ته‌ڤگه‌را تالیبانێ حكوومه‌ته‌كا ده‌مكی راگه‌هاند، 5 وه‌زیرێن گرێدای گرووپا حه‌ققانی تێدا نه كو ژ ئالیێ ئه‌مه‌ریكایێ ڤه داخواز كرینه و ب ملیۆنێن دۆلاران خه‌لات ژ بۆی وان هاتنه ده‌ست نیشان كرن.
وه‌زاره‌تا ده‌رڤه یا ئه‌مه‌یكایێ ئیرۆ پاش چه‌ند ده‌مژمێران ژ راگه‌هاندنا تالیبانێ بۆ حكوومه‌تا نوو، داخویانییه‌ك له‌زگین پارڤه كر و دلگرانییا خوه ژ هلبژارتنا هنده‌ك كه‌سێن د وێ حكوومه‌تێ دا دیار كر.
یێك ژ وان كه‌سێن كو ئه‌مه‌ریكا ژ هلبژارتنا وی عاجزه، سه‌رۆكێ حكوومه‌تا تالیبانێ ب خوه یه كو ب ناڤێ موحه‌مه‌د حه‌سه‌ن یاخونده ناسیاره و د لیستا ره‌شا یا نه‌ته‌وه‌یێن یه‌كبوویی یه دا یه و هه‌روه‌ها یێك ژ سه‌رانێن ره‌ژیما دڕنده یا تالیبانێ یه.
هه‌روه‌ها كه‌سێ دی كو ئه‌مه‌ریكا دلگران كرییه، سیراجه‌ددین حه‌ققانی یه و تالیبانێ پۆستا وه‌زیرێ ناڤخوه د حكوومه‌تا نوو دا پێ سپارتییه، گرووپا حه‌ققانی د لیستا ته‌رۆرا ئه‌مه‌ریكایێ دا یه و ئه‌مه‌ریكایێ 5 ملیۆن دۆلار وه‌كه خه‌لاتا دانا ئاگاهییان ل ده‌ربارا وی ده‌ست نیشان كربوون.
هه‌موه‌ختا سیراجه‌ددین، تالیبانێ 3 كه‌سێن دی ژ گرووپا حه‌ققانی د حكوومه‌تا نوو دا كرینه وه‌زیر و ناڤێن وان ب ڤێ ره‌نگی نه:
خه‌لیل ره‌حمان بۆ وه‌زیرێ كۆچبه‌ریێ، عه‌بدولباقی حه‌ققانی بۆ وه‌زیرێ خوا‌ندنا بلند و نه‌جیبوللا حه‌ققانی بۆ وه‌زیرێ په‌یوه‌ندی و تێكنۆلۆژیایێ.
