ل پارێزگەھا بەدلیسێ یا باکورێ کوردستانێ، پۆلیسان ئێریشی دکاندارێن کو نەخواستن دەست ژ دکانێن خوە بەردن کر و سەرۆکێ ئۆدەیا بازرگانی و پیشەسازیێ داڤوت تەزجان ژی د ناڤ دا، ھەری کێم 70 کەس دەستەسەر کرن.
ل تاخێن ئاتاتورک، دەڤریم، گازبەی، ھەرسان و موشتاکبابا سەر ب پارێزگەھا بەدلیسێ، 700 ئاڤاھی ژ نیسانا 2020ێ ڤە ب بریارا سەرۆک کۆماریا ترکیێ، وەک دەڤەرا مەترسیدار ھاتنە راگھاندن. پشتی بریارێ، د ئەنجاما سکالایا دکانداران ژ ئالیێ دادگەھێ ڤە بریارا “راوەستاندنا رێڤەبرنێ” ھاتە دایین. لگەل ڤێ بریارێ ژی ژ دکاندارا ھات خواستن کو ھەتا 30ێ تەمووزا 2021ێ کارگەھێن خوە ڤالا بکن.
ل گۆر ئاگاھیان، 14ێ تەباخێ د دەمژمێر 00:30 دا، پۆلیسان خواست کارگەھان ڤالا بکەن، لێ راستی نەرازیبوونا دکانداران ھاتن و د ئەنجامێ دا پۆلیسان ب گولەیێن پلاستیکی و بۆمبەیێن گازێ ئێریشی دکانداران کرن و ھەری کێم 70 کەس دەستەسەر کرن.
ھات دیارکرن، ھەژمارەکا دکاندارێ کو د ئێریشێ دا بریندار بوونە، راکرنە نەخوەشخانەیێ.
