مەدیایا پەکەکێ د بەلاڤکرنا نووچەیێن درەو دا گەلەکا ژیر و ژێھاتیە، مەدیا گرێدایی پەکەکێ وەک ناڤەندەکا بەلاڤکرنا زانیاریێن نەراست کار دکەت و د ڤێ یەکێ دا ژی گەلەکا سەرکەفتیە.
نھاژی د ANFێ دا نووچەیەک بەلاڤ بوویە و تێدا ئیدعا دکەت کو؛ دەولەتا ترک ل گەل ئەنەکەسێ دخوازیت داگیرکەریێ ل عەفرینێ رەوا بکەت. د ڤێ دەربارێ دا دەستپێکا نووچەیا ANFێ ب ڤی ئاواییە: “پیلانا دەولەتا ترک و ئەنەکەسێ یا ژ بۆ رەواکرنا داگیرکاریێ. ل عەفرینێ 2 مەھێن داوی بوویەرێن رەڤاندنا سڤیلان و خواستنا فیدیەیێ زێدە بوونە. بەشەک ژ کەسێن کو ژ ئالیێ داگیرکەران ڤە ھاتنە رەڤاندن ئەو کورد بوون کو ژ بەر داگیرکەریێ کۆچبەری حەلەب و شەھبایێ بووبوون، لێ پشترا ب پرۆپاگاندایا ئەنەکەسێ ل عەفرینێ ڤەگەریا بوون.”
نووچەیا دەستچێکری ب دەرەوان بەردەوام دکەت و ئەنەکەسێ ب خرابیێن مەزن ئیتیھام دکەت. پەکەکە دەما بخوازیت تشتەکێ بکەت دەستپێکێ د مەدیا خوە دا زەمینەیا وێ ئامادە دکەت. نھا ڤان نووچەیێن درەو کو ئیتھامێن مەزن تێدا هەنە بەلاڤ دکەت و سبە دکاریت ب ناڤێ “ھەڤالبەندیا ترکا” ھندەک ئەندامێن ئەنەکەسێ بگریت و ھەتا وان ژ ناڤ ببەت ژی. ژ بەری نھا ژی ئەڤ یەک کریە و گەلەک بەرپرسێن پەدەکەسێ و ئەنەکەسێ گرتنە و گەلەک ژ وان ھەتا ئیرۆ ژی بێسەرێشوونن. نھا ژی ب دەھان کەس د زندانێن چەکدارێن پەیەدێ دانە.
پەکەکە (پەیەدە) ژ بۆ چ ڤێ یەکێ دکەت؟ دهێتە زانین کو ھەتا وەک ڤێ گاڤێ 3 رێکەفتن د ناڤبەرا ئەنەکەسێ و پەیەدێ دا ھاتنە ئیمزا کرن. رێکەفتنا ھەولێر یەک، ھەولێر دو و رێکەفتنا دھۆک. ئەڤ ھەرسێ رێکەفتنە ژی ژێر چاڤدێریا بارزانی دا ھاتنە ئیمزاکرن. لێ پەیەدە چ جارا پێوستیا ڤان پەیمانا پێکنەئانیە و پێهنەک لێ دایە و خراب کریە. ئەڤ ژ کارەکتەریا پەکەکێ یە، دکاریت ھەر تشتی بکەت لێ دەما نە ب کەیفا وان بیت ب ھێسانی دکاریت بێژیت “تەکتکیە” و ئالیێن دی تاوانبار بکەت.
ھەری داوی بەری دەمەکێ ب چاڤدێریا ئەمریکایێ و ب ھەولدانێن سەرۆکێ ھەرێما کوردستانێ نێچیرڤان بارزانی، فەرماندارێ ھەسەدێ مەزلووم عەبدی داخوویانیێن ئەرێنی ژ بۆ یەکرێزیا د ناڤبەرا ئەنەکەسێ و پەیەدێ دا دان. د ناڤبەرا ھەردو ئالیان دا بن چاڤدێریا ئەمریکایێ دا ھەڤدیتنا دەستپێکرن و گاڤێن ئەرێنی ھاتنە ئاڤێتن. د راستیا خوە دا ھەر چەند پەکەکە و سیاسەتا وێ نە جھێ باوەریێ یە ژی ، لێ ھێڤیەک پەیدا بوو کو دێ یەکرێزیەک هێتە ئاڤاکرن و ل رۆژئاڤایێ کوردستانێ کورد بنە خوەدی ستاتوویەکی. لێ ئەڤ تەڤگەرە ژ بۆ پەکەکێ بۆ مەترسیەک و ھەولدا باندۆرا خوە ل سەر ھەسەدێ زێدە بکەت و ڤان ھەولدانا تێک ببەت. دیارە مەزلووم عەبدی ژی نە ئەو کەسایەتیە کو بکاریت ژ دەرڤەیێ پەکەکێ سیاسەتەکێ ژ بۆ بەرژەوەندیێن نەتەوی یێن کوردێن رۆژئاڤایێ کوردستانێ رێڤە ببەت. روودانا ئەڤ یەک دا نیشاندان.
ھەڤدیتن ھاتنە سەکناندن، چەکدارێن پەیەدێ جاردەکا دی ئەندامێن ئەنەکەسێ گرتن و کرنە زیندانان دا،ھندەک د بن ئیشکەنجەیێ دا کوشتن و چەتەیێن ب ناڤێ جوانێن پەکەکێ جارەکا دی دەست ب سۆتنا ئۆفیسێن پەدەکەسێ کر.
شاندا ئەمریکایێ جاردەکا دی ڤەگەریا دەڤەرێ و ھەولدا کو ھەڤدیتن ژ بۆ یەکرێزیێ جاردەک دی دەستپێ بکەن. پەیەدێ ژ بۆ کو ئاستەنگا پەیدا بکەت دەست ب گرتنێ کر و د مەدیایا خوە دا ئێریشێ ئەنەکەسێ کر.
نھا نایێ زانین کا رەوش دێ چەوابیت. لێ ھەری داوی داخویانیا رەژیما سووریێ د دەربارێ “لامەرکەزییێ” رەوشا پەیەدێ گوھارت و جاردەکا دی ل سەر داخوازیا پەکەکێ بەرێ خوە دا شامێ. د ڤێ دەربارێ دا داخویانیێن بەرپرسێن رێڤەبەریا خوەسەر گەلەک بالکێشن.
نھا دو رێ ل پێشییا پەیەدێ، ھەسەدێ و یەپەگێ مانە یان دێ ب تەمامی لنگێ خوە ل هەڤدیتنا دەن و بەرێ خوە دەنە رەژیما سووریێ و بنە میلیشیایێن رەژمێ وەک دەستپێکێ، یان ژی دێ وەک کوردێن رۆژئاڤایێ کوردستانێ دەست ژ سیاسەتا پەکەکێ بەردەن و یەکرێزیەکی ئاڤا کەن و دا کو رۆژئاڤایێ کوردستانێ ببیتە خوەدی ستاتوویەکێ. وەکی دی چ رێ ل پێشیا وان نەماینە.
ئەگەر د بن باندۆرا پەکەکێ دا تەڤبگەرن دێ بەرێ وان ھەردەم ل شامێ بیت. ئەگەر ژی دەست ژ ڤێ سیاسەتێ بەردەن و وەک کوردێن رۆژئاڤایێ کوردستانێ ژ بۆ دەستکەفتیێن نەتەوی کار بکەن دێ سەرکەفتن ل پێشیا وان بیت.
26/8/2021
نووچە/ئانالیز/رۆژەڤا کورد
