رێخستنا په‌كه‌كێ د 33 رۆژێن رابووری دا، ژ ده‌ست دانا 42 چه‌كدارێن خوه راگه‌هاند، پرانی ژێ ل باشوورێ كوردستانێ، ب ده‌ستێ عه‌سكه‌رێ ترك دانه كوشتن.
ئاژانسا ANF یا په‌كه‌كێ، ئیرۆ رۆژا یه‌كشه‌مبی 3/10/2021، بۆ جارا دویه‌مین ناسنامه‌یا 6 گه‌ریلایان راگه‌هاندییه و گۆتییه كو ئه‌ڤ 6 گه‌ریلا د كه‌مینه‌كا په‌ده‌كێ دا ل 28 ته‌باخا 2021ێ ل سه‌ر رووبارێ زێی هاتنه قه‌تل كرن!.
رێخستنا په‌كه‌كێ ژ بۆ چێكرنا توهمه‌ته‌كێ بۆ په‌ده‌كێ، دكاره هه‌ر تشته‌كێ بێئه‌خلاق بكه، هه‌گه‌ر پێویست ژی بیت ژ بۆ كو رێخستن بگه‌هیته ئارمانجا خوه و رۆژه‌ڤێ ل دژی په‌ده‌كێ بئازرینیت، دكاره ب ده‌هان گه‌ریلایان فه‌دا بكه‌ت.
ل رۆژا كو په‌كه‌كێ ئه‌ڤ داخویانی دای، عه‌ینی رۆژێ ده‌وله‌تا تركیێ وێنه و دیمه‌نێن هه‌ده‌ف كرنا وان 6 گه‌ریلایان راگه‌هاند، لێ به‌لێ په‌كه‌كه رژده ببێژیت: «نا عه‌سكه‌رێ ترك ئه‌ڤ هه‌ڤرێیێن مه نه‌كوشتنه، به‌لكو په‌ده‌كێ ئه‌ڤ ته‌وان ئه‌نجام داییه»، تشتا كو په‌كه‌كه دخوازیت بكه‌ت و ببێژیت ئه‌ڤه: «په‌كه‌كه دخوازیت روویێ ره‌شێ ده‌وله‌تا داگیركه‌ر ل سه‌ر حه‌سابا په‌ده‌كێ سپی بكه‌ت».
په‌كه‌كێ د 33 رۆژان دا 42 جوانێن كورد دانه كوشتن
د ته‌عقیبه‌كا پێگه‌ها «داركا مازی» دا، ئه‌شكه‌ره بوو كو رێخستنا په‌كه‌كێ ژ رۆژا 1 ئیلۆنا ئیسال 2021ێ و هه‌یا ئیرۆ رۆژا یه‌كشه‌مبی 3 ئۆكتۆبه‌را 2021، 16 داخویانی دانه و تێدا ژ ده‌ست دانا 42 كه‌چ و جوانێن كورد راگه‌هاندییه، واته رۆژ ده‌رباس نه‌بوویه، هه‌گه‌ر په‌كه‌كێ مزگینییا دانه كوشتنا جوانه‌كێ كورد ب ده‌ستێ عه‌سكه‌رێ ترك، ژ گه‌ل را نه‌دابیت.
