د رۆژێن بووری دا، ب بانگا ئەنەکەسێ، خەلکی ل قامشلۆ خوەپێشاندانەک ل ھەمبەر زێدە بوونا باجێ، بھایێ نان و مازۆتێ ل دار خست. خوەپێشاندان د بنگەھ دا خوەپێشاندانەکا بچووک بوو. ب گشتی، ل ئیران و ترکیێ ژی، کو وەلاتێن ھەری فاشیستێن رۆژھلاتا ناڤینن، گەر ھوون خوەپێشاندانەکا وەھا ل دار بێخن، دەولەت دێ پاشگوھ کەت و ناخوازیت ببینیت. یا کو ئەو ھەرێ زێدە بکەت ئەڤەیە کو بێژیتە کانالێن خوەیێن راگاھاندنی” نووچەیێن وێ خوەپێشاندانێ چێنەکەن”. بلا کەس نەبهیزیت و نەبینیت.
لێ بەلێ، ل سەر بانگا ئەنەکەسێ ئەو “مەشا نانی” ووسا بێدەنگ برێڤە نەچوو. مەش کەتە بەر غەزەبا پەیەدێ. پەیەدێ یەکسەر ل سەر ناڤێ خوە ئێریش نەکر. ب راستی، نە پەیەدە بوو کو دخواست ئێریشی سەر مەشێ بکەت. ھێزا ئێریشکار راستە راست پەکەکە ب خوە بوو. لێ کەس ناخوازیت ناڤێ خوە د بوویەران دا بکار بینیت. پەکەکە ل رۆژئاڤا ناڤێ پەیەدێ-یەپەگێ بکار تینیت. ئەو ژ بۆ کو د قادا سیاسەتێ دا خوە نەئێخنە تەنگاسیێ، رێخستنا ب ناڤێ جوانێن شۆرەشگەر بکار تینن. ب راستی، جوانێن شۆرەشگەر رێخستنەکا کوژەرە. ب ئیشارەتەکا پەکەکێ، ئەڤ رێخستنە دکوژیت، لێ ددەت و دسۆژینیت. د وانا دا نە ھەست و نە ژی وەلاتپارێزی نینە، تەنێ مەبەست ئەوە کو پەکەکە چ دبێژیت ئەو بێ تەفکیر و ھزر پێک تینن. ب شێوازێن مافیاواری تەڤدگەریت. ئەم ڤێ یەکێ وەکی کەچەپا ل سەر پەکەکێ ھاتیە وەرکرن دزانین.
گرسەیەکا وان یا ئامادە ژی ھەیە گاڤا کو دبێژن “دەرکەڤنە کۆلانان”، ئەو دەردکەڤن. کەڤرێن وان، کێرێن وان و ھەموو ئاموورێن وانا یێن خەرابکرنێ ل سەر پەکەکێ نە. دەما دبێژنە وان ئێرشێ بکەن ئەو چەپ و راست ئێریشێ دکەن. ئەو ناپرسن کا وان ئێریشی چ کریە و ئەو ناپرسن بۆچی ئێرشێ دکەن. مینا رۆبۆتەکێ، گاڤا کو ئیشارەت پێ دهێتە دایین ئەو حەرەکەتێ دکەن. ھندەک ژ وان ب زانابوون ڤان ئێرشان د بەرژەوەندیێن خوە دا دبینن لەوما ژی بەشدار دبن. ئەو حەساب دکەن کا ئەو دێ ژ کریارێن کو بەشدار دبن چ مفا وەرگرن. یێن دی ب ھەستێن موریدییێ سەرخۆش بوونە، کۆرە بوونە، بێ ھەست بوونە ئەو نکارن راستییێ ببینن. پەکەکە ل بن ناڤێ ڤانا خوە ڤەدشێریت. پەکەکە ب تێگەهێن وەکی گەل، جوان، ژن، گەریلا، شەرڤان، ئازادی و وەلاتپارێزی ڤێ گرسەیێ پیرۆز دبینیت. پەکەکە دبێژیت گەر ھوون پەکەکێ رەخنە بکەن، ب وێ رامانێ دهێت کو ھوون خوەدێ رەخنە دکەن، گەل ناھێتە رەخنە کرن، ھوون نکارن گەریلا رەخنە بکەن.
پەکەکە ڤانا وەک ھێزەکا تەھدیدێ یا مەزن بکار تینیت. رەوشەنبیر، ھونەرمەند و جورەک مرۆڤێن ژ ڤێ ھێزا تاری دترسن و بێ ھەلوەست دمینن.
گەر ھەبوونا گرسەیێ حیزبەکێ و سیاسەتا وێ مووقەددەس بکەت، وی دەمی ئاکەپە ژ پەکەکێ پیرۆزترە. ژ بەر کو گرسەیا ئاکەپێ ژ یا پەکەکێ زێدەترە. ھەیا ئاکەپێ گرسەیەکا ووسا ھەبوو کو جارەکێ، پیرەژنەکێ ژ بۆ میکرۆفۆنا کو ژ بۆ بەر دەڤێ وێ ھاتە درێژکرن گۆت، “ئەز موویێ دەرێ ق… ئەردۆگانم”. د 17ێ تیرمەھێ دا، ئەو جوانێن ب پارە گرێدایی ئەردۆگان ئێرشی مرۆڤێن سڤیل دکر و ئەو سەرژێ دکرن. دەما کو ئەردۆگان ژ سەدی 48ێ دەنگان دەست خۆ ڤە دئینان، وی گەف ل ئۆپۆزسیۆنێ دکرن و د گۆت ئەز دکارم کو ژ سەدێ 50یێ خەلکی دەرخینم کۆلانان.
