لاهور جەنگی ل قەندیلێ و بافل تالەبانی ل سەر تربا مام جەلال

لاهور جەنگی ل قەندیلێ و بافل تالەبانی ل سەر تربا مام جەلال

ناکۆکیێن د نێڤبەرا هەر یەک ژ بافل تالەبانی و لاهور شێخ جەنگی هەڤسەرۆکێن یەنەکێ کو ژ 8ی ڤێ مەهێ دەست پێ کری گهیشتن قۆناغەک نوو، د ڤێ قۆناغێ دا تێ چاڤەرێکرن کو هەر تشت ب داوی ببە، ژ بەر کو وەکە خوەیا دبە بافل تالبانی بریارا خوە دایە و دخوازە یەنەکێ ژ دەستێن لاهور بینە دەر و خوە وەکە میراتگرێ مام جالال و سەرۆکێ یەنەکێ ئیلان بکە، ژ بۆی ڤێ یەکێ ژی بریارا داویێ هاتیە دایین و ووسا خوەیایە کو ئەندامێن سەرکرداتیا یەنەکێ ژی ل سەر ڤێ بریارێ رازی نە.

ل گۆر زانیاریێن تایبەت یێن پێگەها دارکا مازی، پشتی تووند بوونا ناکۆکیان، لاهۆر جەنگی ژ بۆی پاراستنا خوە ژ دەستێن بافل تالەبانی چەندین جاران ب رایەدارێن پەکەکێ رە جڤیایە، هن جاران ب ئاوایەکی راستەراست و هن جاران ژی ب رێیا نوونەرێن هەر دو ئالیان ئەڤ هەڤدیتن هاتنە ئەنجام دایین، د ڤان هەڤدیتنان دا پەکەکێ پشتەڤانیا خوە ژ بۆی لاهور راگهاندیە و ئەو پشت راست کریە کو پەکەکە دەست ژ وی بەرنادە، ژ بەر کو بەرژەوەندیێن هەر دو لایەنان نێزیکی هەڤن.

چاڤکانیێن تایبەت یێن پێگەها دارکا مازی ل قەندیلێ ئاشکەرا کر، ل شەڤا 13 ل سەر 14یی ڤێ مەهێ، لاهور جەنگی ل قەندیلێ هاتیە دیتن، لاهور جەنگی ژ بۆی هەڤدیتنا ب رایەدارێن پەکەکێ ب تایبەتی جەمیل بایک چوویە قەندیلێ، د ڤێ جڤینێ دا جەمیل بایک پشتەڤانیا خوە ژ بۆ لاهور راگهاندیە و دایە خوەیا کرن کو ئەو د هەر ئالیەکێ دا ئامادەنە ئالیکاریا لاهور بکن، گەر پێویست بە دکارن ژ ئالیێ لەشکری ژی پشتگیریا وی بکن.

چاڤکانیێن پێگەها دارکا مازی هەر وەها ئاشکەرە کر، د ڤێ جڤینێ دا بریار هاتیە گرتن کو لاهور جەنگی لگەل مالباتێن شەهیدێن یەنەکێ بجڤە و ژ بۆی وان ووسا بدە دیار کرن کو بارزانی و ترکیا ل پشت تاوانبارکرنا وی ژ هێلا بافل ڤە نە، ب ڤێ یەکێ لاهور وێ بکارە کار ل سەر هەست و سۆزێن مالباتێن شەهیدێن یەنەکێ بکە و وان وەکە هەرجار ب ئاخافتنێن دەرەو رازی بکە، د جڤینا لگەل مالباتێن شەهیدان ژی ئەڤ یەک ب زەلالی خوەیا بوو و لاهور بارزانی سووچبار کر.

د بەشەکە دن یا جڤینا لاهور جەنگی و جەمیل بایک دا، بایک پێشنیار دایە لاهور کو حیزبەکا نوو دامەزرینە یان ژی د ناڤا “پەچەدەکێ” یا سەر ب پەکەکێ ڤە ل سلێمانیێ کار بکە و ب تێکلیێن خوە یێن لگەل کەسێن د سازیێن ئەولەهیێ و د ناڤا یەنەکێ دا، یێن کو هەیا نها ل ژێر فەرمانا لاهور دا نە و بەرژەوەندیێن وان کەفتنە مەترسیێ دا هەول بدە ڤێ پارتیێ مەزن بکە، ژ بۆ ڤێ یەکێ ژی جەمیل بایک ئامادەییا پەکەکێ ژ بۆی هەر ئالیکاریەکێ راگهاندیە.

هەر وەها هات زانین کو د ڤێ جڤینێ دا بریار هاتیە دایین کو لاهور جەنگی داخویانیەکێ پارڤە بکە و د داخویانیێ دە ژ بۆی راکێشانا هەست و سۆزێن گەل ووسا بدە خوەیاکرن کو مەسعوود بارزانی و ترکیە ل پشت ناکۆکیێن د نێڤبەرا وی و بافل تالەبانی دا نە و دخوازن ب ل سەر کار لادانا وی گڤاشێن ل سەر پەکەکێ تووندتر بکن و ژ ئالیێ سلێمانیێ ئێریشی پەکەکێ بکن، ئەڤ داخویانیا کو لاهور دخوازە وەکە دیار کرنا هەلوەستا خوە ل سەر روودانێن سلێمانیێ پارڤە بکە ژ ئالیێ جەمیل بایک ب خوە ڤە هاتیە نڤیساندن.

تەڤی ڤێ یەکێ ئیرۆ رۆژا 15/7/2021ان، بافل تالەبانی ژی ل سەر تربا مام جەلال هات دیتن، بافل ل سەر تربا باڤێ خوە داخویانیەک پارڤە کر و تێدە راگهاند: ” ھەری داوی ب نەچاری و پشتی ھەولێن خوەیێن بەردەوام و ھەولدانێن د بەر یەکیتیا مە و پاراستنا رێبازا راست و درست و ب شێورا ل گەل سەرکردەیێن تێکۆشەر و خەمخۆرێن راستەقینێن یەنەکێ، من بریارا گوھەرتنێن بنگەھین د سەرپرەشتێن ھەموو وان دەزگەھێن ئەمنی و حزبی دا، کو ب سالان بوو کەتبوون خزمەتا بەرژەوەندیێن ھنەک کەسان و بۆ تەسفیەیێن حزبی دھاتن بکارئانین و ل دژی بەرژەوەندیێن بلندێن گەلێ مە و یەکیتیا مە تەڤدگەریان.”