د نها دە مژارا هەری گەرم ل باشوورێ کوردستانی، مژارا بێ باندۆرکرنا لاهور شێخ جەنگی و لادانا دووڤەلانکێن وی د ناڤا سازیێن ئەولەهیێ یێن ل سلێمانیێ یە ژ هێلا بافل تالەبانی یێ کورێ مام جەلال. ئەڤ مژار ب ئاوایەکی گەرمە کو هن چاڤدێرێن سیاسی ووسا دفکرن گەر پرسگرێکا د ناڤبەرا هەر دو هەڤسەرۆکێن یەنەکێ بەردەوام بە، نە دوورە بگهیژە پەڤچوونێن چەکداری. هن چاڤدێرێن دن ژی ووسا دفکرن کو پرسگرێک ب داوی بوویە و بافل تالەبانی هەر تشت ب داوی کریە.
یا راست هەر ل رۆژا ئەنجامدایینا کۆنگرەیا یەنەکێ یا داویێ ناکۆکی د نێڤبەرا جوت پسمامان دە دروست بوون، بافل تالەبانی کو خوە ب میراتگرێ مام جەلال دزانە نەما دکاری ڤێ یەکێ قەبوول بکە، لاهور جەنگی ژ وی پێتر دەنگا د کۆنگرەیێ دە ب دەست بخە، لێ لاهور پرانیا ئەندامێن یەنەکێ یێن بەشدار دکۆنگرەیێ دە کریبوون و دەنگێ وان ژ خوە رە مسۆگەر کربوو، لاهور هن ئەندامێن کۆنگرێ ب پەرە، هن ب تەهدید و گەفخوارن ب کوشتن و پارڤەکرنا مەلەفێن وان یێن نە ئەخلاقی وەکە ڤیدەئۆیێن کو ئەو تێدە ب تازی ل گەل ژنان خوەیا دبن خستبوون بن فەرمانا خوە و هن ئەندامێن دن ژی ب پێدانا پلەیێن حزبی و حکوومی رازی کربوون. ئەڤ یەک بوو سەدەم کو لاهور دەنگێن هەژمارەک هەری زێدە یا ئەندامێن کۆنگرێ ب دەست بخە، لێ ئەڤ یەک نە سەدەما سەرەکە یا ناکۆکیێن وان ئێن نها یە، گەلۆ سەدەما سەرەکە چ بوو؟
ل گۆر زانیاریێن مە یێن تایبەت، بەرا مەهەکێ بافل تالەبانی نەخوەش دکەڤە، ئەو سەرەدانا نەخوەشخانەیێ دکە، ل گۆر ئەنجامێن پشکنینێن وی ل نەخوەشخانیێ تێ ئیسبات کرن کو ئەو هاتیە ژەهر خوار کرن، بافل لەکۆلینێ دکە و دگەهە وێ ئەنجامێ کو یەک ژ پاسەوانێن وی ب فەرمانا لاهور جەنگی ژەهر کریە د ناڤا خوارنا وی دە، ئەڤ ژ ئالیەکێ. ژ ئالیەک دن هەژمارەک هەری زێدە ژ رایەدارێن یەنەکێ ل جەم بافل تالەبانی گلەیی دکن کو لاهور ب بکارئانینا سازیا ئیستخباراتا یەنەکێ یا ب ناڤێ زانیاری ڤیدەئۆیێن بێ ئەخلاقی ل سەر وان چێدکە و هەر وەها زارۆکێن بەرپرسان کێشی بکارئانینا مادەیێن هشبەر دکە و پاشان وەکە کارتا گڤاشێ ل سەر بابێ وان بکار تینە، ئەڤ یەک ژی دبە سەدەم کو ئەو ل همبەر لاهور بێ دەستهلات بمینن، هەر وەها لاهور ب دەست دانینە سەر داهاتێ ناڤخوەیی یێ سلێمانیێ و رێ نەدان ب ڤەگەرا ڤی داهاتی ژ بۆی خەزینەیا حکوومەتا هەرێما کوردستانێ بەرپرسێن یەنەکێ ب تایبەتی قوباد تالەبانی د ناڤا حکوومەتا هەرێما کوردستانێ دە خستبوون رەوشەک پر خەراب، هەر وەها قاچاخچیتیا دەرمان و پەترۆلێ و یا ژ هەموویان گرینگتر حەساب نەکرن ژ بۆی بافل د تو مژارەکێ دە ئەڤ ناکۆکی د نێڤبەرا جوت پسمامان دە گهاندن ئاستا هەری ژۆر.
