ره‌ژیما ئیرانێ دوو برایێن كورد دارڤه‌كرن، یه‌ك ژێ زارۆكه‌

ل ناڤچەیا سەلماسێ یا پارێزگەھا ئورمیێ دو وەلاتیێن کوردێن برایێن ھەڤ، ژ ئالیێ رەژیما ئیرانێ ڤە ھاتن دارڤەکرن کو یەک ژ وان زارۆک بوو.

زارۆکێ ب ناڤێ بەھائەددین قاسمزادە و برایێ وی داود قاسمزادە، ئیرۆ 4ێ تیرمەھێ ل زیندانا ئورمیێ ھاتن دارڤەکرن.

تەمەنێ بەھائەددین قاسمزادە یێ ژ باژارێ سەلماسا ئورمیێ، د بن 18 سالان دە بوو و ژ کانوونا 2019ان ڤە ل گەل برایەکی خوە ھاتبوو گرتن، دەما كو هاتییه‌ تۆھمەتبارکرن ژی ئەو 15 سالی بوویە.

قاسمزادە ژ بەر کو بەشداری شەرەکی مالباتی بووبوو و 2 کەس د وی شەری دە ھاتبوون کوشتن، دادگەھێ ئەو وەک تاوانبارێ سەرەکی دابوو نیشان دان و بریارا دارڤەکرنێ ژ بۆ وی دابوو.

بەھائەددین قاسمزادە، دوھی ژ بۆ ئۆدەیا یەک کەسی ھاتبوو ڤەگوھەستن، و ئیرۆ یەکشەمبێ ل گەل برایێ خوە و کەسەکی دن ل زیندانا ئۆرمیێ ھاتن دارڤەکرن.

رێخستنا ناڤدەولەتییا لێبۆرینێ ئامنەستی ئنتەرناتیۆنال داخوازا بجھنەئینانا وێ بریاریێ کربوو ژ کاربدەستێن ئیرانێ گۆتبوو، دارڤەکرنا کەسێن د تەمەنێ زارۆکتیێ دە تاوانان ئەنجام ددن، بنپێکرنا ئەشکەرە یا مافێ مرۆڤانە.

ئامنەستی ئنتەرناتیۆنال دایە خویاکرن کو دارڤەکرنا زارۆکێن تاوانبار ل دژی پابەندیێن ئیرانێ یێن ب پەیمانا مافێ زارۆکانە کو تەھرانێ ئەو پەیماننامە ئیمزە کرییە.