فاشیستەک ھەبوو کو ل باژارێ ئزمیرێ کەچەکا کوردا ب ناڤێ دەنیز پۆیراز د ناڤا رۆژێ قەتلکر؛ ناڤێ وی ئۆنور گەنچەر بوو، ئەو 27 سالی بوو. دەما ھاتە گرتن ئەڤە گۆت؟ “ژ بەر کو ئەز نەفرەت ژ رێخستنا تەرۆریستی یا پەکەکێ دکەم من دخواست ئەز تشتەکێ وەھا بکەم.” دەولەتێ نەخواست بوویەرێ ببینیت. ھرانت دنک ھاتە کوشتن. دەولەتا ترک کوژەرێ وی ئۆگووون ساماست مینا قەهرەمانەکێ نەتەوی پێشوازی کر و وێنە ل گەل وی دگرتن. دەولەت ل ڤان جوانان خوەدی دەرکەت، یەک ژ وان حەساب نەدا. رێخستنا پەکەکێ یا ب ناڤێ جوانێن شۆرەشگەر ژی مینا ڤان ھێزایە. پەکەکە وان دپارێزیت و نەھێلیت چ ھێزێن ئەولەهیی ژی نێزی ڤان کوژەران ببن. مینا دەولەتا ترک پەکەکە ژی کوژەرێن خوە دپارێزیت.
گەر ئەو مرۆڤێن نۆرمالن و یا کو ئەو دکەن قانوونی بیت، وی دەمی بۆچی ئەو روویێن خوە دپێچن؟
گەر تشتێ کو ئەو دکەن خەلەت بیت، وی دەمی بۆچی ئەو نایێن گرتن؟
ئەو مۆلۆتۆفان تاڤێژن دەزگەھێن چاپەمەنیێ و ئەو ئێریشی خوەپێشاندەرا دکەن. ئەڤ جورە بوویەر ل رۆژئاڤا ژ سالا 2012ێ هێر ڤە دقەومن، مرۆڤا دکوژن، ئێریشێ دکەنە سەر مالان، مرۆڤا ژ مالێن وان دەرتێخن و وانا ئیشکەنجە دکەن. لێ رۆژەکێ ژی ئەڤ “جوانە” نە ھاتنە گرتن و دادگەھ کرن.
چەتەیێن جوانێن شۆرەشگەر یێن سەر ب پەکەکێ ڤە، ل قامشلۆیێ راست و چەپ ئێریش کرە سەر گەلێ کورد و بێرێزی ل ئالایێ رەنگین کرن. جوانێن پەکەکێ و جوانێن چەتەیێن فاشیستێن دەولەتا ترک بەرھەمێن ھەمان زیھنیەتێ نە. ئەو ژ ھەڤدو جودا نینە. “ئوولکوو ئۆجاکلار”یێن ترکان و جوانێن شۆرەشگەرێن پەکەکێ خوەدی یەک سیستەم، تێگەھ و ئارمانجێ نە. پەکەکە کاریکاتوورا دەولەتا ترکایە.
بەشەک ژ رەوشەنبیر و نڤیسکاران شیرەتان ل پەیەدێ دکەن و دبێژن، “ئەڤ چەندە دێ وێنەیێ وە ل دەرڤە خەراب کەت، ئەڤ چەندە دێ بۆ هەوە د وارێ دیپلۆماتیک دا نەباش بیت.” یانی ئەو دبێژن بلا پەیەدە ب دزی ڤە کوردان بکوژیت، بلا کەسێ بەرچاڤ نەکوژیت. ل ئالیێ دی دا، ھندەک کەسێن کو دخوازن ببێژن، “ھێژ شەرت و مەرجێن شەری ھەنە، رێڤەبەریا خوەسەر ھێژان ب فەرمی سازی نەبوویە، ئەڤە بوویەرەکا لۆکالە” ب ڤی شێوازی ڤێ تەرۆرا کۆلانان د خوازن نەرم بکەن. ئەڤ دەردۆر ئەون، یێن کو ب دووربینێ د ناڤا حکوومەتا ھەرێما کوردستانێ ل ڤالاھیەکا دەمۆکراسیێ دگەرن، ژ بۆ کو وەلوەلەکێ ل سەر باشوور دەربێخن. لێ ئەو دەستوەردانێن کو ئیران، ترکیا و حەشدا شەعبی و پەکەکە ھەر رۆژ ل سەر ھەرێما کوردستانێ دکەن نابینن. گەر ل کوردستانێ پشتی ڤێ کۆما فاشیست و ئێریشکارا پەکەکێ یا ب ناڤێ جوانێن شۆرەشگەر مەترسیەکا دی ھەبیت، ئەو کەسن یێن کو خوە وەکی رەوشەنبیر ددەنە ناسین، تەڤی کو راستیێ دبینن ژی، ژ بەر فکارێن خوەیێن سیاسی خوە کەر، لال و کۆرە دیار دکەن.
ژ بۆ راستییێ ھێڤییێن کوردا یێن مەزن گەلەک بێ واتە نە. پەکەکە نە تەڤگەرەکا کوردستانی یە، پراکتیکا وێ نیشان ددەت کو ئەو نە دەمۆکراتیکە ژی. وی دەمی پەکەکە تەڤگەرەکا چاوایە؟
ب کوورتاسی؛ “روویێ پەکەکێ یێ راست، کو خوە وەکو تەڤگەرا ھەری دەمۆکراتیکا جیھانی، کو دەمۆکراسیێ فێری ھەموو جیھانێ دکەت، چارەسەریان چێدکەت و ئیدیعا دکەت کو سەرۆکێ وان رێبەرێ گەلێن جیھانێ یە و ھتد… روویێ وێ بوویەرێن قامشلۆ نە. “
