مالپەرا یەنی ئۆزگوور پۆلتیکا یا سەر ب پەکەکێ کو ل ئەورۆپایێ وەشانێ دکەت، د نووچەیەکا خوە دا ل ژێر ناڤێ “گەریلا خوەش تۆل هلانی” دا، وێنەیەکێ دو گەریلایان پارڤە کریە کو د دەستێ وان دا چەکا “بی کەی سی” و “کەلاشینکۆف” دهێتە دیتن، لێ یا بالکێش د ڤی وێنەی دا خوەیابوونا هەژمارێن فارسی ل سەر قۆنتاغا BKC یا د دەستێ یەک ژ وان گەریلایان دا یە.
خوەیابوونا هەژمارێن فارسی ل سەر قۆنتاغا BKC یا د دەستێ یەک ژ وان گەریلایان دا، باشترین بەلگەیە کو پەکەکە و ئیران گەلەک نێزیکی هەڤدونە و ب هەڤرا خەباتێ دکەن، ئەڤ یەک د چەندین نڤیسێن مە یێن پێش نها دا ژی هاتیە ڤەگۆتن، لێ نها ب بەلگەیێن کو پەکەکێ ب خوە و د مەدیایا خوە دا پارڤە کرنە، نە ب تەنێ چ شک و گۆمانان ل سەر نڤیسێن رووپەلا مە نامینن، بەلکو دۆپات دبیت کو پەکەکە و ئیران د یەک چەپەر دا جیهـ دگرن.
گەلۆ د بەردێلا پێدانا چەکان، پەکەک چ خزمەتەکێ پێشکێشی ئیرانێ دکەت؟!
وەکە پێش نها مە د هندەک نڤیسێن خوە دا ئێماژە پێ کری، پەکەکە ل باکور لگەل ترکیێ دا، ل باشوور لگەل ئیراقێ دا، ل رۆژئاڤا لگەل سووریێ دا و ل رۆژهلات ژی لگەل ئیرانێ دا د یەک سەنگەردانە، ئەو ب تەماممی بوویە هێزەکا بن دەستێ دەولەتێن داگیرکارێن کوردستانێ و ب تەنێ پەیڤا کوردستانێ ژ بۆی راکێشانا عاتیفەیا گەلێ کورد و ب خوە ڤە گرێدانا گەنجێن کورد ب کار تینیت.
د نها دا پەکەکە پێتر ژ هەر هێزەکا دی نێزیکی ئیرانێ یە. پەکەکە د بەردێلا پاراستنا سنۆرێن ئیرانێ، رێنەدان ب چالاکیێن پارتیێن کوردی یێن رۆژهلاتێ کوردستانێ ل سەر سنۆرێن رۆژهلات، تەڤلیبوونا د ناڤا میلیشیایێن حەشدا شەعبی ل شەنگالێ و پاراستنا “هیلالا شیعی” یا ئیرانی چەک و پارە ژ ئیرانێ وەردگریت و ل گۆر سیاسەتێن ئیرانێ ل ناڤچەیێ تەڤ دگەریت.
پەکەکە ئیدیعا دکەت کو ئەو ل دژی دەولەتێن کۆلۆنیالیستە، لێ بەلێ د راستیێ دا ئەو بوویە دارکێ د دەستێ ڤان دەولەتان دا و ئەڤ دەولەتە پەکەکێ ل دژی تەڤ پارچەیێن کوردستانێ و ب تایبەتی ل دژی ستاتۆیا هەرێما کوردستانێ بکار تینیت. مانا پەکەکێ یا ل شنگالێ ژی د ڤێ چەرچووڤەیێ دا یە، پەکەکە نە ژ بۆی پاراستنا شنگالێ و شنگالیان ژ ئێریش و قرکرنان ل وێ دەرێ مایە، بەلکو ژ بۆی پاراستنا بەرژەوەندیێن ستراتەژی یێن ئیرانێ و وەرگرتنا پارە و دژاتیکرنا حکوومەتا هەرێما کوردستانێ د بن ناڤێ دژاتیکرنا پەدەکێ دا ل شنگالێ مایە.
پەکەکە و شەرێ نەرم یێ ل دژی باشوورێ کوردستانێ
خزمەتەکا دی کو پەکەکە د بەردێلا وەرگرتنا چەک و پارە ژ بۆ ئیرانێ دکەت، برێڤەبرنا شەرێ نەرم یێ ل دژی حکوومەتا هەرێما کوردستانێ یە. پەکەکە ب ئاوایەکێ سیستەماتیک د سۆسیال مەدیایێ دا ب فەرمان و ئیمکانیاتێن ئیرانێ د بن ناڤێ دژاتیکرنا پەدەکێ دژاتیا پارلەمان، حکوومەت و ستاتۆیا فەرمی یا حکوومەتا هەرێما کوردستانێ دکەت. کارێ کو ئیران ب خوە نکاریت ئەنجام بدەت، پەکەکە ژ بۆ وێ ئەنجام ددەت. پەکەکە ب مەدیایا خوە دژاتیەکا توند یا حکوومەتا هەرێما کوردستانێ دکەت و هەول ددەت ووسا ب جوانێن کورد بدەتە فێم کرن کو هەبوون و نەبوونا حکوومەت و ستاتۆیا باشوور وەکو یەکە و ب نەبوونا وێ چ تشتەک نایێتە گوهەرتن.
پەکەکە لایەنگرێن خوە د سۆسیال مەدیایێ دا ب ئاوایەکێ سیستەماتیک ل دژی سەمبۆلێن کوردستانی ب گشتی هان ددەت. رۆژانە ب سەدان نووچەیێن درەو چێدکەت و د ناڤا سۆسیال مەدیایێ دا پارڤە دکەت، باس ل هیچ کارەکێ باش یێ حکوومەتا هەرێمێ ناکەت، لێ بەلێ، ب شەڤ و رۆژ حکوومەتێ رەخنەباران دکەت و وێ بێ نرخ دکەت.
ب ڤێ یەکێ تشتا کو ئیران نکارەیت ب هێزا رەق ل باشوورێ کوردستانێ ئەنجام بدەت، ب رێکا پەکەکێ و ب هێزا نەرم ئەنجام ددە.
