پرسگرێك و گوهه‌رتنێن ناڤا یه‌كێتییا نشتیمانییا كوردستانێ ده ده‌وام دكن، ئیرۆ بافل تاله‌بانی نه ته‌نێ ناڤێ سه‌رۆكێ پارتیێ ل خوه كر، لێ به‌لێ ئۆرگانێن پارتیێ ژی هایدار كرنه كو سیسته‌ما هه‌ڤسه‌رۆكاتیێ باڤێژن و ژێره ببێژن سه‌رۆكێ یه‌نه‌كێ.
دوورخستنا برێڤه‌برێن دەزگەها زانیاری و دژە تەرۆرێ یێن سلێمانیێ و دانانا دوو کەسێن دن ل جیهێ وان ژ ئالیێ بافل تالەبانی ڤە، ڤۆلكانه‌ك ل سلێمانیێ و باشوورێ كوردستانێ ته‌قاند، هه‌ر كه‌س دپرسه ئه‌ڤ ده‌ربه‌یه بافل و برایێ خوه قوباد ل سه‌ر مالا جه‌نگی دكن، یان گوهه‌رتنێن كلاسیكن د ئۆرگانێن پارتیێ ده.
ژ من را بێژن سه‌رۆك، هه‌ڤسه‌رۆكاتی نه‌ما
د ده‌واما گوهه‌رتنان ده، ئیرۆ ئۆفیسا بافل تاله‌بانی ب فەرمی ل شوونا پەیڤا «هەڤسەرۆک»، پەیڤا «سەرۆک» ژێ رە ب کار ئانی و ل سه‌ر وێ ئه‌ساسێ یه‌كه‌مین جڤینا خوه یا سیاسی ل گه‌ل حه‌یده‌ر عه‌بادی سه‌رۆكێ هه‌ڤپه‌یمانێتییا نه‌سر و سه‌رۆكوه‌زیرێ به‌رێ یێ ئیراقێ گرێدا.
بافل تاله‌بانی ل ئه‌كاونتێن خوه یێن فه‌یسبووك و تویته‌رێ ل جهێ دانه‌نیاسینێ، په‌یڤا هه‌ڤسه‌رۆك ئاڤێت و په‌یڤا سه‌رۆكێ یه‌نه‌كێ ل شوونێ دانایه.
ل گۆری ئاگاهیێن كو ب ده‌ست پێگه‌ها داركا مازی كه‌تنه، بافل تاله‌بانی دوو رۆژان به‌رێ ئۆرگانێن پارتیێ هایدار كرنه كو ئێدی ئه‌و دانپێدانێ ب سیسته‌ما هه‌ڤسه‌رۆكتیێ ناكه و ته‌علیمات ژ وان ره شاندنه كو ئێدی وی وه‌كه سه‌رۆكێ یه‌نه‌كێ ناس بكن، هه‌مان ته‌علیمات ژ بۆی مه‌دیا فه‌رمی یا یه‌نه‌كێ شاندنه.
یه‌كێتییا نشتیمانی یا كوردستانێ ل دیسامبه‌را سالا 2019ان كۆنگره‌یا خوه یا چاره‌مین ل دارخست، تێده سیسته‌ما هه‌ڤسه‌رۆكتیێ هاتبوو په‌ژراندن، لاهۆرێ شێخ جه‌نگی و بافل تاله‌بانی وه‌كه هه‌ڤسه‌رۆك هاتن هلبژارتن.
ژ وێ ده‌مێ ڤه، لاهۆرێ جه‌نگی ب ناڤ ئۆرگانێن یه‌نه‌كێ كه‌تییه و هه‌ر تشت سه‌ر و بن كر، سیاسه‌تا پشتگوهـ كرنا بافل و مالا تاله‌بانی دا مه‌شاندن، هه‌ردوو سازیێن زانیار و دژه ته‌رۆر ژی ژ بۆی به‌رژه‌وه‌ندیێن خوه یێن شه‌خسی ب كار ئانین، بالێن ناڤا یه‌نه‌كێ پێتر كرن و ده‌نگێن نه‌رازیبوونێ ژ ڤێ سیاسه‌تێ ل ناڤا یه‌نه‌كێ ب ته‌یبه‌ت كادرۆیێن وان یێن دامه‌زرێنه‌ر به‌رز بوون.
