چەکدارێن ئۆپۆزیسیۆنا سووریێ یێن سەر ب ترکیێ ڤە کو لگەل ئارتێشا ترک ھەرێما عەفرینێ داگیر کرنە، 3 کەسێن سڤیل رەڤاندن.
رێخستنا مافێن مرۆڤان ل عەفرینێ راگھاند، کۆما چەکدارا ب ناڤێ پۆلیسێن لەشکەری رۆژا 30ێ خزیرانا بۆری ب سەر گوندێ بەھدینا یێ ل ناڤچەیا راجۆ دا گرت و ب ئارمانجا ستاندنا فدیێ ژ وان، 3 گوندی رەڤاندن.
ھاتە دیارکرن کو ناڤێ کەسێن ھاتنە رەڤاندن؛ عۆسمان خەلیل چەرچی، حەسەن حوسێن خۆجە و ئەحمەد محەمەد ھەسپیرۆ یە.
ھێژایی ببیرخستنێ یە، ژ دەما داگیرکرنا عەفرینێ ژ سالا 2018ێ ڤە، ئارتێشا ترکیێ و کۆمێن چەکدارێن سەر ب وێ ڤە، ب ھەزاران کوردێن عەفرینێ رەڤاندنە، چارەنڤیسا ھەژمارەکا مەزن ژ وان ناهێتە زانین و گەلەک کەس ژی ب ئیشکەنجە و رێبازێن جودا ھاتنە کوشتن.
ل ئالیەکی دی ژی گوھارتنا دەمۆگرافیا عەفرینێ بێناڤبەر بەردەوامە و ل گۆری زانیاریان ل ھەرێما عەفرینێ حەتا نھا ل دۆرا 400 ھەزار کەسێن عەرەب و مالباتێن چەکداران ھاتنە بجھکرن.
