جوانێ كورد ژ ئه‌زه‌ل دا شۆره‌ش گه‌ره، مه‌رد و وه‌لاتپارێزه، ژ بۆی رۆمه‌تا وه‌لات و ڤینا كوردستانێ، جانێ خوه بێ دودلی فه‌دا كرییه، ل همبه‌ر زۆرا داگیركه‌ری ل هه‌ر سال و زه‌مانه‌كێ ل به‌رخوه دایه.
تو من بكوژه، ئه‌زێ براتیێ دگه‌ل ته پێك بینم!!
رێخستنا په‌كه‌كێ ژ دامه‌زراندنێ و هه‌تا رۆژا مه یا ئیرۆ، ئه‌ڤ غیره‌تا جوانێ كورد ژ بۆ خوه ب كار تینه، ب هه‌زاران جوان، كه‌چ ب ناڤێ ڤینا كوردستانێ خاپاندنه و فه‌دایێ ستراته‌جییا رێخستنێ كرنه، ئه‌و ستراته‌جییا ژێر ب ژێر كوردان به‌ر كۆله‌تیێ دبه‌ت، مژارا ڤێ نڤیسێ نه شرۆڤه‌یا ستراته‌جییا په‌كه‌كێ یه، ئه‌م دێ ل ڤێرێ راستییه‌كا بچووك ئێخینه به‌ر چاڤان، چیرۆكا 41 جوان، كه‌چ و زارۆكێن كوردان ئه‌شكه‌ره كه‌ین یێن كو په‌كه‌كێ ژ رۆژا 1/8/2021ێ هه‌تا 7/9/2021ێ ب ده‌ستێ عه‌سكه‌رێ ترك ل چیایێن كوردستانێ داینه كوشتن، ئه‌و عه‌سكه‌رێ حه‌رام یێ كو په‌كه‌كه دخوازیت «براتیێ» دگه‌ل پێك بینیت!.
ئاژانسا ANF یا په‌كه‌كێ رۆژانه یان دو رۆژان جاره‌كێ، وێنه‌یێن هنده‌ك جوانێن كورد به‌لاڤ دكه‌ت و دبێژیت: «ئه‌م شه‌هیدێن خوه، ملیتانێن ئاپۆ، له‌هنگێن رێخستنێ ب رێزداری ل بیر تینین»، هنده‌ك سلۆگان پووچ و به‌تال، هنده‌ك په‌سنێن بێ واته دئیخیته د داخویانییا راگهاندنا شه‌هاده‌تا ڤان جوانان دا و وه‌سا ل خوه دكه‌ت كو ئه‌و ژ بۆی ڤان جوانان عاجز و خه‌مگینه.
ئه‌ڤه وێنه‌یێن 41 جوانێن كوردن، كه‌چ، كوڕ زارۆك د ناڤ دانه، هنده‌ك ژێ ب دووڤ عه‌شقا كوردستانێ كه‌ت بوون، هنده‌ك ژێ په‌كه‌كێ ره‌ڤاندبوون و هنده‌كێن دی رێخستنێ ب ناڤێ ڤینا كوردستانێ خاپاند بوون، لێ به‌لێ په‌كه‌كێ هه‌ر هه‌موو فه‌دایێ ده‌مۆكراتیك كرنا تركیێ و ستراته‌جییا قرێژ یا ئاپۆ یا ب ناڤێ «براتییا گه‌لان» كرن، یا راست چ رێخستن و پارتییان ب قاسی په‌كه‌كێ جوانێن كورد ب ده‌ستێ داگیركه‌ران نه‌داینه كوشتن.
بێ سه‌رۆك ژیان نابه و براتییا حه‌رام!!
هێژای گۆتنێ یه، ئه‌ڤ وێنه ژ ئاژانسا ANFێ یا په‌كه‌كێ هاتینه وه‌رگرتن، ئه‌ڤ 41 جوان ته‌نێ قوربانیێن مه‌ها رابووری نه، ب هه‌زاران میناكێن وه‌سا هه‌نه، په‌كه‌كه به‌رێ جوانێ كورد دده‌ته مرنێ و ژێرا دبێژیت: «بێ سه‌رۆك ژیان نابه»، پاش شه‌هادتێ ژی دهێت و پڕ ب روو قایمی دبێژیت: «ئه‌ڤه ملیتانه‌كێ هێژا یێ ئاپۆ بوو، وه‌ختا ئه‌و زارۆك فه‌لسه‌فا ئاپۆ باندۆر لێ كربوو»!!
ڤینا ڤان 41 جوانان كوردستان بوو، لێ به‌لێ په‌كه‌كێ مه‌ژیكێ وان شووشت و ژ وان را گۆت ده‌ست ژ ڤینا كوردستانێ به‌رده‌ن، دڤێت ڤینا وه ژ بۆی «براتییا گه‌لان» و ده‌مۆكراتیك كرنا تركیێ بیت، رێخستنێ ئه‌وه وه‌كه ب هه‌زاران جوانێن دی یێن كورد فه‌دایێ ڤێ سلۆگانا پووچ و به‌تال كرینه.
ل داویێ ئه‌م دبێژن: بلا جانێ ڤان «41 قوربانیێن براتییا گه‌لان» شاد به و بلا روویێن «گرووپا ئه‌نقه‌رێ» ره‌ش بن.