خه‌رابترین سال و نیڤ د ژیانا یه‌نه‌كێ ده
ژ دیسامبه‌را 2019ان هه‌یا رۆژا 8 تیرمه‌ها ئیسال 2021ان، ب خه‌رابترین سال و نیڤ ژ بۆ یه‌نه‌كێ تێن حه‌ساب كرن، د ڤێ ده‌مێ ده، لاهۆرێ جه‌نگی باسكێن پێتر د ناڤا یه‌نه‌كێ ده چێكرن كر، پێتر پارتی خسته ژێر باندۆرا رێخستنا په‌كه‌كێ، گه‌لێ كورد چه‌ندین جینایه‌تێن د ڤێ ده‌مێ دا ژیان كرن وه‌كه راده‌ست كرنا مسته‌فا سه‌لیمی، كوشتنا ئامانج بابان و هه‌ڤژین و زارۆكێ وان، لهه‌ڤهاتنێن ژێر ب ژێر ل گه‌ل ئیرانێ و په‌كه‌كێ د پرسا زینی-وه‌رتێ دا، ده‌سته‌سه‌ر كرنا سمكۆ به‌نه‌فشی و ئیفشا بوونا رۆلا دژەتەرۆرا یەنەکێ ب سەرکرداتیا لاهۆر جەنگی د کوشتنا قاسم سولەیمانیێ فەرماندارێ فەیلەقا قودس یا سوپایێ پاسدارێن ئیرانێ کو ب ئاوایەک زەلال د مالپەرا یاهۆ نیوز یا ئامەریکی دە هات باس کرن و داوی جار ژی ده‌ست دانینا وان ل سه‌ر داهاتێ په‌ره‌یێن سلێمانیێ یێ كو ژ بۆی مووچه‌یێن وه‌زیفه‌داران دچه گه‌نجینا حكوومه‌تێ.
بافل تاله‌بانی كو ژ ده‌ما كۆنگره‌یا چاره‌مین ده‌نگێ وی تونه بوو، ل رۆژێن رابووری ئه‌و وه‌كه ڤۆلكانێ ته‌قیا و ژ نووڤه فێم كر كو مالا شێخ جه‌نگی یه‌نه‌كه ژ خه‌تا نه‌ته‌وی و كوردایه‌تیێ ده‌رخستییه، ژ نووڤه فێم كر كو لاهور ناڤێ تاله‌بانی وه‌كه مه‌تریاله‌كێ ژ بۆ به‌رژه‌وه‌ندییا خوه ب كار تینه و ده‌ست ب قوت كرنا ده‌ستێن لاهور ژ سازیێن گرینگ یێن یه‌نه‌كێ كر.
دوو ژ گرینگترین گوهه‌رتنێن كو بافل تاله‌بانی و قوباد تاله‌بانی سه‌رۆكێ تیما یه‌نه‌كێ د حكوومه‌تا باشوور ده ئه‌نجام داین، گوهه‌رتنا رێڤه‌برێن سازیێن زانیاری و دژه ته‌رۆرێ بوون، د ڤان گوهه‌رتنا دا، بافل تاله‌بانی داخویانی دا و گۆت: ئه‌ڤ هه‌ردوو سازی ل گۆری به‌رژه‌وه‌ندییا شه‌خسی د خه‌بتین و ئێدی ئه‌و دێ ل سه‌ر وێ بنگه‌هێ خه‌بتن یا كو مام جه‌لال تاله‌بانی ژ بۆ ئاڤا كری.
چاڤكانیێن پێگه‌ها مه ل باشوورێ كوردستانێ ئه‌شكه‌ره كر، بافل تاله‌بانی ب هایدارییا لاهور جه‌نگی و ئه‌شكه‌ره ئه‌ڤ هه‌نگاڤ هاڤێتنه و ده‌ست نیشان كر، ل رۆژا 8 ڤێ مه‌هێ، لاهور و بافل جڤیانه، بافل ژ لاهور ره گوت كو سیسته‌ما هه‌ڤسه‌رۆكتیێ ژ بۆ یه‌نه‌كێ گونجاو نینه و پێویسته وه‌ره هلوه‌شاندن، لێ به‌لێ لاهور ئه‌ڤ یێك ره‌د كرییه، ئیرۆ ژی بافل ته‌ك ئالی ناڤێ سه‌رۆكێ یه‌نه‌كێ ل خوه كر و ئۆرگانێن یه‌نه‌كێ ب ڤێ هه‌نگاڤا خوه هایدار كرنه.
