داخویانیا کەجەکێ و راستیا سلێمانیێ

داخویانیا کەجەکێ و راستیا سلێمانیێ

پشتی کو کادرێ پەکەکێ شوکری سەرھاد، ھاتیە ھنگافتن، پەکەکە و کەجەکێ ھەر یەکێ داخویانیەک دان و خواستن کوژەر بێنە دیتن. وان ئەڤ بوویەرە وەکی بەشەک ژ قرکرنا کوردان نرخاند.

د داخویانیا کەجەکێ دا، “ئەگەر کوردەک، ئەندامەکێ پەکەکێ یان ژی ئالیگرەکێ وان بهێتە کوشتن، دڤێت ڤەکری لێ خوەدان دەرکەڤن.” لێ تشتەکێ کو پەکەکێ ژ بیر کری ھەبوو. بەرییا شوکری سەرھاد، پەکەکێ دو پەشمەرگە ل دەڤەرا دینارتێ یا ناڤچەیا ئاکرێ شەھید کرن. پەکەکێ و چاپەمەنیا وێ ئەڤ بوویەرە ب خەلەتی ڤە ژی نەدیت. یا کو دڤێت کورد ب راستی ببینن ئەڤەیە، یا کو پەکەکە ب خوە دکەت کورد کوژییە.

پەکەکە گرنگیێ ب مرنا وی کوردی ددەت کو ژ بۆی وێ ببیتە مژارا پرۆپاگاندەیێ. کوشتنا کوردێن کو فایدە ناگەهیننە پەکەکێ وان ئەلاقەدار ناکەت. ب راستی، ئەم دزانین کو پەکەکە ژ بۆ خوە وەکە ماف دبینیت کو ھەر کەسێ کو ژ بۆ وان کار نەکەت ئەو بکوژن. پەکەکە ترکان ناکوژیت، فارسا ناکوژیت. لێ ئەو د کوشتنا کوردان دا قەت دودل نابیت. ھەکە ئەو کورد زیانێ نەگەهینتە پەکەکێ ژی، تەنێ هاریکاریا وان نەکەت ژی، پەکەکە دکاریت وی بکوژیت. میناک، کەسەکێ مینا چیا، غازی سالح ئالیخان، پێشمەرگەیەکێ دێرین بوو و 30 سالان ژ بۆ نەتەوەیا کورد خەبات کر بوو، ئەو خۆرت بوو، وی کەڤرەک ژی نەهاڤێتبوو پەکەکێ. لێ پەکەکێ تەنێ ژ بۆ کو ل ھەرێما بەھدینان ترسێ بۆ مرۆڤان چێکەن ئەو کوشت. ژیانا مرۆڤان ژ بۆ پەکەکێ تشتێ ھەری ئەرزان و بێ قیمەتە. ژ بۆ پەکەکێ ژیانا شوکری سەرھاد چ قیمەتا خوە نینە. تەنێ ژ بۆ پرۆپاگاندایا خوە، پەکەکە ل وی خوەدی دەردکەڤیت.

کەجەکە دبێژیتە گەلێ کورد، “ل وان کادرێن پەکەکێ یێن ھاتینە کوشتن خوەدی دەرکەڤن، حەسابێ ژێ بپرسن”. ئەو راست دبێژیت. دڤێت گەل کادرێن پەکەکێ بپارێزن. میناک، دڤێت ئەو ژ حەسابا حەقی قەرارێ کو ژ ئالیێ پەکەکێ ڤە ھاتیە کوشتن بپرسن. دڤێت حەسابا مەعسوون کۆرکماز، ژ پەکەکێ بهێتە پرسین. دڤێت حەسابا ساری براھیم (رەمەزان تۆپتاش)ێ کو ژ لایێ پەکەکێ ڤە ھاتیە کوشتن بپرسن. دیسا دڤێت حەسابا ناسر (فاروق بۆزکورت) ژ پەکەکێ بهێتە پرسین. دڤێت ل حەسابا وان زارۆکێن کوردان یێن ژ لایێ پەکەکێ ڤە ھاتینە کوشتن بهێتە پرسین.

