عەزیز وەیسی: ئارمانج ژ ئێریشا ل سەر شەنگالێ ژناڤبرنا ناسنامەیا کوردستانی بوو

فەرماندارێ ھێزێن زێرێڤانی عەزیز وەیسی: ئارمانج ژ ئێریشا ل سەر شەنگالێ ژناڤبرنا ناسنامەیا کوردستانی بوو

7 سال پشتی داگیرکرنا مووسلێ ژ ئالیێ چەکدارێن رێخستنا توندرەوا داعشێ ڤە، ھەتا نھا ژی نهێنیا ئێریشکرنا سەر ھەرێما کوردستانێ نەھاتیە ئاشکەراکرن کو چما چەکدارێن وێ رێخستنێ، بەرێ ئێریشێن خوە ژ بەغدایێ گوھەراندن بۆ ھەرێما کوردستانێ و بێیی جیاوازی زرار ل ھەموو پێکھاتەیان دا. پێشمەرگە ل ھەمبەر ئێریشان بەرەڤانیا ھەموو پێکھاتەیان کر.

داعشێ ژ چار ئالیان ئێریشی شنگالێ کر و د ئەنجام ئێریشێ دا ب سەد ھەزار کەس ئاوارە بوون و ب ھەزاران کەس ژی کەتن بەر دەستێ داعشێ.

فەرماندارێ فەرمانداریا زێرەڤانی عەزیز وەیسی بال کشاند سەر وێ یەکێ کو ئێریشا سەر شنگالێ ژ بۆ ژێبرنا ناسنامەیا کوردستانیبوونێ بوو، دخواستن ب ڤێ رێیێ کوردستانیبوونێ ژ شنگالێ بستینن.

عەزیز وەیسی دیار دکەت کو ژ دەستپێکا ئێریشا داعشێ ڤە، پێشمەرگەیێ کوردستانێ بێیی جیاوازی بەرەڤانی ژ ھەموو پێکھاتەیێن کوردستانێ کر و یەکەم شەر ژی ل دەڤەرا حەمدانیێ بوو، کو جھێ پێکھاتەیا مەسیحی بوو و شەر ب درێژاھیا 78 دەمژمێرا بەردەوام بوو و چەکدارێن داعشێ تێک برن.

پسپۆرێ پێوەندیێن ناڤدەولەتی ناسر کرێت ژی دیار دکەت کو مەبەستا داعشێ د وان ئێریشان دا ژ بۆ داگیرکرنا ھەموو ئاخا ھەرێما کوردستانێ بوو و د وێ ئێریشێ دا زرارا ھەری مەزن ل کوردێن ئێزدی کەت.

ئیرۆ حەفتەمین سالڤەگەرا کۆمکوژیا کوردێن ئێزدییە، کو ب دەستێ چەکدارێن رێخستنا توندرەوا داعشێ روودا. کوردێن ئێزدی دیار دکەن کو ئەو ئێریش و کوشتنا ئێزدیان، فەرمانا 72یەمین بوو، کو د درێژاھیا دیرۆکێ دا ب سەر ئێزدیان دا ھاتنە.

رۆژا 10ێ خزیرانا ٢٠١٤ێ، د سەردەما سەرۆکوەزیرێ وی دەمی یێ ئیراقێ نووری مالکی دا چەکدارێن داعشێ ژ ئاخا سووریێ دەرباسی ناڤ ئاخا ئیراقێ بوون و ل پارێزگەھا نەینەوا و باژارێ مووسلێ ئارتێش و ھێزێن ئیراقێ تێک برن و پرانیا دەڤەران داگیر کرن.

پوستێن ھەمان بەش