پارتیا کارکەرێن کوردستانێ (پەکەکە) مەترسیەکا مەزن ژ بۆ وان زارۆکان ئاڤا دکەت کو رەڤاندینە و لەشکەرگەھەکا نوو ژ بۆ وان ڤەدکەت و ژ بۆ ئارمانجێن خوەیێن لەشکەری دێ وان بکار ئینیت.
ل گۆر وان زانیاریێن باس نیوزێ ب دەست خوە خستی، ڤێ داویێ چەکدارێن پەکەکێ بنکەیەکا نوو ژ بۆ چەکدارکرنا زارۆکان ل ناڤچەیا دێریک یا رۆژھلاتێ قامشلۆ ل رۆژئاڤایێ کوردستانێ ئاڤا کریە.
پەکەکە ب رێیا باسکێ خوەیێ ب ناڤێ “جوانێن شۆرەشگەر” ل رۆژئاڤایێ کوردستانێ زارۆکان درەڤینیت و وان ب زۆرێ دکەتە لەشکەر. د ھەمان دەمی دا ئەو زارۆکێن کو ژ ئالیێ کەسێن سەر ب یەکینەیێن بەرخوەدانا شنگالێ (یەبەشێ) ڤە تێن رەڤاندن ژی کو ئەو ژی باسکێ پەکەکێ یێ شنگالێ یە و ژ ئالیێ حەشدا شەعبی ڤە پشتەڤانیا لەشکەری و دارایی ژ وان دهێتە کرن، د وێ بنکەیی دا تێن پەروەردە کرن.
ل گۆر زانیاریان، پەکەکە فێرگەھ و لەشکەرگەھەکا پەروەردێ بۆ زارۆکان ل گوندێ تەل موازنا ل ناڤچەیا عاموودێ ڤەکریە. ھەروەھا لەشکەرگەھا کبکا یا نێزیک گوند و وارێن باشوورێ قامشلۆ و لەشکەرگەھەکا دی ژی ل تەل رەفعەتا گوندەوارێ باکورێ حەلەبێ یە و لەشکەرگەھەک ژی ل شێخ مەقسوودا باژارێ حەلەبێ یە. ھەروەھا لەشکەرگەھەک دی ل کۆبانێ یە ژ بۆ پەروەردە و چەکدار کرنا زارۆکان ھاتیە ڤەکرن. ئەڤ لەشکەرگەھ و فێرگەھێن نهێنی، حەتا نھا نەھاتنە ئاشکەرا کرن و د ھەریەک ژ وان لەشکەرگەھان و بنکەیێن لەشکەری دا ب سەدان زارۆک تێن راھێنان کرن.
د ڤێ دەربارێ دا چالاکڤانێ سیاسی و رۆژنامەڤان روھات محەمەد ب پێویست دزانیت کو ئەڤ زارۆکە ل لەشکەرگەھێن پەکەکێ یێن ل شنگال و رۆژئاڤایێ کوردستانێ بێنە رزگار کرن و دبێژیت: “چارەنڤیسا وان زارۆکان ل مەترسیەکا جدی دایە. ژ بەر کو مێژیێ وان دشۆن و فێری رک و کینێ تێنە کرن، دا کو ژ بۆ ھزرێن خوە بکاربینن.”
ھەروەھا ل گۆر روھات محەمەد پێویستە ئەڤ زارۆکە د پۆلێن خواندنێ دا بن و بخوینن. نە کو بهێنە چەکدارکرن و ژ بۆ ھزرێن حیزبا خوە بکاربینن.
ل گۆر گۆتنێن وی چالاکڤانی، پەکەکە و پارتیێن دووڤەلانکێن وێ ب ھەزاران زارۆکێن ژ هەردو رەگەزا رەڤاندنە و ئەو شاندنە ژ بۆ قەندیل، شنگال و لەشکەرگەھێن دی یێن بن دەستھلاتا وان دا. “حەتا ناھا ب سەدان ژ وان زارۆکان د شەر و پەڤچوونان دا ھاتنە کوشتن.”
ل گۆر زانیاریێن وی چالاکڤانی پەکەکە دەرڤەیی ئالیێ لەشکەری، وەک رەژیما سووریێ، وان زارۆکان د وارێ سیاسی دا و خوەپێشاندانان دا ژی بکارتینیت.
ل گۆر راپۆرتەکا ڤێ داویێ یا وەزارەتا دەرڤەیا ئامەریکایێ ژی پەکەکە و پارتیێن ب وێ ڤە گرێدایی بەردەوامن د چەکدار کرنا زارۆکان دا و وان د شەری دە بکارتینن و ب تایبەت ژی ل زنجیرە چیایێن قەندیلێ.
وەزارەتا دەرڤەیا ئامەریکایێ د راپۆرتەکا خوە دا دبێژیت: “پەکەکێ ب سەدان زارۆک ل شنگالێ چەکدار کرنە و وەک شەرکەر ئەو خستنە ناڤ یەکینەیێن بەرخوەدانا شنگالێ دا، کو ئەو ژی باسکێ سەر ب پەکەکێ یێ ل شنگالێ یە و پشترا ژی ئەو زارۆک شاندنە قەندیلێ، کو شەری ل گەل ئارتێشا ترکیێ بکەن.”
ل گۆر وێ راپۆرتا وەزارەتا دەرڤەیا ئامەریکایێ، یەپەگە باسکەکێ پەکەکێ یە و بەردەوامە د چەکدار کرنا کەچ و خۆرتان دا. ھەروەھا دبێژیت کو ھندەک ژ وان زارۆکێن ھاتینە چەکدار کرن تەمەنێ وان ژێر 12 سالیێ یە.
