پەکەکە ژ بۆ کو “رۆژئاڤا” رادەستی رەژیمێ بکەت رێکێ ل یەکرێزیێ دگریت!

پەکەکە ژ بۆ کو"رۆژئاڤا" رادەستی رەژیمێ بکەت رێکێ ل یەکرێزیێ دگریت!

پشتی دەرکەتنا ئەمەرکایێ ژ ئەفغانستانێ مەترسیێن مەزن چێبوون کو دێ ئەمەریکا ژ باشوور و ژ رۆژئاڤایێ کوردستانێ ژی دەرکەڤیت و ئەڤ یەک ھاتە گۆتوبێژ کرن و د گەلەک جھان دا مناقەشە ل سەر ڤێ یەکێ ھاتە کرن. بێ گومان رەوشا باشوور و رۆژئاڤایێ کوردستانێ گەلەک ژ ھەڤ جودایە. د دەربارێ باشوور دا داخوویانی ھاتن دایین،سەرۆک بارزانی ئاشکەرا کر کو کوردستان نە ئەفغانستانە و کورد ل باشوور خوەدیێن ھێزەکا چەکدارن کو دکارن خاکا خوە بپارێزن.

ھەروەھا ئەمەریکا ژ بۆ بەرژەوەندیێن خوەیێن ھەرێمی ژ ئیراقێ ھەتا رادەیەکێ ڤەکێشیت ژی ژ کوردستانا باشوور زوو ب زوو ڤەناکێشیت. ژ ئالیەکێ دی ڤە باشوورێ کوردستانێ خوەدیێ ستاتوویەکا ناڤدەولەتی یە و د ناڤا دەولەتەکێ دا فەدەرالە و ھەموو دام و دەزگەھێن حکوومی ھەنە و ژ لایێ جیھانێ ڤە دهێتە ناسکرن.

لێ رەوشا رۆژئاڤایێ کوردستانێ گەلەک جودایە. ل گۆر رەوشا سووریا، ئەمەریکا ھەر گاڤەکێ دکاریت ژ سوریێ ڤەکێشیت. گەلۆ دەما ژ سوریێ ڤەکێشیت دێ ژ رۆژئاڤایێ کوردستانێ ژی ڤەکێشیت یان نە؟ ئەڤە پرسیارەکا دییە. لێ ھەتا داعش ھەبیت و شەرێ ل دژێ داعشێ بەردەوام بیت ئەمەریکا ژ سووریا دەرناکەڤیت. ژ لایەکێ دی ڤە ئەمەریکا دخوازیت کو، ل رۆژئاڤایێ کوردستانێ یەکرێزیەک د ناڤا لایەنێن کوردی دا پەیدا ببیت دا کو کێماسی کورد ل سووریا ببنە خوەدیێ ستاتوویەکا ناڤدەولەتی.

نھا ل رۆژئاڤایێ کوردستانێ دەستھلاتا کو ب ناڤێ خوەسەرییێ ھەیی پەکەکە ب خوەیە. پەکەکە د جیھانێ دا وەک رێخستنەکا تەرۆریست دهێتە ناسکرن. ئەڤ یەک ب خوە دبیتە ئاستانگا ھەری مەزن ژ بۆ چێبوونا ستاتویەکا سیاسی ژ بۆ کوردا. ژ خوە د بنگەھێ خوە دا پەکەکە ژی ڤێ یەکێ ناخوازیت ژ بەر کو ل دژێ دەستخستنا ستاتوویەکا کوردستانی یە. ژ خوە نە ناڤێ کوردستانێ ب کار تینیت و نە ژی سەمبۆلەک کوردستانی نەتەوی ب کار تینیت.

ژ لایەکێ دی ڤە ئەگەر یەکرێزیەک پەیدا نەبیت رێیەک تەنێ ل پێشیا پەکەکێ و دەستھلاتا رۆژئاڤایێ کوردستانێ چێکرن دمینیت، ئەو ژی ئەوە کو جارەکا دی ل خوەدیێ خوە ڤەگەرن. یانی بەرێ خوە بدەنە شامێ و ببنە بەشەک ژ میلیشیایێن رەژیما سووریا.

