پارتیا دەمۆکراتا کوردستانێ (پەدەکێ) د سەری دا ل کەرکووک و دەڤەرێن دی یێن کوردستانی کو ل دەرڤەیی ئیدارەیا ھەرێما کوردستانێ نە، دەست ب بانگەشەیا ھلبژارتنێن پێشوەختێن 10ێ جۆتمەھا 2021ێ یێن ئیراقێ کر.
بەردەڤکێ پەدەکێ ل کەرکووکێ سامان رەشید راگھاند، “بەرنامەیا مە گشتگیرە، ژ بۆ ھەرێما کوردستانێ و پارێزگەھێن ل دەرڤەیی ئیدارەیا ھەرێما کوردستانێ یە. ل کەرکووکێ مە چەند نڤیسینگەھ ڤەکرنە و کارێن خوە د چارچۆڤەیا رێنمایێن کۆمسیۆنا ھلبژارتنێ دا دکەین.”
سامان رەشید گۆت: “پشتی 16ێ ئۆکتۆبەرا 2017ێ، رەوشەکە نە ئاسایی ب سەر کەرکووکێ دا ھات. ئیدارەیەکا لەشکەری ل باژێری ھەیە و چەندین ھێزێن جودا ژی ھەنە. ھەر چەندە نڤیسینگەھێن مە ھاتنە داگیرکرن ژی، لێ ئەم ل وان نڤیسگەھان کار دکەین. ئەگەر رێگری ل مە بهێتە کرن، ئەم دێ سکالایان تۆمار کەین.”
بەردەڤکێ پەدەکێ ل کەرکووکێ دیار کر: “مە وەک پەدەکێ د ڤێ قۆناغێ دا، ژ بۆ بانگەشەیێ و برێڤەبرنا کارێن خوە، نڤیسگەھ ڤەکرنە و ئەم ھەولا سەرخستنا کاندیدێن خوە ددەین. ئەم ب ریا پارلامەنتەرێن خوە ھەول ددەین د خولا بێت یا پەرلەمانێ ئیراقێ دا رەوشا کەرکووکێ ئاسایی ببیت و پرسگرێکێن باژێری ژی بێنە چارەسەرکرن.”
سامان رەشید دا زانین: “نھا کاندیدێن مە ل کەرکووکێ نە و ھەلمەتا بانگەشەیێ ل باژێری ژی دەست پێ کریە”.
