به‌رخوه‌دانا ساخته یا په‌كه‌كێ ل باشوورێ كوردستانێ به‌رده‌وامه، چه‌ند دچیت ئه‌ڤ رێخستن سوپایێ تركیێ پتر كێشی باشوور دكه‌ت، هه‌ری داوی پاش كو په‌كه‌كێ چه‌ندین باره‌گه‌هـ و نوقته‌یێن خوه ل ناڤا گوندێن ده‌ڤه‌را به‌روارییا چێكرین، ئه‌ڤرۆ سپێدێ سوپایێ داگیركه‌ر ئۆپه‌راسیۆنه‌كا نوو دا ده‌ست پێ كرن.
سوپایێ تركیێ ئیرۆ رۆژا چارشه‌مبيێ 1/9/2021ێ دانێ سپێدێ، ئۆپه‌راسیۆنه‌كا نوو ل ده‌ڤه‌را به‌روارییا یا باشوورێ وه‌لات ده‌ستپێكر.
ژێده‌رێن تایبهت یێن پێگه‌ها «داركا مازی» ل باشوورێ كوردستانێ ئاشكرا كرن، ئۆپه‌راسیۆنێ ژ ئالێ گوندێ هرۆرێ ڤى ده‌ستپێكر، پاش كو چه‌كدارێن رێخستنا په‌كه‌كێ نوقته و باره‌گه‌هێن خوه ل ناڤا گوندان چێكری و ژ ناڤا گوندان ب هنده‌ك ته‌قه‌یێن بچووك یێن وه‌ك یاریێن زارۆكان ئیستفزازا سوپایێ تركیێ كری.
په‌كه‌كه دخوازیت ده‌ڤه‌را به‌روارییا ب كو ده‌رێ دا ببه‌ت؟
پێشی گرتنا ل داگیركه‌ران، فه‌داكاری و به‌رخوه‌دان ژ بۆی كوردان رومه‌ته، شه‌ره‌ف و نامووسه و كێفا هه‌ر كورده‌كی ب كوشتنا عه‌سكه‌رێ داگیر كه‌ر دهێت، هه‌ر كورده‌كێ ڤێ وه‌سا نه‌بینیت، بلا ئه‌و گومانێ ژ كوردبوونا خوه بكه‌ت، لێ به‌لێ په‌كه‌كه ب ڤان سلۆگانان دخوازیت گه‌لێ باشوور ب خاپینیت، دخوازیت ژێرا ببێژیت ئه‌ڤه ئه‌زم ل مه‌یدانێ شه‌ری دكه‌م و رێكێ ل فاشیزمێ دگرم، ئه‌ز نه‌بم باشوور نابیت!!.
ئه‌ڤ ده‌ما ساله‌كێ یه، رێخستنا په‌كه‌كێ ب ئاوایه‌كی سیسته‌ماتیك سوپایێ تركیێ كێشی باشوورێ وه‌لات دكه‌ت، تایبهت ده‌ڤه‌را به‌رواری بالا، مه ب چاڤێ سه‌رێ خوه دیت په‌كه‌كێ زنارا كێسته ب چ ئاوایی ب ده‌ردێ حه‌فته‌نینێ بر، گوندێ هرۆرێ و چه‌ندین ناڤچه‌یێن دی كو نها عه‌سكه‌رێ ترك تێدا جهـ گرتییه، په‌كه‌كه ئیدیعایا جه‌نگێ ل دژی تركیێ دكه‌ت، لێ به‌لێ وه‌ختا جه‌نگێ ده‌ستپێكر، جه‌نگاوه‌رێن وێ ل مه‌یدانێ نینن.
د ده‌ما سالا رابووری دا، په‌كه‌كێ د 4 قۆناغان دا ب ده‌هان گوند و ناڤچه‌یێن باشوور بۆ تركیێ هشتن، ئه‌ڤرۆ ژی گه‌را ده‌ڤه‌را به‌روارییا هاتییه، په‌كه‌كه ل سنۆران نه‌مایه و نها د ناڤا گوندان دا خه‌لكێ سڤیل بۆ خوه دكه‌ته مه‌رتال و وان ب كار دئینیت، شه‌رێن بچووك بچووك یێن وه‌ك یاریێن زارۆكان ل دژی سوپایێ تركیێ دكه‌ت و وان شه‌ران وێنه دكه‌ت و دیمه‌نێن وان د مه‌دیایێ دا به‌لاڤ دكه‌ت، ئه‌و ته‌نێ ژ بۆ وێ یه‌كێ یه كو گه‌لێ باشوور پێ ب خاپینیت، لێ یا راست ئه‌و پیلانه و په‌كه‌كه وان شه‌ران دكه‌ت ژ بۆ كو به‌هانه‌یان بده‌ته ده‌ستێ تركیێ كو هێرشی وان گوندان بكه‌ت.
بلا خه‌لكێ ده‌ڤه‌را به‌روارییا د هشیار بن
په‌كه‌كه ئه‌ڤ 41 ساله هاتییه دامه‌زراندن و ئه‌ڤه 37 ساله شه‌رێ چه‌كدارێ دكه‌ت، لێ به‌لێ هه‌تا رۆژا مه یا ئیرۆ ئێك مه‌ترا خاكا كوردستانێ ژ ده‌ستێ داگیركه‌ران رزگار نه‌كرییه
ل داویێ ئه‌م دبێژین: بلا خه‌لكێ باشوورێ كوردستانێ و ب تایبهت یێن ده‌ڤه‌را به‌روارییا هشیار بن و ب سلۆگانێن پووچ و به‌تال یێن رێخستنا په‌كه‌كێ نه‌هێن خاپاندن، په‌كه‌كه ئه‌ڤ 41 ساله هاتییه دامه‌زراندن و ئه‌ڤه 37 ساله شه‌رێ چه‌كدارێ دكه‌ت، لێ به‌لێ هه‌تا رۆژا مه یا ئیرۆ ئێك مه‌ترا خاكا كوردستانێ ژ ده‌ستێ داگیركه‌ران رزگار نه‌كرییه، گوندێن باكورێ كوردستانێ د شه‌رێ بێ واته یێ خه‌نده‌كان دا ل سالا 2015ێ وێران و كاڤل كرن، ئه‌ڤرۆ ژی دخوازیت هه‌مان سیناریۆیێ ل باشوورێ كوردستانێ ب تایبهت ل گوندێن ده‌ڤه‌را به‌رواری بالا جێبه‌جێ بكه‌ت و وان ژی وه‌ك دیاری بده‌ته سوپایێ تركیێ.
