قۆتابیێن کو ئەڤە دەمەکە ژ بەر نەبوونا بەشێ ناڤخوەیی و زێدەبوونا کرێیا خانیان ل پارکان دمینن و چالاکیان دکەن شەڤا بۆری 6ێ جۆتمەھا 2021ێ ل مەیدانا تەقسیمێ یا ستەنبۆلێ ب بەتانیان مەشیان.
قۆتابیێن کو ناڤێ “بێواران” ل سەر خوە دانایە و ب سلۆگانا “جھێ مە نینە” ل کۆلانان نەرازیبوونا خوە نیشان ددەن ل ناڤچەیا بەیۆگلویا ستەنبۆلێ ل 5 کۆلانان مەشیان و پشترا ل مەیدانا تەقسیمێ داخویانیەک بەلاڤ کر.
قۆتابیان داخوازێن خوە ئانین زمان و گۆتن: “ئەم ل ھەر دەرێ نە و بۆ مافێ خوەیێ جھ ژی چالاکین. لێ ل شوونا گوھێ خوە بدەنە مە، پۆلیس ئێریشی سەر مە دکەت و ھەڤالێن مە دەستەسەر دکەن. ئەم دێ چالاکیێن خوە بەردەوام کەین، ئەم جھێ مانێ دخوازن.”
قۆتابیان دیار کرن کو ب ئارمانجا پشتگریێ ئەڤ چالاکی ساز کریە و ب بەتانیێن خوە دمەشن و ژ وەلاتیێن ل قادێ داخواز کرن کو پشتگریێ بدەنە چالاکیێن وان.
ل ترکیا و باکورێ کوردستانێ ھەر سال د مەھا ئیلۆنێ دا پەروەردەیا زانینگەھان دەستپێ دکەت. ب دەستپێکرنا پەروەردەیا رووبروو ل گەلەک باژارێن ترکیا و باکورێ کوردستانێ گەلەک قۆتابی جھێ مانێ پەیدا ناکەن و ل بەرامبەر کێشەیا مانێ نەرازیبوونێن خوە نیشان ددەن. قۆتابیێن جھێ مانێ پەیدا نەکری ژ بۆ چارەسەرکرنا کێشەیا خوە “تەڤگەرا بارنامیۆروز” ئانکو (بێواران) ئاڤا کریە. قۆتابی گازندا نەبوونا جھێ مانێ ژ سازیێن گرێدایی زانینگەھان و کرێیا گران یا مالێن تایبەت دکەن.
