ل باژارێ قامشلۆ زارۆکەکا 13 سالی ژ لایێ جوانێن شۆرەشگەر ڤە ھات رەڤاندن و مالباتا وێ داخواز دکەن چارەنڤیسا وێ زارۆکێ بهێتە دیارکرن.
سیامەند عۆسمان ژ بۆ K24ێ راگھاند، گرۆپا ب ناڤێ جوانێن شۆرەشگەر خوشکا وی یا 13 سالی سیماڤ عۆسمان ژ ناڤا باژارێ قامشلۆ رەڤاند و حەتا نھا هیچ ئاگاھیەک ل سەر چارەنڤیسێ وێ دیار نینە.
سیامەند عۆسمان دیار کر، سیماڤ 13 سالییە و ئەڤ سالە پۆلا خوەندنێ یا ھەشتێ ب دوماهی ئینایە و دەما دچوو خولەکا ھاڤینێ یا خوە ئامادەکرنێ بۆ پۆلا 9ێ، ژ لایێ گرووپا جوانێن شۆرەشگەر ڤە ھات رەڤاندن.
سیامەند ئۆسمان بانگ ل رێخستنێن مافێن مرۆڤان، پاراستنا مافێن زارۆکان، رێخستنێن یاسایی یێن ناڤخوە و ناڤدەولەتی و فەرماندارێ گشتی یێ ھێزێن سووریەیا دەمۆکراتیک (ھەسەدێ) کر، دەستێوەدانێ د مژارێ دا بکەن ژ بۆ خوشکا وی ژ بۆ مال و قۆتابخانا خوە بهێتە ڤەگەراندن.
تەڤگەرا جوانێن شۆرەشگەر سەر ب رێڤەبەریا خوەسەر ڤەیە و راستەراست ژ ئالیێ پەکەکێ ڤە تێ ئاراستەکرن، ڤێ تەڤگەرێ پێشتر چەندین جاران جوانێن کورد رەڤاندبوون و چەکدار کربوون. کریارێن ڤێ تەڤگەرێ ژی راستی گەلەک نەرازیبوونا خەلکێ رۆژئاڤایێ کوردستانێ هاتنە.
