پشتی ئەردۆگان چاڤوشۆغلو ژی گەفا ئێریشا لسەر رۆژئاڤایێ کوردستانێ کر!

پشتی ئەردۆگان چاڤوشۆغلو ژی گەفا ئێریشا لسەر رۆژئاڤایێ کوردستانێ کر!

 پشتی گەفێن چەند رۆژ بەرێ یێن سەرۆکۆمارێ ترکیێ رەجەپ تەییب ئەردۆگان بۆ دەستوەردانا لەشکەری، وەزیرێ دەرڤەیێ ترکیێ مەولود چاڤوشۆغلو ژی ل سەر ئێریشێن دژی ھێزێن ترکیێ و کۆمێن چەکدار  گەف ل ھێزێن رۆژئاڤایێ کوردستانێ کرن.

چاڤوشۆغلو ژ ئێریشێن کو لەشکەرێن وان تێدا ھاتنە کوشتن رووسیا و ئامەریکا بەرپرسیار دیت و گۆت “ژ بۆ کو یەپەگە ژ ڤان ھەرێمان بهێتە پاقژکرن، چ ژ دەستێ مە بهێت ئەم دێ کەین.”

وەزیرێ دەرڤەیێ ترکیێ دەربارێ ئۆپەراسیۆنەکا ل سەر رۆژئاڤایێ کوردستانێ دا وەھا ئاخڤت: “د ئێریشێن یەپەگێ دا بەرپرسیاریا رووسیا و ئامەریکایێ ژی ھەیە. ژ بۆ کو یەپەگە ژ ڤان ھەرێمان بهێت پاقژکرن، چ ژ دەستێ مە بهێت ئەم دێ کەین. ژ بەر کو ئامەریکا و رووسیایێ سۆزا خوە ب جھ نەئانینە، یا کو دڤێت ئەم ئەنجام بدەین ئەڤەیە کو ئەم ناڤکا خوە بخوە ببڕینن.”

سەرۆک کۆمارێ ترکیێ رەجەپ تەییب ئەردۆگان ژی پێر 11ێ جۆتمەھێ د جڤینا کابینەیێ دا، ل دژی رۆژئاڤایێ کوردستانێ گەف کربوون و گۆتبوو: “ئەو ب بریارن گەفێن کو ژ سووریێ تێن ژ ھۆلێ راکەن. ئێریشا ھەری داوی یا ل دژی پۆلیسێن مە و تاجیزێن کو ئاخا مە دکەنە ئارمانج، ئێدی سەبرا مە نەھێلایە. ژ بۆ کو ڤان پرسگرێکان د زووترین دەم دا چارەسەر بکەین، ئەم دێ گاڤێن پێویست هاڤێژین.”

ھێژایی گۆتنێیە، ھێزێن سووریا دەمۆکراتیک (ھەسەدێ) رەد کربوو کو 10ێ جۆتمەھێ ژ ئالیێ وان ڤە هیچ ئێریشەک ب سەر ھێزێن ترکیا دا کو 2 لەشکەرێن وان ھاتبوون کوشتن، ھاتبیتە کرن. ھەروھا د داخویانیا وەزارەتا ناڤخوەیا ترکیێ دا ژی نەھاتبوو دیارکرن ئێریش ژ ئالیێ کیژان ھێزێ ڤە ھاتیە کرن کو ئەو دەڤەر د بن کۆنترۆلا رووسیایێ دا نە.

پوستێن ھەمان بەش