ئیرۆ چارەمین سالڤەگەرا داستانا سحێلایە

ئیرۆ چارەمین سالڤەگەرا داستانا سحێلایە

4 سال ب سەر داستان و مێرخاسیا ھێزێن پێشمەرگە ل دەڤەرا سحێلا یا نەینەوا دا دەرباس دبن.

ئیرۆ 26ێ جۆتمەھێ یە و 4 سال ب سەر داستان و مێرخاسیا دەڤەرا سحێلا دا دەرباس دبن، ژ بەر کو رۆژا 26 جۆتمەھا سالا 2017 ھێزێن پێشمەرگە ب مێرخاسی و قەھرەمانیەکا مەزن کارین وان ئێرش و کۆمپلۆیێن کو پشتی خیانەتا 16 جۆتمەھا ھەمان سالێ بەروکێن کوردستانێ گرتبوون، بشکێنن و پووچ بکەن.

4 سال بەرێ و د رۆژەکا وەک ئیرۆ دا، ھێزێن پێشمەرگە ب توندی بەرسڤا ئێرشێن میلیشیایێن ئیراقی و ھێزێن دی یێن ئیراقێ دان کو ب پشتەڤانیا ئەفسەر و پسپۆرێن شەری یێن وەلاتەکێ ھەرێمی دخواستن ستاتوویا ھەرێما کوردستانێ نەھێلن و کوردستانێ داگیر بکەن.

د دەستانا سحێلا دا ب دەھان ترۆمبێل و زرێپۆش و تانک و ئاموورێن سەربازی یێن دژمنی ھاتن تەقاندن و شکاندن، گەلەک چەکدار و میلیشیا ژی ھاتن کوشتن و دەربێن گران ل دژمن کەتن، ژ بەر وێ ژی نەچار مان پاشڤە ڤەکشن.

د وی شەری دا چەند پێشمەرگە و فەرماندەیێن سەربازی شەھید و بریندار بوون.

دژمنی دخواست سینۆرێ پێشابیر و وێ دەڤەرێ ژ دەستێ پێشمەرگە بینیت دەرێ لێ ب بەرخوەدانا توند یا پێشمەرگە ئەو پلان ھات پووچکرن.