گەلۆ ئەوێن ل سێمالکا دقیرن کی نە؟

سیاسەتا پەکەکێ یا کو د ناڤبەرا کوردان دا کین و نەفرەتێ به‌لاڤ دکەت ناراوەستیت، پەکەکە ھەول ددەت پارچەیێن کوردستانێ ل دژی ھەڤ هان بدەت، ئێزیدییان پارچە بکەت و ل دژی ھەڤدو بکەتە دژمن، دخوازیت ناسنامه‌یا ئێزدییان یا نەتەوه‌یی پووچ بکەت، واته‌ ل کو دەرێ برینەک د ناڤ کوردان دا ھەبیت، پەکەکە ب ھەموو ھێزا خوە ڤە وێ برینێ داخ دکەت.

په‌كه‌كه‌ دخوازیت شه‌ر بكه‌ڤیته‌ د ناڤ مالا كوردان دا

شانۆیا ژنان یا کو ڤان رۆژان ل سێمالکا دهێتە نیشاندان، د چارچووڤەیا ستراتیژییا کوور کرنا پارچەبوونا روحی یا د ناڤا گەلێ کورد دا یە، ناکۆکیێن د ناڤبەرا پارتییان دا دکەتە بنگەھێن ژ ھەڤ پارچەکرنا جڤاک و نەتەوەیا کورد، هۆستایی ڤێ ستراتیژیێ ژی ترکیا یە.

ترکیا ل باکورێ کوردستانێ و ل پارچەیێن دی پێکھاتنا جیھانەکا روحی یا کوردان یا ھەڤگرتی ژ بۆ خوە وەکە مەترسیەکا مەزن دبینیت، د ڤی بابەتی دا ھەگەر بکاریت یەک کەس ژی ل دژی کوردان ب کار بینیت ژ بۆ خوە سەرکەفتن دبینیت.

چ فەرق د ناڤبەرا ژنێن کورد ئه‌وێن دەولەتا ترک ل بەر دەریێ ئۆفیسێن هەدەپێ داینه‌ روونشتن و ژنێن کو پەکەکێ هاڤێتینە بەر دەریێ سینۆری یێ سێمالکا دا نینە.

 ھەردو ئالی ژی ئەو کەسن کو نکارن د وی کاری بگەهن یێ کو ئەو دکەن و ئەڤ جورێ بکارئینانا ژنان نە ژ بۆ باشییا کوردانە، بەلکو ژ بۆ خرابیا کوردانە، تەنێ ژ بۆ کو کورد دژمناتییا ھەڤدو بکەن دهێتە کرن، ئانكو پەکەکە دخوازیت شەر بکەڤیتە د ناڤ مالا کوردان دا.

نە پێویستە ئەم زێدە مەزن ژی بکەین، ئەڤ کۆما ژنێن ل سەر سنۆرێ سێمالکا ل دژی باشوورێ کوردستانێ، حکوومەتا ھەرێما کوردستانێ، پەدەکێ و بارزانی درویشمان دبێژن، نە کارەکێ جددی یە، ژ بەر کو ئارمانجا وان دیارە، پرانییا وان مامۆستا، کارمەند یان ژی دایکێن كارمه‌ندێن سازیێن پەیەدێ نە.

 واته‌ پێویستییا ڤێ کۆمێ ب رێڤەبەرییا تەڤ – دەمێ ھەیە، ئاکەپە ژی وەھا دکەت، مرۆڤ ب دەرفەتێن دەولەت و رێڤەبەرییا ئەردۆگان حەقدەستێ خوە دستینن، سوودێ وەردگرن و پشترا ژی دەردکەڤنە سەر شەقامان و دبێژن: «ئەم ب تە رە نە ئەی رەیس»، واته‌ ئەو کۆما سێمالکا ژی ل سەر ڤێ حەسابێ تەڤدگەریت،  مخابن، یا کو رۆژھلاتا ناڤین بێ ژیان دکەت ژی، ھەبوونا ڤێ جه‌ھالەتێ یە کو ھەر کەس دکاریت وان ژ بۆ خوە ب کار بینیت، ئەڤ کەسە ژ بۆ ھەر جورە خرابیەکێ وەک ئاموور دهێن ب کار ئانین، راستییا ژنێن ل سێمالکا ژی دقیرن ھەمان تشتە.

گەر کەسێن ل سێمالکا کۆم بووین دخوازن بگەهنە راستیێ، ل دەستپێکێ بلا قڕکا جەمیل بایکی بگرن و پرسا چارەنڤیسێ جوان عەرەب و دۆزدا حه‌مۆ ژێ بكه‌ن

چما ئەو ژن ل ور دقیرن؟ ژ بەر کو پەکەکێ دەرەوەک بۆ وان کرییە و گۆتییە وان، ل خەلێفانێ 6 گەریلا ژ ئالیێ پێشمەرگەیان ڤە ھاتنە کوشتن، پەدەکێ ژی بەرسڤا ڤێ تاوانبارکرنا درەو دایە و گۆتییە کو چ بوویەرەکا وەھا روونەدایە، لێ گرسەیا کو پەکەکێ ژ قامشلۆ ب ترومبێلان ئینایه‌ دەریێ سێمالکا هزرا خوە د ڤێ درەوێ دا ناکەت، تشتێن بۆ وان ھاتینە گۆتن و ئەو ژی مینا رۆبۆتان دوبارە دکەن.

