وەزیرێ کارێن دەرڤەیێ سووریێ فەیسەل مقداد دیار دکەت، وەلاتێ وی بانگ ل ترکیا دکەت کو دەملدەست ھێزێن خوە ژ ناڤ ئاخا پارێزگەھێن باکورێ سووریێ ڤەکشینیت.
د ھەڤپەیڤینەکێ دا لگەل ئاژانسا “نۆڤۆست”یا رووسی، وەزیرێ کارێن دەرڤەیێ سووریێ فەیسەل مقداد دا زانین: “دڤێت ترکیا ھێزێن خوە دەملدەست ڤەکشینیت. دڤێت جڤاکا ناڤدەولەتی ژی پشتەڤانیا سووریێ بکەت، ژ بۆ کو ئاخا خوەیا ل باکورێ وەلات ھاتیە داگیرکرن رزگار بکەت.”
مقداد ئاشکەرا کر، سەدەما سەرەکی یا ئالۆزیا ڤێ داویێ ل پارێزگەھا ئدلبێ، “داگیرکەریا ترکیا و پشتەڤانیکرنا وێ ژ کۆمێن تەرۆریسە.”
ژ بلی ھەبوونا ھێزێن ترکیا ل پارێزگەھا ئدلبێ، ئارتێشا ترکیێ و کۆمێن چەکدارێن سەر ب وێ ڤە د مەھا چلەیا 2018ێ دا ئێریشی سەر ھەرێما عەفرینێ کر و د جۆتمەھا 2019ێ دا ژی ئێریشی سەر ھەرێمێن گرێ سپی و سەرێ کانیێ کرن و داگیر کرن.
ئەڤ یەک د دەمەکێ دایە، نوونەرێ تایبەتێ نەتەوێن یەکگرتی ژ بۆ سووریێ گەیر پەدەرسەن د تەباخا بۆری دا دیار کر، رەوشا ئەولەھیێ تێک چوویە و شەرێ چەکداری ل ھندەک دەڤەرێن سووریێ، ب تایبەت ل پارێزگەھا ئدلبێ گور بوویە.
