گەلەک جارا دەما بەحسا راستیا پەکەکێ دهێتە کرن د سەری دا ھندەک دەزگەھێن پەکەکێ ڤە گرێدایی و ئاوارەیێن ب ناڤێ پەکەکێ رەوشەنبریێ دکەن خوە عاجز دکەن . باش دهێتە زانین کو ھەموو ئالیێن ل باکورێ کوردستانێ کو نیک دلەکێ سیاسەتەکا یاسایی دکەن و گرێدایی پەکەکێ نە، چ جارا، نە خوەدیێ بریارا خوەیا سەربخوەنە. نە خوەدیێ ئیرادەیەکێنە کو وەک ئەو باس دکەن “دەمۆکراتیک”ن.
ھەدەپە، دەبەپە و کەجەدە وەک پارتی و رێخستنێن سیاسی یێن یاسایی نە، لێ ب پەکەکێ ڤە گرێدایی تەڤدگەرن. تایبەتی ھەدەپە د پارلەمەنتۆیا ترکیا دا خوەدیێ فراکسیۆنەکێ یە و ھەردەم ھەڤسەرۆکێن وان ھەتا کۆمیتەیا ناڤەندی ھەموو ژ ئالیێ ناڤەندەکێ ڤە تێنە دەستنیشان کرن. تشتا کو ھەدەپە دکەت ب تەنێ وەک ئەفسەرەکێ فەرمانا قەندیل و ھندەک ناوەندێن پەکەکێ جێبەجێ دکەت.
ئەڤە دەمەکە ل ترکیا باسی رێکەفتنێن سیاسی دهێتە کرن و رەوش و ھەلوەستا ھەدەپێ دهێتە گۆتوبێژ کرن. ھەموو ئالیێن ھەول ددەن دەنگێ بەشەک ژ کوردا وەربگرن دخوازن ب رێیەکێ ل گەل ھەدەپێ ھەڤکاریەکی بکەن. ئەو ب خوە باش دزانن ھەدەپە ب فەرمانا پەکەکێ تەڤدگەریت و ژ بۆ ڤێ ژی نەوێرن راستە راست ل گەل ھەدەپێ د رێکەفتنەکێ دا جھ بگرن. میناکا ڤێ یا ھەری بەرچاڤ د ھلبژارتنێن شارەداریا دا خویاکر.
جەهەپێ ل گەل ھەدەپێ ل ھەڤکر کو ل باژارێن ترکیا ھەدەپە پشتگریا کاندیدێن جەهەپێ بکەت. ل ھەمبەر ڤێ جەهەپێ ھندەک ئەندامێن مەجلسا شارەداریا دانە ھەدەپێ. لێ چ جارا ئاشکەرا نەکرن کو ل گەل ھەدەپێ رێکەفتنەک ئەنجامدایە. نھا ژ بەری ھەلبژارتنێن پارلەمەنتۆیێ دهێتە دیتن نێزنکبوونەک د ناڤبەرا جەهەپێ و ھەدەپێ دا دهێتە ھوناندن، لێ ئیحتیمالا کو ئاکەپە ژی بەرێ خوە بدەتە ھەدەپێ ل ھۆلێ ھەیە. ئاکەپە ژ نھا ڤە ئیمرالیێ ژ بۆ ڤێ یەکێ ئامادە دکەت.
تەمەلی د تویتەرێ دا راگھاند و گۆت: “موخاتەبا چارەسەریا پرسا کوردان ب تەنێ نە ھەدەپەیە. لێ ژ بۆ هێسانکرنا چارەسەریا ڤێ پرسێ لایەنێ زەمینەیا دەمۆکراتیک ئامادە کری ھەدەپەیە. لێ دڤێت نەهێتە ژ بیرکرن کو، ناڤ و نیشانا چارەسەریا دەمۆکراتیک و موخاتابا بنگەھین ئیمرالیە.”
دەولەت و کەسێن د ناڤا ھەدەپێ دا سیاسەتا دەولەتێ یا کەمالیست یانی “چەپێن نەتەوی” د ناڤا ھەدەپێ دا ئیمرالیێ وەک موخاتابا یەکەمین یا “چارەسەرکرنا دەمۆکراتکا پرسا کوردا” ددەنە نیشاندان. باش دهێتە زانین کو چارەسەریا دەمۆکراتکا پرسا کوردان ل باکورێ کوردستانێ، تەنێ رادەستکرنا کوردستانێ ژ بۆ ترکیایە. واتە ب ترک کرنا کوردایە و ژ ھۆلێ راکرنا داخوازیێن کوردان یێن نەتەوی یە.
تەمەلی راستیا رۆلێ ھەدەپێ داتینە ھۆلێ، ھەدەپە تەنێ فیگورەکە کو رۆلا پەکەکێ د رۆژەڤا سیاسەتێ دا دگێریت. ژ خوە ھەدەپە ل گەل ھەڤسەرۆکێن خوەیێن دەمەکی ھەموویان کامپانیەکێ دا ئیارادا خوە رادەستی ئۆجالان کرنە. باشە کەسێن کو بێ ئیرادە بن دێ چەوە کارن ببنە خوەدی بریارەکا سەربخوە؟
نھا د ناڤا ھەدەپێ دا ھندەک پرس جارا یەکەمە کو تێنە گۆتوبێژ کرن. لێ ئەوێن کو ھەولددەن د ناڤا ھەدەپێ دا کوردایەتیێ بکەن، چ پێشەرۆژا وان د ناڤا ھەدەپێ دا نینە. د جھ دا تێنە تەسفیەکرن.
ھەدەپە د راستیا خوە دا رۆلێ خوە یێ پێوست دگێریت. بلا کەسەک ژ بیر نەکەت کو، ھەدەپە پرۆژەیا دەولەتێ و ئۆجالان بوو، ژ بۆ چارەسەریا “پێڤاژۆیا ئاشتیێ”.
