پشتی گۆتنێن ئەردۆگان، ئەمەریکایێ ژ بۆ سزایێن نوو ھشیاری دا ترکیێ

پشتی کو سەرۆک کۆمارێ ترکیا رەجەب تەییب ئەردۆگان د ھەڤپەیڤینەکێ دا لگەل کەنالێ CBS دا دەربارێ بەردەوامکرنا کرینا سیستەمێن پاراستنا ئاسمانی یا ب ناڤێ S-400 یێن رووسی دا داخویانی دا، ژ بەرپرسێن ئەمەریکی ھشیارەکا دی یا دۆرپێچان بۆ ترکیا ھاتە دایین.

بەردەڤکێ وەزارەتا دەرڤە یا ئەمەریکایێ ل سەر نیەتا ئەردۆگان یا کرینا بەشەکێ دی ژ S-400 ژ رووسیایێ ھشیاریا سزایێن نوو دا و گۆت: “ئەم ب زەلالی دبێژینە ترکیێ، کرینا چەکێن نوویێن رووسیا دێ وەکت کو سزایێن CAATSA (یاسایا تێکۆشینا ل دژی دژبەرێن ئەمەریکایێ یا 2017ێ) بێتە سەپاندن.”

ھەروھا وی بەرپرسێ ئەمەریکی بانگ ل ترکیا کر کو مۆشەکێن S-400 ل جەم خوە نەھێلیت و پێدڤیێن لەشکەری یێن دی ژ رووسیایێ نەکریت.