په‌ده‌كه‌سه‌: رەڤاندنا ئەندامێن مە، نیشانا تێکچوونا رێڤەبەرییا خوەسەرە

PDK-S: رەڤاندنا ئەندامێن مە، نیشانا تێکچوونا رێڤەبەرییا خوەسەرە

مه‌كته‌با سیاسییا پارتییا دەمۆکراتا کوردستانێ – سووریێ داخویانییەک دەربارێ رەڤاندنا ئەندامێن وێ ژ ئالیێ هێزێن سەر ب رێڤەبەرییا خوەسەر ڤە بەلاڤ کر و راگه‌هاند، ئەڤ کریار خزمەتا پێشەرۆژا گەلێ مە و دۆزا وی ناکه‌ن و کەدێن سەرخستنا دانوستاندنێن کوردی ژی سنۆردار دکه‌ن.

مه‌كته‌با سیاسییا PDK-S د داخویانیەکێ دا راگه‌هاند، د چارچۆڤەیا رەوشا دژوار كو گەلێ مە تێدا ده‌رباس دبیت، چەکدارێن سەر ب په‌یه‌دێ ڤە ل شەڤا بووری 17ێ تیرمەهێ دەست ب کامپینەکا رەڤاندنا کادر و ئەندامێن مە کرییه‌.

هه‌ر یێك ژ:

  1. ئەندامێ ئەنجوومەنا هەرێمێ یێ PDK-S ل چلاخا محەمەد سالح شەلال ئەحمەد.

  2. ئەندامێ ئەنجوومەنا هەرێمێ یێ PDK-S ل قامشلۆ عزەدین زێنلابدیم مه‌حموود.

  3. ئەندامێ کۆمیتەیا شێورمەندیێ یێ PDK-S و سەرۆکێ بەرێ یێ خوەجهییا ئەنه‌که‌سێ ل قامشلۆ محەمەد دەهام ئەیۆ.

  4. ئەندامێ ئەنجوومەنا هەرێمێ یێ PDK-S ل گرکێ لەگێ بەرزان حوسێن.

هاتنه‌ ره‌ڤاندن.

مه‌كته‌با سیاسی یا PDK-S دیار کر ژی، رۆژا 13ێ تیرمەهێ ژی ئەندامێ وان فەرمەز عەبدولکەریم ل دێرکێ و رۆژا 22 گولانێ عەبدولغەفار محەمەد ل چلاخا هاتبوون رەڤاندن.

PDK-S  رادگه‌هینیت، ئەڤ کریارێن ترساندنێ و سیاسەتا بێدەنگکرنێ، تەنێ نیشانەیا تێکچوونا ڤێ رێڤەبەریێ «رێڤەبەریا خوەسەر»ە، ئەو ل هەر بهانەیەکێ دگەریت تا کو نێرینێن جودا سەرکوت بکەت و دەستهلاتدارییا خوە ب زۆرا چەکی فەرز بکەت».

د بەشەکە دی یێ داخویانیێ دا هات: «ئەم وەک پارتییا دەمۆکراتا کوردستانێ – سووریێ، ئەم ڤان کریارێن ل دژی مافێن مرۆڤان و ئازادییان ب توندی شەرمەزار دکه‌ین، ئەڤ کریار خزمەتا پێشەرۆژا گەلێ مە و دۆزا وی ناکه‌ن و کەدێن سەرخستنا دانوستاندنێن کوردی ژی سنۆردار دکه‌ن».

د داویا داخویانیێ دا، PDK-S بانگ ل ئالیێن ناڤدەولەتی یێن پێوەندیدار دکەت کو ئەرک و پابەندیێن خوە یێن رێگرتنا ل بنپێکرنێن ل دژی کادریێن ئەنه‌که‌سێ ب جهـ بینن، هەروه‌ها بانگ ل هێزێن نشتمانی و هێزێن کوردستانی کر، فشارێ بکه‌ن، ژ بۆ كو کەسێن هاتنە رەڤاندن بهێن ئازادکرن.