ئه‌نیا ئاشتی و ئازادیێ قەدەخەیا دەرباسبوونێ یا رێڤەبەرییا دەریێ سێمالکا یێ سینۆری ل ھەمبەر شاندەکێ ئه‌نیا ئاشتی و ئازادیێ ژ رۆژئاڤایێ کوردستانێ ژ بۆ ھەرێما کوردستانێ، شەرمەزار دکەت.
دەستەیا سەرۆکاتییا ئه‌نیا ئاشتی و ئازادیێ ب داخویانیەکێ دیار کر، د زینجیره‌یا کریارێن نە بەرپرسیانە و رێزنەگرتنا ل نێرینن ئالیێ دن ژ ئالیێ رێڤەبەرییا خوەسەر یا سەر ب په‌یه‌دێ ڤە، رێڤەبەرییا دەریێ سێمالکا یێ سینۆری، رۆژا 5ێ تیرمەھا 2021ێ رێ نەدا شاندەکا دەستەیا سەرۆکاتییا ئه‌نیا ئاشتی و ئازادیێ دەرباسی ھەرێما کوردستانێ ببیت.
دا زانین، شاندەیا وان ب ئارمانجا بەشداربوونا د جڤینا ئاساییا به‌ره‌یا خوه دا کو ژ ب دەرباسبوونا سالەکێ ل سەر دامەزراندنا وێ بەرەیێ تێ گرێدان، بەرێ خوە دابوو ھەرێما کوردستانێ.
ئەنیا ئاشتی و ئازادیێ دەستنیشان کر، شاندا وێ ژ نوونەرێ تەیار ئەل-غەد، ئەنجوومەنا عەرەبی ل جزیرێ، رێخستنا ئاسووری و ئەنجوومەنا نشتمانییا کورد ل سووریێ پێک ھاتبوو.
بەرەیێ د داخویانیا خوە دە ئەشکەرە کر: ئەم د ئەنیا ئاشتی و ئازادیێ دا ڤی کاری شەرمەزار دکه‌ین و دبینن کو ئارمانجا وێ نەھیشتنا ژیانا سیاسی یە و دکەڤە بن سیاسەتا سەرکوتکرن و ئاستەنگیکرنا ئازادییان دە و ل دژی رێزکێن کارێ رێخستنی و سیاسی یە.
ئەنیا ئاشتی و ئازادیێ، ھەڤپەیمانییەکا سیاسی د ناڤبەرا ھێزێن سووری یێن ھەول ددن سیستەمەکا فرەئالی، نەناڤەندی ل سووریێ ئاڤا بکه‌ن دا یە، ل رۆژا 29-7-2020ێ ل قامشلۆ ھات راگه‌ھاندن و ژ ئه‌نه‌كه‌سێ، رێخستنا ئاسووری یا دەمۆکراتیک، تەیار ئەل غەد، ئەنجوومەنا عەرەبی ل جزیرێ و فەرێت پێک دهێت.
