چار کەسێن کو ئامادەکاری ژ بۆ كارێن تێكده‌ر ل رۆژا هه‌لبژارتنان ل هه‌ولێرێ دكرین، هاتن ده‌سته‌سه‌ر كرن، هات زانین ئه‌ڤ كه‌س گرێدای نوونه‌راتییا هه‌ده‌پێ یا ل هه‌ولێرێ نه و ب ته‌علیماتێن قه‌ندیلێ پیلانێن خوه ئاماده كربوون.
چار کەسێن کو ل نونەراتییا هه‌ده‌پێ یا هەولێرێ كار دكه‌ن، ئیرۆ هاتن گرتن، ئەڤان کەسان ئاماده‌كاری دکر کو رۆژەکێ بەرا هه‌لبژارتنان و رۆژا هه‌لبژارتنێ ژی هنده‌ك چالاكییان بکه‌ن ژ بۆ كو هه‌لبژارتن بهێن تێكدان، دهێته گۆتن هنەک کەسێن دی ژی حازری دكرن ژ ئه‌ورۆپا ڤه بهێن و ل بن په‌رده‌یا پشته‌ڤانیێ بۆ وان زیندانیێن مانگرتنا برچیبوونێ ده‌ست پێ كری، به‌شداری وان پیلانێن په‌كه‌كێ ببن.
کەسێن هاتینە گرتن و پەیوەندییا وان ل گەل په‌كه‌كێ چی یه؟
ئەو کەسێن کو هاتینە ده‌سته‌سه‌ر كرن، یه‌ك ژێ «ناهیدە ئەرمیشە»، ئەرمیش گه‌ریلایه‌كا کەڤن یا په‌كه‌كێ یە و دەهـ سالان ل زیندانێ مایە، هێشتا ژی كادرا پککێ یە، داوی جار ژ به‌ر دۆزا كو ل سه‌ر وێ هه‌یه، ژ باكور چوویه رۆژئاڤا و پاش هاتییه قه‌ندیلێ.
ل بوهارا رابووری «ئه‌رمیش» هاتییە نوونه‌راتییا هه‌ده‌پێ و وەکی په‌یڤدار هاتییە ئەرکدار کرن، ناهیدە ئەرمیش ل ئیستخباراتا په‌كه‌كێ ل ناڤەندا لێکۆلینین سیاسی NLPێ کار دکەت، ل هەمان دەمێ ژی ته‌علیماتێن قەندیلێ بۆ وێ دهێنه شاندن ژ بۆ کو رابگهینیت.
تێ زانین کو په‌كه‌كه ل دەما هه‌لبژارتنێ ل گەل هندەک دەولەتان حه‌ره‌كه‌ت کر کو ل باشوورێ كوردستانێ ئالۆزییان چێكه‌ت و ل هەمان دەمێ ئەو و حه‌شدا شه‌عبی كاندیدێن خوە یێن هەڤبەش سه‌ربێخیت، نها ژی رێخستن دخوازیت تێكدانێ ل هه‌ولێرێ بكه‌ت، ژبەر ڤێ یەکی ژی په‌كه‌كه نوونه‌راتییا هه‌ده‌پێ یا ل هه‌ولێرێ ژ بۆ خوە دکەت ماسک، وێ هندەک کەس ئه‌ركدار كربوون كو هه‌ولێرێ ته‌ڤلیهه‌ڤ بكه‌ن.
نوونەراتییا هه‌ده‌پێ یا هەولێرێ بوویە ناڤەندا په‌كه‌كێ
نوونەراتییا هه‌ده‌پێ یا هەولێرێ وەک ئۆفیسا په‌كه‌كێ تێ ب کار ئانین، په‌كه‌كێ ئەڤ ئیجازەیا ژ بۆی هه‌ده‌پێ هاتییە دان و هه‌ست و رێزا كو ل هه‌رێما كوردستانێ ژ بۆ هه‌ده‌پێ دهێته گرتن بۆ خوه ب كار دئینیت و سوودێ ژێ وه‌ردگریت، په‌كه‌كه ته‌ڤایا کارێن خوە ل ڤێ ئۆفیسا هه‌ده‌پێ د مه‌شینیت، ل هەمان دەمێ كارێن کادرێن په‌كه‌كێ و شه‌رڤانێن نوو و گه‌له‌ك كارێن دی.
تشتێ گرنگ ئەڤەیه کو نوونەراتییا هه‌ده‌پێ یا ل هەولێرێ ل دژی هەرێما کوردستانێ کار دکەت و دخوازیت دەست د پرسێن ناڤخوه یێن هه‌رێمێ دا وه‌رده‌ت، خوە تەڤلیکرنا ناڤا کارێن هەرێما کوردستانێ یا نوونەرتییا هه‌ده‌پێ دەمەکێ درێژە نەرازیبوون ل دژ هه‌یه، دیارە کو ئه‌ڤ جاره ژی په‌كه‌كه دخوازیت ڤێ نوونەراتییا هه‌ده‌پێ بۆ خزمه‌تا ئه‌جێندایێن سیاسی یێن هه‌رێمی ب كار بینیت.
راگه‌هاندنا په‌كه‌كێ ژی ئەڤه دەمەکێ درێژە هەرێما کوردستانێ کرییە هەدەف و بانگه‌وازییا چالاكیێن تێكدانێ دكه‌ت.
