پەکەکە ژ بۆ چ ب کرێتی شەرێ بارزانی و پەدەکێ دکەت !
گەلەک جارا ل ھمبەر درەو و پرۆپاگاندایێن نە راست یێن پەکەکێ و ھەموو دام و دەزگەھێن وێ د رووپەلان دا نڤیسین ھاتنە بەلاڤکرن و بەحسا راستیا پەکەکێ ھاتیە کرن. لێ دیارە ئەڤە ب تەنێ تێرێ ناکەن، دەما مرۆڤ سنۆرێن ئەخلاقی دەرباس بکەت و شەرم دەف نەمینت، بەرسڤێن ب مرۆڤی بهێنە دایین ژی جھێ خوە ناگرن و ھەر ھەلوەستا بهێتە نیشاندان ژی دەرباس دبیت و دچیت. ژ بۆ ڤێ دڤێت چ بهێتە کرن کو رێ ل درەو، پرۆپاگاندایێن نە راست و بێ ئەخلاقانە بهێتە گرتن. رێیەک ھەیە کو دڤێت سیاسەتا پەکەکێ و ھاڤالبەندێن پەکەکێ بهێتە ھەرماندن.
ژ ئالیەک دی ئەو کەسێن دبنە سەربازێن سیاسەتا پەکەکێ دڤێت باش بهێنە ناسکرن و بهێنە تەشھیر کرن. ئەوێن بەحسا یەکتیا کورد ب دەڤێ پەکەکێ دکەن، ئەون ب ئۆرگانیزەکرنا پەکەکێ بەحسا “شەرێ براکوژی” دکەن دڤێت باش بهێنە ناسکرن رێ ل درەو و ھەلوەستێن وان یێن دوروو بهێتە گرتن. ئەگەر ئالیەک سیاسی یان ژی د ناڤا ئالیێن سیاسی دا ھندەک کەس ڤێ یەکێ ئەنجام نەدەن، دێ بنە دارکێ تەڤدانێ د دەستێ پەکەکێ دا و بڤێت نەڤێت دکەڤنە د بن خزمەتا سیاسەتا قرێژا کو دهێتە رێڤەبرن.
بەری چەند رۆژەکان ل رۆژئاڤایێ کوردستانێ دەڤەرێن د بن دەستھلاتداریا پەکەکێ دا خوەپێشاندانەک چێبوو. ئێریشا ترکیا یا ل سەر شنگالێ دھاتە شەرمەزار کرن. د دەستێ خوەپێشەنداران دا ئالایێن پەکەکێ، پەیەدێ ھەسەدێ و وێنەیێن عوبدوللا ئۆجالان ھەبوون. پانکاراتەک د پێشیا خوەپێشاندەران دا ھەبوو کو مرۆڤ شەرم دکەت بەحس بکەت. د وێ پانکراتێ دا ئەڤە ھاتبوو نڤیساندن: “دۆھی داعش شنگال جینۆساید کر ئیرۆ ژی ئەڤەنە” ل سەر ڤێ نڤیسێ را وێنەیێ مەسعوود بارزانی، ئەردۆگان و سەرۆکوەزیرێ ئیراقێ کازمی ھەبوو.
ئەگەر سیاسەتمەدارەک کو ب ناڤێ بێ لایەنیێ زرنایا پەکەکێ لێ ددەت بکاریت ڤێ نڤیسینێ و ھەلوەستا سیاسەتا پەکەکێ پێناسە بکەت ھەر تشتا کو ئەو دکەن مرۆڤ دکاریت ھەول بدەت تێ بگەهیت. نە ئەگەر پێناسەیا ڤێ نڤیسینێ و ھەلوەستا بێ ئەخلاقی نەبیت، پێدڤیە شەرمێ ژ خوە بکەن و دەست ژ بازرگانیا سیاسی و بێ ئەخلاقیێ بەردەن. ئەڤ یەک ژ بۆ ھەموو نڤیسکار، ھوونەرمەند و مرۆڤێن ل ھمبەر سیاسەتا پەکەکێ بێ دەنگن دەرباس دبیت.
