شاندەکێ ھەدەپێ ب سەرۆکاتیا مەرال دانش بەشتاش سەرۆکا فراکسیۆنا ھەدەپێ د پەرلەمەنتۆیا ترکیا و مەحمود تۆگرول سەردانا سلێمانیێ کر.
شاندا ھەدەپێ ل گەل تەڤگەرا گۆران و یەنەکێ ھەڤدیتن پێکانین.سەرۆکا شاندا ھەدەپێ دا خوویاکرن کو ئەو ژ بۆ ھلبژارتنێن ئیراقێ پشگریا ھەڤپەیمانیا یەنەکێ و گۆران دکەن و ژ بۆ یەکتا کوردا ل سلێمانیێ نە.
رایا گشتی باش دزانیت کو سەردانێن ھەدەپێ یێن باشوورێ کوردستانێ چ جارا نە ژ تەنێ بۆ ھندەک ھەڤدیتنێن ئالیێن سیاسی یێن باشوورێ کوردستانێ نە. ھەروەھا پشتی راگھاندنا بەیاننامەیا ھەدەپێ ل ترکیا سەردانا ڤێ شاندێ بالکێشە. ژ بەر کو پرانیا شاندێن ھەدەپێ دەما سەردانا باشوورێ کوردستانێ دکەن رۆلێ قاسدی دگێرن.
ژ ئالیەکێ دی ڤە د ڤێ دەما کو ئاوایێ چارەسەریا پرسا کوردا ل ترکیا دهێتە گۆتوبێژ کرن دیار دبیت کو ڤەکری د ناڤا ھندەک کاراکتەرێن ھەدەپێ دا دیتنێن جودا ھەنە. ئۆجالان ژ رۆژا ئەول دا گۆتیە کو ئەڤ پرس د پارلەمەنتۆیا ترکیا دا دهێتە چارەسەر کرن. نھا دەمیرتاش جودا داخوویانیا ددەت و ب ئیسرار دبێژیت ئەم پارتیەکا ترکیانە و وەک ھەموو پرسگرێکا ئەم چارەسەرکرنا پرسا کورد ژی د پەرلەمەنتۆیێ دا دبینن و موخاتاب ھەدەپەیە. لێ ئالیێن دی و پرانی دبێژن کو خوەدیێ بریارێ ئیمرالیە. دەمیرتاش د ھەر فرسەتەکێ دا پەسنا ئۆجالان ددەت لێ ئیمرالیێ موخاتاب نابینیت. ئەڤە ژ ھەلوەستا وی یا ل دژێ ئاکەپێ دەردکەڤیتە پێش.
گەلەک ئاشکەرایە کو قەندیل گوھ نادەتە ئیمرالیێ، د ئەسلێ خوە دا دەمیرتاش پێتر نێزیکی قەندیل دیتنا رادگەھینیت. ھەروەھا دیارە کو دەمیرتاش دخوازیت ب پشتگریا قەندیل رۆلێ ئۆجالان بگێرەیت. ئەڤە پرسگرێکا د ناڤا ھەدەپێ دایە. لێ ھەتا ڤێ گاڤێ جھێ بریارێ قەندیلە. دیارە سەدەما بنگەھین یا سەردانا شاندا ھەدەپێ یا باشوورێ کوردستانێ ھەڤدیتنێن ل گەل قەندیلن و پرسگرێکێن کو رووداین زانەبوونا ھەلوەستا قەندیلێ د دەستێ یەکەم دایە.
ل ترکیا ھەتا گاڤا داوی ئەردۆگان دکاریت کارتا ئیمرالیێ بکار بینیت. ئۆپۆزسیۆنا ترکیا ڤێ ھەلوەستا ئەردۆگان دزانیت و دخوازیت ژ نھا ڤە ھەدەپێ بدەتە پێش و رۆلێ ئیمرالیێ کێم بکەت. ژ بەر کو ئۆپۆزسیۆن د ھلبژارتنێن شارەداریا دا ھەلوەستا ھەدەپێ د پشتگریا وان دا وەک کێمبینا رۆلێ ئۆجالان دنرخینیت.
ھەر جار سەردانێن شاندێن ھەدەپێ ل باشوورێ کوردستانێ هەم د مەدیا پەکەکێ دا هەم د مەدیا ترکیا دا گەلەک دھاتنە نرخاندن. لێ ڤێ جارێ ھەردو ئالی ژی بێدەنگبوون. دێ د رۆژێن پێشیا مە دا سەدەمێ سەردانا شاندا ھەدەپێ پێتر هێتە زانین. بەرێ خوە بدەنێ د چەند رۆژێن ل پێشییا مە دا دێ داخوویانیێن ھەدەپێ دا سەدەمێ بنگەھین یێ سەردانا سلێمانیێ دیار ببن.
29/9/2021
نێرین/شرۆڤە/رۆژەڤاکورد
