گەلۆ ھاکان فیدان-عەبدولا ئۆجالان و ئاکەپە-پەکەکە ھەڤدیتنان دکەن؟

گەلۆ ھاکان فیدان-عەبدولا ئۆجالان و ئاکەپە-پەکەکە ھەڤدیننان دکەن؟

پشتی داخویانیا وەکیلێ ھەدەپێ ئەرۆل کاترجیۆگلو کو دگۆت “گەر پێڤاژۆیا چارەسەریێ بهێتە دەستپێکرن، ئەم دکارین وەکی ھەدەپە ل گەل ئاکەپێ دا ل ھەڤ بکەین ” ل گەل ڤان ئاخافتنا نیقاشەکا وەھا دەسپێکر، گەلۆ پێڤاژۆیەکا چارەسەریێ یا نوو دەست پێ دکەت یان ژی ھەڤدیتنێن ڤەشارتی د ناڤبەرا پەکەکێ و ئاکەپێ دا ھەنە. چوونا ئەردۆگان ژ بۆ ئامەدێ ئەڤ نیقاشێن ب ڤی بابەتی ڤە گرێدایی گوورکرن. نڤیسکارێ مالپەرا ئارت گەرچەک، ئەحمەد نەسین ژی بەشداری گۆتووبێژان بوو و د کوژیکێ خوە دا مەقالەیەک بەلاڤکر، وی ژی پشتگری دا ئیدیعایێن کو د بێژن ناڤبەرا پەکەکێ و دەولەتا ترک دا ھەڤدیتن ھەنە. ئەحمەد نەسین د نڤیسا خوە دا خەبەردانەک دی ژی کر. ل گۆری وی، د ڤان دەمێن داویێ دا د ناڤبەرا عەبدولا ئۆجالان و سەرۆکێ میتێ ھاکان فیدان دا ھەڤدیتن ھەنە.

نەسین گۆت، “ل گەل ڤان ھەمی تشتێن د قەومن، ئەز دخوازم ل سەر گوھلێبوونەکێ باخڤم. ما سەرۆکێ میتێ هاکان فیدان رۆژا پێنجشەمبا بۆری لگەل سەرۆکێ پەکەکێ عەبدولا ئۆجالان دا ھەڤدیتنەک کرییە؟ گەر وان ھەڤدیتن کر بیت، گەلۆ چما پارلەمانتارێن ھەدەپێ وەکی بەرێ ئەنجامێن ڤێ جڤینێ ژ بۆی پەکەکێ نابەن. یان ئەو دەرڤەیی ھەڤدیتنا تێنە گرتن؟ یان ناخوازن ڤێ جارێ ھەدەپێ بێخنە ناڤا ھەڤدیتنان دا…؟” ب راستی، ژ بەرێ دا دھاتە زانین کو ناڤبەرا عەبدولا ئۆجالان و سەرۆکێ میتێ هاکان فیدان گەلەک خوەش و ئارامە.

پەیوەندییێن سەرۆکێ میتێ هاکان فیدان و عەبدولا ئۆجەلان

دهێتە زانین کو د ناڤبەرا هاکان فیدان و عەبدولا ئۆجالان دا ژ سالا 2011ێ ڤە پەیوەندیەک پر بھێز ھەیە. ب راستی، ئۆجالان 10ێ شوباتا 2015ێ دژی دەست ژ کار بەردانا هاکان فیدان دەرکەتبوو و گەلەک پەسنێ سەرۆکێ میتێ دا بوو. ھەیا ئۆجەلان دگۆت “من و هاکان فیدان ل ڤر کۆبانی رزگار کرییە” وی بالا ھەموویا کشاندە سەر پەیوەندیێن خوە یێن لگەل سەرۆکێ میتێ هاکان فیدان دا ھەیی.

چاڤدێرێن سیاسی ژی وەها دفکرن کو پەیوەندیا ھاکان فیدان و ئۆجەلان بێی ناڤبەر بەردەوام بوویە. و ھەر وەھا نێرینەک ھەڤپار ژی ھەیە کو پەیوەندیێن ئۆجەلان لگەل دەولەتا ترک دا چ راستەراست و چ ژی نەراستەراست ھەر دەم ھەبوویە.

