سالەک ل سەر تەرۆرکرنا رێڤەبەرێ ئاسایشا گشتی یا سەرزێرێ غازی سالح ئالیخان ژ ئالیێ تیمەکا دو کەسی یا گرێدایی ھێزێن لەشکەری یێن پەکەکێ، ھەپەگێ ڤە دەرباس بوو.
تیما گەریلایێن پەکەکێ ل شەڤا 8ێ جۆتمەھێ دا دەما کو غازی سالح ئالیخان لگەل زارۆکێن خوە دا ل باخچەیێ خوە ل گوندێ خوە بیگداودا روونشتی ب گولەیەکا نیشانەشکێنێ تەرۆر کر. غازی زەوجی بوو و پێنج زارۆکێن وی ھەبوون. کورەکی وان ھەبوو ب ناڤێ ھەژی، یێ ھەری مەزن 19 سالی، و چار کەچ، ھێلین، سۆلین، لۆرین و سەرین، یا ھەری بچووک 5 سالی. تەڤاھیا بوویەرێ ل بەر چاڤێن زارۆکان پێک ھات.
غازی سالح ئالیخانێ 47 سالی کو ب گرانی بریندار بوو دەما بری نەخوەشخانەیێ ژیانا خوە ژ دەست دا. د دەمژمێرێن دەستپێکێ یێن بوویەرێ دا برایێ غازی سالح ئالیخان، جەمیل سالح ژ بۆ دەزگەهێن مەدیایی ئاخڤت و راگھاند کو برایێ وی دەمەکێ درێژە ژ لایێ پەکەکێ ڤە دهاتە تەھدیتکرن و ژ لایێ پەکەکێ ڤە هاتیە گولـلەبارانکرن.
ھەپەگێ بوویەر ب نیڤی رەد کر
رۆژا 10ی جۆتمەھێ، رێڤەبەریا ئاسایشا گشتی یا ھەرێما کوردستانێ ب داخویانیەکێ ئەنجامێن لێکۆلینێن خوە ئاشکەرا کرن. د داخویانیێ دا ھات گۆتن، “پشتی لێکۆلین و لێپرسینا بەرفرەھ، ھاتە زانین کو غازی سالح ئالیخان ژ ئالیێ پەکەکێ ڤە ھاتیە تەرۆر کحرحن. بەری ڤێ بوویەرێ غازی سالح ئالیخان ژ لایێ پەکەکێ ڤە ب کوشتنا راستەراست یان ژی نەراستەراست ھاتبوو تەھدیدکرن”.
ل ئالیێ دی، پەکەکێ د 20ی جۆتمەھێ دا ل سەر ناڤێ باسکێ لەشکەری یێ خوە، ئانکو هەپەگێ داخویانیەک دا و گۆت کو وان هیچ پەیوەندیەک ب بوویەرێ ڤە نینە. داخویانی ل سەر ناڤێ ئاستەکێ بلند ل سەر ناڤێ HPG ھاتە دایین و ھات گۆتن کو “پەیوەندیا مە ب ڤێ بوویەرا تاری ڤە تونەیە”. داخویانی یا بێ ناڤ و نیشان و بێ ناڤ بوو. ھەر چەند د ڤەگۆتن و ئاوایێ چێکرنا داخویانیێ دا ھات گۆتن “مە ئەو کار نەکریە”، لێ داخویانیا پەکەکێ ب ڤێ واتەیێ دهێت کو پەکەک ببێژیت “مە ئەڤ کارە کر لێ ئەم وەناکەین”.
لێبەلێ، مالباتا غازی سالح ئالیخان، حەژێکەرێن وی، کەسایەتیێن بەرواری و ھێزێن ئەولەکاریێ پشتراست بوون کو بەرپرسیارێ بوویەرێ پەکەکەیە.
داخویانیێن ئۆزگوور ژیان
چیرۆکا راستین یا کوشتنا غازی سالح ئالیخان د 9ێ خزیرانێ دا دەرکەت ھۆلێ، دەما کو ئاننان چەلیک، ب کۆدناڤێ ئۆزگوور ژیاندا، یەک ژ فەرماندارێن ھەپەگێ، ژ پەکەکێ ڤەقەتیای.
ئۆزگوور ژیاندا ب دلداری خواست راستیێ بێژیت و د دەربارێ کوشتنا غازی دا ئەڤ تشتە گۆتن:
“شەهید غازی ل مالێ بوو، ل سەر ئاخا خوە بوو. وی نەدخواست ھندەک تشتان ژ بۆ پەکەکێ ئەنجام بدەت. ژ بەر ڤێ سەدەمێ، پەکەکێ ئەو و کەسێن دی یێن ل ھەرێمێ وەکی وی ئارمانج نیشان دان. بریارا کو ژ فەرمانداریا ریخستنێ ھاتیە وەرگرتن گەف، ترساندن، دەرکرن، سزادان یان دارڤەکرنا پێشمەرگەیێن کو د ناڤ سینۆرێن گەریلا دا بوون، بوو. شەهید غازی ل گوندێ بیگداودا یێ ناڤچەیا تروانشێ بوو. تیمەکا گەریلایێن پەکەکێ راستەراست ب ناڤەندا مەتینا ڤە گرێدایی ھەبوو کو ل وێ قادێ تەڤبگەریت. د ناڤا ڤێ تیمێ دا جەسوور رۆبۆسکی و پلنگ جزیری ھەبوون. ب قاسی کو ئەز دزانم، ڤان کەسان غازی شەھید کر. ل دەست پلنگ جزیرێ چەکا کوشتنێ یا نیشانەشکێن ھەبوو، ل جەم جەسوور ژی دووربین M-16 ھەبوو. وان گۆتە من کو وان ئەڤ چالاکیە ئەنجام دایە”.