پەکەکە بانگ ل سلێمانیێ دکەت کو ل زارۆکێن خوە خوەدی دەرکەڤیت. دهێتە بیرا پەکەکێ کو د 11ێ شوباتا 2006ێ دا کانی یلماز (فەیسەل دونلایجی)  چاوا ل سلێمانیێ شەھید کربوو؟

کانی یلماز، مینا شوکری سەرھاد، کەسەک بوو کو پشتی کۆدەتایا لەشکەری یا 12ێ ئەیلوولێ ل زینادانا ئامەدێ ھاتبوو ئیشکەنجەدان. کانی یلماز کەسەک بوو کو ل ئەورۆپایێ وەکە بەردەڤکێ پەکەکێ وەزیفەیێن گەلەک گرینگ مەشاند بوون. ئەو ژ پەکەکێ ڤەقەتییا. وی د گۆت ئەز خەتا عەڤدلا ئۆجەلان یا زیندانێ ناپەژرینم. پەکەکێ ترۆمبێلا وی بۆمبە کر و ئەو کوشت. ئانکو، بیرئانینێن پەکەکێ یێن کوژەرییێ ژی ل  سلێمانیێ گەلەکن. بێ گومان، ئەگەر گەلێ سلێمانیێ ل ھەمبەر جینایەتێن ل باژارێ وان ھاتنە کرن ببیتە خوەدی ھەلوەست، دڤێت ل دژی جینایەتێن پەکەکێ ئەنجامدای ژی، ببیتە خوەدی ھەلوەست. ھێزا کو سلێمانییێ تەڤلیھەڤ دکەت پەکەکە بخوەیە. ژ سالا 2014ێ و هێرڤە پەکەکێ میتا ترک ب جڤاکا سلێمانیێ دا ناسین. ھەموو سیخورێن میتێ یێن ل سلێمانیێ یان کادرێن پەکەکێ نە، یان ژی لایەنگرێن وێ نە. ل سلێمانیێ ئەو جھێن پەکەکەیی دچنێ خوارنگەھ، کافە، ناڤەندێن کارسازیێ و نڤیسگەھ ھەموو ژ ئالیێ ئەندامێن میتێ ڤە تێنە برێڤەبرن. پرانیا ڤان کەسان ژی ئالیگرێن پەکەکێ نە و وەک وەلاتپارێز تێنە ناسین. ژ بۆ پرانیا ڤان کەسان پەکەکە ئیقامێ د دەتە چێکرن. نھا مەترسییا ھەری مەزن ژ بۆ ھەرێما کوردستانێ و سلێمانیێ رێخستنا پەکەکێ یە. پەکەکە نوونەرا حەشدا شەعبی و ئیرانێ یە ل ھەرێما کوردستانێ. پەکەکە دخوازیت ستاتوویا ھەرێما کوردستانێ ژناڤ ببەت. پەکەکە نە لایەنگرا ھەولێرێ یە. پەکەکە ل ھەولێرێ هەر وەکە نوونەرا بەغدایێ بیت کور دکەت و پشتەڤانییا بەغدا دکەت.

پەکەکێ هندی دەولەتێن داگیرکەر زارۆکێن کورد کوشتنە. د ڤان 11 مەھان دا ل باشوورێ کوردستانێ 12 پێشمەرگە شەھید کرنە. وان ب دەھان زارۆک سێوی هێلانە. ئەو نھا ب گێرانا رۆلێ مەخدوورییێ نکاریت بێژیت “ئەم دێ کوردان ژ قرکرنێ رزگار کەین”. پەکەکە، مینا شوورەکێ یە د دەستێ ھێزێن کو دخوازن کوردان قر بکەن، و ل سەر ھەرێما کوردستانێ و سلێمانیێ تێتە ھەژاندن. ئەڤ خییانەتا پەکەکێ ب رۆلگێرانا مەخدوورییێ ناھێتە ڤەشارتن.

پەکەکە دبێژیت کو “گەر ل ڤێ دنیایێ وژدانەک مابیت، دڤێت کوژەر ل سەر کورسیکێ بەرتەوانیێ بهێنە روونشتاندن”. ئەرێ، ئەو ژی راستە. کوژەر دێ ل سەر کورسیکێ بەرتەوانیێ هێنە روونشتن، و خوینا کەسێن کو ھاتنە کوشتن ژی ل ئەردێ نامینیت. لێ راستییا ھەرە مسۆگەر ئەوە کو ھەگەر کورد بخوازن حەسابا زارۆکێن خوە ژ وان کوژەران بپرسن، دڤێت د دەسپێکێ دا پەکەکە وەکە تاوانبار ل سەر کورسیکا بەرتەوانییێ بهێتە روونشتاندن.

پوستێن ھەمان بەش