دادگه‌ها سلێمانیێ بریارا ده‌سته‌سه‌ر كرنێ ژ بۆی لاهور شێخ جه‌نگی یێ هه‌ڤسه‌رۆكێ یه‌كێتییا نشتیمانییا كوردستانێ ده‌رخست و راگهاند كو ئه‌ڤ بریارا گرێدای دۆسییا 27 مه‌ها رابووری یه كو تێدا فه‌رمان ژ بۆی گرتنا هه‌ر یێك ژ پۆلات شێخ جه‌نگی و ئاسۆ شێخ جه‌نگی برایێن لاهور و هه‌روه‌ها ئه‌فسه‌ره‌كێ به‌رز یێ ئاساییشێ ب ناڤێ ئه‌حمه‌د هاتبوونه ده‌ركرن.
د ڤێ ده‌ربارێ ده، چاڤكانییه‌كی ژ دادگه‌ها سلێمانیێ ژ رووداوێ را ئاخڤی و گۆت: هه‌ر دوهـی رۆژا دووشه‌مبی 2/8/2021ێ، دادوه‌ر ئیفاده ژ لاهور شێخ جه‌نگی وه‌رگرتنه.
فه‌رمانا ده‌سته‌سه‌ر كرنا لاهور شێخ جه‌نگی ل گۆری مادده‌یا 430 یا یاسایا جه‌زایێن ئیراقێ یه.
هێژای گۆتنێ یه، پاش 8 تیرمه‌ها ئیسال 2021ێ، كو تێدا كیشه ل نێڤبه‌را باڤێل تاله‌بانی و لاهور شێخ جه‌نگی چێبوون، باڤێل تاله‌بانی هه‌موو ده‌ستهلات ژ لاهور جه‌نگی ستاندنه و ل سلێمانیێ بێ باندۆر كرییه، لاهور جه‌نگی ژی ڤێ ب كۆده‌تا دزانه.
دوهـی لاهور جه‌نگی په‌یامه‌ك به‌لاڤ كر و تێدا گۆت كو ژ من هاتییه خوه‌ستن كو ئه‌ز كوردستانێ ب جی بهێلم، لێ به‌لێ ئه‌زێ په‌نایێ ژ بۆ دادگه‌هێ به‌م.
دادگه‌ها سلێمانیێ ئیرۆ راگهاند كو داخوازییا لاهور جه‌نگی هاتییه ره‌د كرن.
