاگاھیێن پێگەھا دارکا مازی، نەخشەرێیا نوویا کو د ڤێ جڤینێ دا بریار ل سەر ھاتیە دایین، خوە د توندکرنا ئێریشێن بالافرێن بێ پیلۆت بۆ سەر ھێزێن ئەمەریکایێ ل ئیراقێ و ب تایبەتی ل ھەرێما کوردستانێ دا دبینیت.”
چاڤکانیێن پێگەھا دارکا مازی ھەر وەھا ئاشکەرا کر، کو رۆلێ ھەر ئالیەکێ ھاتیە دیار کرن و دێ ل ئاییندەیەکێ نێزیک دا ئەڤ لایەنە ب درۆنان ئێریشی ئەمەریکییان ل ھەرێما کوردستانێ کەن.
چاڤکانیێن پێگەھا مە ھەر وەھا پشتراست کرن کو “ئێریش کرنە سەر بنگەھا ھێزێن ئەمەریکایێ ل حەریرێ کو دکەڤیتە سینۆرێ باژارێ ھەولێرێ بەشەک ژ نەخشەیا نوویە، و چەکدارێن سەر ب پارتییا کارکەرێن کوردستانێ دێ ئالیکاریا میلیشیایێن سەر ب ئیرانێ کەن دا کو ڤێ بارەگەھێ ئارمانج بکەن و ژ ناڤ ببەن.”
ل گۆری چاڤکانیێن مە، “چەکدارێن پەکەکێ ژ لایێ ئیرانێ و حەشدا شەعبی ڤە تێن پشتگری کرن، و چەکدارێن پەکەکێ جلکێن میلیشیایێن حەشدا شەعبی ل خوە دکەن دا کو ژ لایەکێ خوە ل ئێریشێن ترکیێ بپارێزن و ژ ئالیەک دی ووسا دیار بکەن کو حەشدا شەعبی ب تەنێیە ئێریشی ھەولێرێ دکەت و چەکدارێن پەکەکێ هیچ رۆلەک د ڤێ یەکێ دا نینە.”