ھەتا کو پەکەکە ل سووریا و رۆژئاڤایێ کوردستانێ بیت، چ وەلات ئێریشێن ترکیا نادنە سەکناندن. دۆھی ل گۆر لھەڤھاتنا ئەمەریایێ ترکیا کەتە ھەرێما سەرێکانیێ و گرێ سپی دا. سبەھی ئەمەریکا رێ بدەت دێ کەڤنە قامشلۆ دا ژی. ژ خوە ووسا دیارە کو ئەڤە ژی ستراتەژیا کوورا پەکەکێ یە. چەواکو ئیرۆ بەرێ ترکیا دانە باشوورێ کوردستانێ و خاکا ئازاد کریە قادا شەرێ خوەیێ قرێژ و ڤێ یەکێ ل گۆرا پرۆژەکا ترکیا ل باشوور جێبەجێ دکەت، دێ ھەمان تشتی ل رۆژئاڤایێ کوردستانێ ژی ئەنجام دەت و ئارمانجا ترکیا یا میساقی- مللی پیک ینیت.

ھەتا ئەڤ راستیا پەکەکێ نەهێتە تێگھاندن تەڤگەرا کورد نکاریت ب چ ئاوایەکێ پێشییا خوە ببینیت و ژ بۆ پاشەرۆژەک سەرکەڤتی خوەدی پرۆژە بیت.

گەلەک جارا گۆتوبێژا سیاسەتا پەکەکێ دهێتە کرن، لێ مخابن ھەلوەستا پێویست ناهێتە نیشاندان. ژ خوە ئەڤ یەکە سەدەمە کو پەکەکێ پێتر بەر ب خەلەتیان ڤە دبەت و ل دژی ھەموو دەستکەفتیێن نەتەوی تەڤدگەریت. گەرەکە رەوشا رۆژئاڤایێ کوردستانێ د ڤێ چارچۆڤەیێ دا بهێتە شرۆڤە کرن.

یەکرێزیا  تەڤگەرا کورد ل رۆژئاڤا یەکەمین رێیە کو کورد ببنە خوەدی ستاتوویەکێ. ژ ڤێ پێڤە چ رێ ل ھمبەر کوردا نینە. ئەمەریکا دخوازیت، فەرەنسا ھەولدانا بکەت کو ئەڤ یەکرێزیە پێک بهێت. لێ پەکەکە رێکێ ل یەکرێزیێ دگریت. نە پەیەدە و نە ژی ھەسەدە ھەتا ڤێ گاڤێ نە د وێ زانەبوونێ دانە یان ژی نە د وێ ھێزبوونێ دانە کو پەکەکێ بدەنە ئالیەکێ ژ بۆ بەرژەوەندیا کوردستانا رۆژئاڤا ببنە خوەدی بریار. ئەمەریکا ڤەکری دبێژیت کو، پەکەکە ژ دەڤەرێ دەرکەڤیت ئەم دێ رێکێ ل ئێریشێن ترکیا گرین. ھەتا رادەیەکی زەمانەتا ڤێ ژی ددەن.

ھەتا پەکەکە ب ڤێ سیاسەتا خوە ل رۆژئاڤا تەڤبگەریت، نە د قادا ناڤدەولەتی دا دهێتە ناسکرن و نە ژی دەستکەفتیەک ژ بۆ کوردا پەیدا دبیت. پەکەکە رۆژئاڤایێ کوردستانێ دینامیکێن کوردستانێ درووخینیت و رامانێن نەتەوی ژ ناڤ دبەت. پەکەکە ل رۆژئاڤایێ کوردستانێ ل ھمبەر دژبەرێن خوە، یانی ل ھمبەر سیاسەتمەدارێن نیشتیمان پەروەر تەرۆرێ ب کار تینیت. بێ سەدەم وان دگرەیت، تێخیتە زیندانا دا، ئیشکەنجێ ل وان دکەت و دکوژیت. چەتەیێن چەکدار ئێریشی ئۆفیسێن ئالیێن ئەنەکەسێ دکەن، دشەوتنن و ئالایێن کوردستانێ بن پێ دکەن.

ئەگەر ھەتا ڤی رادەیی ژی کورد ل رۆژئاڤایێ کوردستانێ راستیا پەکەکێ نەبینن و د بن وێنەیێن ئۆجالان دا ھەول بدەن تشتەکێ دەستڤە بینن، ئەڤە  ژ بۆ وان دبیتە مالخرابیا ھەری مەزن و وێرانکرنا رۆژئاڤایێ کوردستانێ. ھەتا ئەڤ سیاسەت بەردەوام بیت، چارەنووسا عامودێ، دربەسیێ ھەتا رادەیەکی قامشلۆ دێ وەک سەرێکانیێ بیت.

نێرین/ئانالیز/رۆژەڤاکورد

پوستێن ھەمان بەش