گەلۆ ئەو شاندا هونەرمەندا ل ھمبەر ڤێ ھەلوەستا پەکەکێ چ دبێژن، بۆچی داخویانیەکێ بەلاڤ ناکەن، ل سەر تەلەڤزیۆنا دەرناکەڤن و ڤێ کرێتیا ئەو ب خوە تێدا شریک شەرمەزار ناکەن؟ لێ ل ڤێ دەرێ کێماسیەکا دی ھەیە کو پێدڤیە بەحس لێ بهێتە کرن، ئەو سیاسەتمەدار و هونەرمەندێن ڤێ یەکێ دکەن پێدڤیە یەکەم جار مرۆڤ و ب تایبەتی لایەنێن وەک پەدەکێ رێکێ نەدەتە وان. پیدڤیە بانگی وان بهێتە کرن و ل ھمبەر کرێتیا دهێتە کرن بێ دەنگیا وان ل روویێ وان بدەن و وان ب خوە ژی تەشھیر بکەن. ل باکورێ کوردستانێ، HDP, PHD û KCDێ د دەربارێ بارزانی دا گەلەک جارا پانکارتێن خراب نڤیساندنە، ئەگەر د دەما خوە دا ھەلوەستەک ب بریار ھەبایە، بەلکی ئیرۆ رێ ل ڤێ کرێتیا پەکەکە دکەت هاتبا گرتن.
گەلەک بالکێشە کو، پەکەکە و مەھەپە ب ھەمان زمانی ئێریشێ بارزانی و پەدەکێ دکەن.
پەکەکە قاتلێ سیاسەتا یەکیتیا کوردستانێ یە، پەکەکە ھەڤالبەندێ دەولەتێن داگیرکەرە ل ھەرێمێ، پەکەکە ناسنامەیا “شەرێ براکوژیەیێ” و پەکەکە تشتا کو دەولەتێن داگیرکەر ب سەدان سالا نەکاری بکەت، ئیرۆ د کەسایەتیا رۆژئاڤایێ کوردستانێ دا ھەول ددەت بکەت. پەکەکە ناڤێ کوردستانێ وەندا دکەت، پەکەکە سەمبۆلا نەتەوی یا کوردا قەدەغە دکەت، ئەگەر ھەتا نھا کورد د ڤێ یەکێ نەگەهشتبن و فام نەکربیت، راستی رەوشا کوردا گەلەکا خرابە.
ھەتا ڤێ گاڤێ چەکدارێن پەکەکێ ل شنگالێ مووچەیێن خوە ژ حەشدا شەعبی وەردگرن و رێ ل حکومەتا ھەرێما کوردستانێ دگرن کو بکەڤیتە شنگالێ دا و ببیتە خوەدان دەستھلات. چەکدارێن پەکەکێ ل شنگالێ ھێزەکە د بن باندۆرا حەشدا شەعبی دا.
پەکەکە کیە و ب چ خەلکەکێ دخاپینیت؟ پیدڤیە ئەڤە بهێتە دیتن. پەکەکە، پەیەدەیە، ھەدەپەیە، ھەسەدەیە، کەنەکەیە، کەجەدەیە، یەپەگە و ھەپەگەیە..ھەلوەستا ل ھمبەر پەکەکێ دڤێت ل ھمبەر ڤان ھەموویا بن. پەکەکە ب ڤان ناڤا لایەنێن سیاسی و کوردا دخاپینیت، لێ دڤێت مرۆڤ ب خوە، خوە نەخاپینیت.
ل ھبەر پرۆپاگاندایێن نە راست و درەوێن پەکەکێ، تو چ بێژی فایدە ناکەت، پیدڤیە مرۆڤ خوەدی ھەلوەست بیت. دبێژن کەسەکێ تف کرە روویێ بەقێ. بەقێ بەرێ خوە دایێ و کرە کەنی و گۆت: ” ئاڤا ڤێ دنیایێ روویێ من تەر ناکەت ما تفا تە دێ روویێ من تەر کەت؟”
22/8/2021
نووچە/ئانالیز/رۆژەڤاکورد
