سکێرتێرێ پارتیا چەپ: داگیرکەرێن کوردستانێ ناھێلن دیالۆگا کوردی سەربکەڤیت

سکێرتێرێ پارتیا چەپ: داگیرکەرێن کوردستانێ ناھێلن دیالۆگا کوردی سەربکەڤیت

سکێرتێرێ پارتیا چەپا کورد ل سووریێ د دەربارێ ھەلوەستا رەژیما سووریێ یا ل ھەمبەر کوردان و رێڤەبەریا خوەسەر و ھەلوەستا رووسیایێ و چارەنڤیسا دیالۆگا ئالیێن کوردی دا ئاخڤی و دیار کر: رەژیما سووریێ “حەتا نھا ژی ھەبوونا کوردان ئینکار دکەت” و ھەروھا دا زانین: “داگیرکەرێن کوردستانێ ناھێلن دیالۆگا کوردی سەربکەڤیت.”

سکێرتێری پارتیا چەپا کورد ل سووریێ محەمەد مووسا، دەستنیشان کر، زێدەتری 10 سالایە شەرێ ناڤخوەیێ سووریێ بەردەوامە و بوویە سەدەما وێرانکاریەکا مەزن و گۆت، ئەو نە د وێ باوەریێ دایە کو رەژیمێ ئامادەکاریەک ھەبیت بۆ دیالۆگا ل گەل رێڤەبەریا خوەسەر.

د بەردەواما گۆتنێن خوە دا محەمەد مووسا ئاشەکەرا کر: “خوەندنا رەژیمێ رەوشا ھەیی یا سووریێ تێ را دەرباس دبیت نایینتە بەرچاڤان. زەختا ناڤدەولەتی ژی دەما سست دبیت رەژیم خورت دبیت. رەژیمێ خوەندنەکا گەلەک خەلەت ھەیە. رەژیم رازی ببیت یان نە، سووریا ئیرۆ 3 پارچەیە.”

سکێرتێری پارتیا چەپا کورد ل سووریێ دیار دکەت، وان چ ھێڤی ژ رەژیمێ نینە و دبێژیت: “حەتا نھا رەژیم ھەبوونا کوردان ل سووریێ ئینکار دکەت، رەژێمەک کو ئینکارا ھەبوونا من بکەت، ئەز دێ چاوا ل گەل وێ دا کەڤمە دیالۆگێ! چ ئامادەکاری ل گەل رەژیما سووریێ نینە.”

ل سەر ھەلوەستا رووسیایێ ژی محەمەد مووسا دا زانین: “ھەلوەستا رووسیایێ ھەلوەستەکا خەرابە، رووسیا بەردەوام پشتگریا رەژێمێ دکەت و ژ مە دخوازیت ئەم خوە رادەستی رەژیمێ بکەین. رووسیا دکاریت زەختێ ل رەژیمێ بکەت، لێ ئەو ژ بۆ بھێزکرنا رەژیمێ کار دکتن.”

دەربارێ گرینگی و باندۆرا دیالۆگا کوردی-کوردی ل سەر دیالۆگا لگەل رەژیمێ و سەدەمێن راوەستانا وێ دیالۆگێ ژی سکێرتێرێ پارتیا چەپا کورد ئاشکەرا دکەت: “دیالۆگ ئەڤە 3 مەھە راوەستیانە، داگیرکەرێن کوردستانێ ناھێلن دیالۆگ سەربکەڤیت. جھێ مخابنیێ یە کو بزاڤا کوردی حەتا نھا ژی نە سەربخوەیە و بێ باندۆر و بێ ھەلوەستە. دڤێت بزاڤا کوردی ل سووریێ باندۆرا خوە ھەبیت و خوەدی نێرین بیت.”

محەمەد مووسا رادگھینیت کو ھەلوەستا وان وەک پارتی ل ھەمبەر گرتنا کەسێن سیاسی دیارە و ئەو رەد دکەن، لێ دبێژیت: “دیالۆگا ملەتەکێ، کو بزاڤەکا سیاسی بۆ پێشەرۆژا ملەتەکی ل سەر رادوەستیت و مەسەلا ھەبوون و نەبوونێ یە، نابیت ژ بەر گرتنا 4 کەسان بهێتە راوەستاندن. دیالۆگ مەزنترە. ئەم نە ل گەل گرتنا کەسێن سیاسی نە. لێ سەدەما راوەستانا دیالۆگێ نە ئەڤەیە؛ بزاڤا کوردی نە سەربخوەیە، نە خوەدی رۆلە. داگیرکەرێن کوردستانێ زەختەکا زێدە دکەن کو ئەڤ دیالۆگە بسەرنەکەڤیت.”

پوستێن ھەمان بەش