وەزارەتا چاڤکانیێن ئاڤێ یا ئیراقێ راگھاند؛ رێکەفتنا ئاڤێ لگەل ترکیێ کەتیە وارێ جێبەجێکرنێ دا، ئالیێ ترکیێ دخوازیت کێشەیێن لگەل بەغدایێ چارەسەر بکەت.
وەزیرێ چاڤکانیێن ئاڤێ یێ ئیراقێ مەھدی حەمدانی راگھاند؛ رەجەب تەییب ئەردۆگان ل سەر رێکەفتنا کو ئەنقەرە و بەغدایێ دەربارێ چاڤکانیێن ھەڤبەشێن ئاڤێ ئیمزا کریە، راستگۆیە.
مەھدی حەمدانی ئاشکەراکر کو ئیرۆ پێنجشەمبێ 14ێ جۆتمەھێ رێکەفتنا ئاڤێ کەتە وارێ جێبەجێکرنێ دا و دیار کر کو وەزارەتا دەرڤەیا ئیراقێ ب فەرمی ئەڤ ئاگاھی ب وان راگھاندیە.
حەمدانی دەستنیشان کر کو پێشوازیەکا باش ژ ئالیێ ترکیا ڤە ژ دۆسیەیا ئاڤێ هاتیە کرن، ژ بەر ڤێ یەکێ حکوومەتا ئیراقێ د گەھشتنا ڤێ رێکەفتنێ دا سەرکەفتی بوویە.
ھەروھا ئاشکەرا کر کو ئیراقێ ژ بۆ دەھان سالێن بهێت، ئەڤ رێکەفتنە لگەل ترکیا ئیمزا کریە.
وەزیرێ چاڤکانیێن ئاڤێ راگھاند: “ل سەر دۆسیەیا چاڤکانیێن ھەڤبەشێن ئاڤێ، ئیران ئالیکاریا ئیراقێ ناکەت، ھەر دەم زرارێن مەزن ل بەغدایێ دکەڤن.”
مەھدی حەمدانی گۆت: “ئەم ھێڤی دکەین کو ئیران ل سەر ڤێ مژارێ ئالیکار بیت، ب تایبەتی ل پارێزگەھا دیالا ئاستا ئاڤا چەمێن ھەویزە و کارۆن گەلەک داکەتیە، ل ھەمبەر ڤێ، ترکیا و سووریێ ئالیکاریا ئیراقێ کریە.”
