نەخشەدانەرێ ئێریشا نژادپەرەستی یا کوشتنا 7 ئەندامێن مالباتا کورد ل ناڤچەیا مەرام یا باژارێ کۆنیایێ محەمەد ئالتون، پشتی ھەفتەیەکێ ب سەر کۆمکوژیێ دا ئیرۆ رۆژا چارشەمبێ ھات دەستەسەر کرن.
سەردۆزگەریا کۆماری یا کۆنیایێ راگھاند کو د چارچۆڤەیا لێپرسین و لێکۆلینێن وان دا کوژەرێ ب ناڤێ محەمەد ئالتون ل نێزکی گوندێ ئوچپنارلار یا ناڤچەیا بۆزکرا کۆنیایێ، ژ لایێ ھێزێن ئەولەھیێ ڤە ھاتیە دەستەسەر کرن.
پارێزگاریا کۆنیایێ ژی راگھاندیە، “محەمەد ئالتون کو 7 ھەموەلاتیێن مە ب ئاوایەکی ھۆڤانە کوشتنە، د ئەنجاما خەباتا ھەڤبەش و چالاکیا رێڤەبەریا ئەولەکاریێ یا باژێری، فەرمانداریا جەندەرمەیا باژێری و تیمێن تایبەتێن ھەرێمێ دا ل جھێ کو خوە لێ ڤەشارتبوو، ھات گرتن.”
ھێژایی ببیرخستنێ یە، سەردۆزگەری و رایەدارێن ترکیێ دخوازن بوویەرێ وەکو بوویەرەکا ژ رێزێ یا لھەڤنەکرنا جیرانان نیشان بدەن، لێ پارێزەرێ مالباتێ ئاشکەرا کریە کو کوژەر نە ب تەنێ بوویە و بەریا کۆمکوژیێ ئەنجام بدەت ژی ب رێیا گرۆپەکێ واتساپێ لگەل کەسێن دی دانووستاندن کریە.
ھەروھا دۆھی 3یێ تەباخێ ژی سەردۆزگەریا کۆنیایێ ژ 14 کەسێن کو پشتی بوویەرێ ھاتبوونە بنچاڤکرن بریارا گرتنا 10 کەسان دابوو.