ناکۆکی دگهیژن ئاستەکی کو بافل تالەبانی ب ت ئاوا نکارە لاهور جەنگی عەفوو بکە، ل داویێ ژ نیشکاڤە بافل ب بکارئانینا هێزا لەشکری دچە سەر سازیا ئیستخباراتی یا یەنەکێ و هن بەرپرسێن ڤێ سازیێ دەستەسەر دکە، بافل هەر یەک ژ محەمەد تالەبانی یێ برایێ ئالا تالەبانی و خوارزایێ لاهور یێ ب ناڤێ رەنج کو دو بەرپرسێن هەری بلند یێن ئیستخباراتا یەنەکێ نە دەستەسەر دکە، پشترە بافل ل ئاڤاهیا ئیستخباراتا یەنەکێ دەست دانی سەر هن تۆمارێن ڤیدەئۆیی یێن نە ئەخلاقی یێن بەرپرسێن یەنەکێ کو لاهور ژ بۆی بن دەست کرنا وان ب بکارئانینا سازیا ئسیتخباراتی تۆمار کربوون. هەر وەها بافل تالەبانی د ژوورا خوارزایێ لاهور یێ ب ناڤێ رەنج دە دەست د دانە سەر قووتیەک ژ ژەهرێ. هەر وەها بافل هێزەک دن دشینە سەر شیرکەتا لاهور یا ب ناڤێ کونسول و ل ور دەست د دانە سەر 10 مەلیۆن دۆلاران.
تشتێن کو ب دەست بافل تالەبانی کەتبوون بەس بوون کو لاهور پێ بێ دەنگ بکە، لاهور هن جاران ب ئاوایەک راستە راستەراست و هن جاران ب ئاوایەک نەراستەراست و ب رێیا بەرپرسێن یەنەکێ داخوازا هەڤدیتنێ ژ بافل کر داکو پرسگرێک وەرن چارەسەرکرن، لێ بەلێ بافل رازی نەبوو، بافل تشتێ کو دخوەست کر، ئێدی لاهور هات بێ باندور کرن، بافل ب گوهەرینا بەرپرسێن ئەولەهیێ یێن سەر ب لاهور جەنگی و دانینا کەسێن وەفاداری خوە، لاهور ل عەردێ دا و خوە ژ هەڤسەرۆکێ یەنەکێ ب سەرۆکێ یەنەکێ بناڤ کر.
هەیا نها ژی ئەڤ ناکۆکی بەردەوامن، ئیرۆ ئێڤارێ ژی هێزەکە ئەولەهیێ ب فەرمانا بافل تالەبانی چوون سەر کانالا تەلەفزیۆنی یا ب ناڤێ IPLUS کو ئەڤ کانال یا سەر ب لاهور جەنگی یە و هەیا نها دەست ب پەخشا خوە نەکریە، ل گۆر زانیاریان هەموو کارمەندێن ڤێ کانالێ ژ بۆی مالێ هاتنە شاندن و بەشەک ژ ئاموورێن ڤێ کانالێ هاتنە شکاندن و بەشەک دن ڤێ هیزێ ب خوە رە برنە.
یاکو خوەیایە، بافل ب ت ئاوا رازی نابە رەوش وەکە بەرێ ڤەگەرە و لاهور وەکە بەرێ ب دەستهلات بکەڤە، بافل دخوازە پارتیا ژ باڤێ خوە ب میرات وەرگرتی ئەو ب خوە برێڤە ببە، ئەو ژ ئالیەکی دخوازە ب ڤی ئاوا هنەکێ ئالیکاریا برایێ خوە و تیما یەنەکێ یا د حکوومەتا هەرێما کوردستانێ دە بکە و وان ژ وێ دۆرپێچ و گڤاشا کو لاهور ل سەر وان دانیە رزگار بکە، ژ ئالیەک دن ژی دخوازە خوە وەکە کەسێ یەکەم و بەرپرسێ سەرەکە یێ یەنەکێ نیشان بدە.