کارمەند و خەباتکارێ چاپەمەنیێ یێ پەکەکێ دۆغان چەتین د 25ێ چلە دا گۆتبوو کو دەولەتا ترک و ئاکەپێ ناڤبەینکار شاندینە قەندیلێ.

یا کو مراد قارایلان گۆتی؛

رێڤەبەرێ پەکەکێ مراد قارایلان، دیار کر کو ئاکەپێ د 11ێ خزیرانێ دا نوونەرەکێ خوە شاندیە جەم وان. قارایلان د داخویانیا خوە دا کو پشتی شەهیدکرنا 5 پێشمەرگەیان ژ ئالیێ ھێزێن پەکەکێ ڤە ل ئامێدیێ دابوو گۆت کو ئاکەپە داخواز ژ وان کرییە کو ئەو شەری راوەستینن. بەردەوامیێ دا قەرایلان گۆت: “تشتەک دی ژی ھەیە، و ئەو ب راستی تشتەک نهێنی بوو. ھەیا نھا، من دگۆت هەگەر من کەک مەسعوود بارزانی دیتبا، ئەز دا  لگەل وی دا پارڤە کەم، یان ژی هەگەر ئەز لگەل رایەدارێن پەدەکێ دا ھەڤدیتنێ بکەم، ئەزێ ببێژمە وان. لێ نھا ئەز ڤێ یەکێ ل بەرامبەری گەلێ کورد و رایا گشتی پارڤە دکەم. چەند مەھ بەرێ، دەولەتا ترک، ب ناڤبەینکارییا ھندەک ھەڤالان، و رەجەب تەییب ئەردۆگان ب خوە، پەیامەک ژ بۆی مە شاند و تێدا گۆت: “ل ترکیا یان ل باکورێ کوردستانێ ئاگربەستێ راگەھینن، وی دەمی ئەم ژی مایتێکرنێ د چ کارێن وەیێن د ناڤا پارچەیێن دی یێن کوردستانێ دا ناکەین ژ بەر ڤێ یەکێ ئاگربەستێ راگەهینن، ھەگەر هەوە لگەل پەدەکێ دا ناکۆکی ھەنە، ھەرن شەرێ وان بکەن” پەکەکە ئەڤە دەمەک درێژە ل باکورێ کوردستانێ و ترکیێ چالاکی ئەنجام نەداینە، دهێتە بیرا مرۆڤی کا گەلۆ ل سەر مژارەکا وەھا پەکەکێ و ئاکەپێ رێکەفتن کریە؟ ژبەرکو ژ بەر  شەرێ ھەر دو ئالییان، حکوومەتا ھەرێما کوردستانێ، گەلەک زیان دیتن و ھێژتاژی د بینیت.

گاڤا کو مرۆڤ ھەمی داخویانی و نیقاشان ل بەر چاڤ دگریت، دهێتە دیتن کو ترافیکەکا دانووستاندن و ھەڤدیتنان د ناڤبەرا ئاکەپێ و پەکەکێ دا ھەیە. ب راستی، ب گشتی نێرینا تێتە پەژراندن ئەوە کو چ جاران دانوستاندن د ناڤبەرا پەکەکێ و دەولەتا ترک دا نەڤەبرینە. ئاستەنگیا کو ھەر دو لایەن تێ دا دژین پەکەکێ و ئاکەپێ نێزی ھەڤ دو دکەت و موحتاجی ھەڤدو دکەت. پەکەکە د ھەر واری دا تەنگ و بچووک بوویە، ئەو نکاریت ل باکورێ کوردستانێ یەک فیشەکێ ژی باڤێژیت و نکاریت ھەزار کەسان ژی ل ھەڤ کۆمبکەت. ژ لایێ دی، ئاکەپە ژی د ھەر واری دا بەرتەنگ بوویە و ژ لایێ ھەڤپشکا خوە یا حکوومەتێ مەھەپێ ڤە ژی بێتر دهێتە تەنگاڤکرن. ژ 2004ێ و هێرڤە، ئەڤ ھەر دو ھێزە ژ بۆ کو خوە ژ ڤان ئاستەنگییان رزگار بکەن، دبیت کو پێویستی ب ھەڤ دوو رزگارکرنێ د بینن.

پوستێن ھەمان بەش