ھەروه‌ها، گەر ھێزا ڤان کەسان یا لێپرسینێ ھەبایە، ئەو دا دەستپیکێ قڕکا پەکەکێ گرن و حەسابا جوانێن رۆژئاڤا یێن ژ ئالیێ پەکەکێ ڤە ھاتنە تەرۆرکرن بپرسن، ل دەستپێکێ ئەو دا ل زارۆکێن خوە ب خودان دەرکەڤن، میناک دا حەسابا بەرپرسێ ئاساییشا گشتی یا رۆژئاڤا کو پەکەکێ تیرۆر کری، ئانکو «جوان عەرەب» ژ پەکەکێ پرسن.

جوان عەرەب بەرپرسێ ئاساییشا رۆژئاڤا بوو، ب داخویانیێن خوە هەردەم ل سەر ئەکرانان دھاتە دیتن، ھەر وەھا رێڤەبەرەکێ بەرێ یێ پەکەکێ بوو، ئەو راستەراست د یەکینەیا پاسەوانێن جەمیل باییک دا ما بوو، دەما کو جوان عەرەب بەرپرسێ ئاساییشا گشتی بوو، ژ بەر تاوانا کو ئەوی پەیوەندی ب شێخەکێ تەریقەتێ ڤە ھەیە، ل گەل کۆمەک ھەڤالێن خوە ھاتن گرتن، ژ وێرێ و ل بن ناڤێ پەروەردێ ئه‌و شاندنە چیایێ گارەی. پشتی پەروەردێ پەکەکێ گۆتە کادرێن خوە کو جوان د هێرشه‌كا ئاسمانی دا ھاتییە کوشتن، لێ بەلێ کادرێن پەکەکێ یێن کەڤن ژی دبێژن کو جوان عەرەب ھاتییە تەسفییەکرن.

 پەکەکێ ژی ل سەر ڤێ بوویەرا کوشتنا جوان عەرەب چ داخویانی بەلاڤ نەکرینە، ئەم بەحسا سالا 2018ێ دکەین، نە دیرۆکا کەڤن، گەر کەسێن ل سێمالکا کۆم بووی دخوازن بگەهنە راستیێ، ل دەستپێکێ بلا قڕکا جەمیل بایک بگرن و بپرسن چارەنڤیسێ جوان عەرەب چ بوویە.

یان ژی ب ھەمان ئاوایی حەسابا دۆزدار حەمۆ «عەبدولرەحمان حەمۆ» ژ جەمیل بایک بخوازن، دۆزدار حەمۆ فەرماندارەکێ کەڤن و خەلکێ عەفرینێ بوو، د ناڤا پەکەکێ دا کادره‌کی رۆژئاڤا یێ ھەری کەڤن و خودان شییان بوو، لێ دۆزدار هندەک جاران ل گەل پەکەکێ ناکۆکی هەبوون، ل داویێ ئەو ب ئیدیعایا کو وی پارە بەرزە کرنە ھاتە تاوانبار کرن.

ب ھەزاران جوانێن رۆژئاڤا د ناڤا پەکەکێ دا بێ سەرووشوون وندا بوونە کەسەک ل وان ناپرسیت

دۆزدار کو پشتی سالا 2017ێ ژ رۆژئاڤا ھاتە دەرخستن، برنە چیایی، دۆزدار ل گارەی باش دهێتە بێھێزکرن و وی د سازییەکێ دا دادنن، دۆزدار بێ ئەرک د سازییەکا کەجەکێ دا دهێتە ھشتن، پشترا پشتی سالەکێ، پەکەکێ راگه‌ھاند کو دۆزدار د مژدارا 2019ێ دا ل ھەرێما قەندیلێ د هێرشه‌كا ئاسمانی دا ژیانا خوە ژ دەست دایە، ژ بەر کو ب راستی ژی دۆزدار تەرکی مرنێ کر بوون،  پەکەکێ ئەو ژ لیستا خوە دەرخست بوو و د خواست ژ وی خەلاس ببیت.

یا کو ئەم بەحسا بێھشبوونێ دکەین ئەڤ راستیە یە، زارۆکێن وان ب خوە، کەسێن کو سەروەرییا ژ بۆ وان تۆمار کرنە ژ ھۆلێ وندا دبن، کەس ل وان ناپرسیت، نابێژن کانێ جەنازەیێن وان ل کودەرێ نە، نابێژن ئەم بچین تەرمێ دۆزدار ل عەفرینێ و یێ جوان ژی ل حەسەکێ دەفن بکەین، ب ھەزاران جوانێن رۆژئاڤا د ناڤا پەکەکێ دا بێ سەرووشوون وندا بوونە کەسەک ل وان ناپرسیت، لێ ل سەر درەوا ئیسباتکری یا خەلێفانێ ھوون دبێژن ئەم دێ جەنازەیێن خوە وەرگرین.

ئه‌وێن ل سێمالكا، نه‌دایكێن دۆزا كوردانه‌، نه‌یێن دۆزا كوردستانێ نه‌، ئه‌و كۆمه‌كا ئالیگرێن رۆبۆت یێن په‌كه‌كێ نه‌ ز ل گۆری پێدڤیێ دهێنه‌ لڤاندن

بەلێ، گرسە ژی خراب دبن. د راستی یا ڤی کاری دا، گرسەیێن جاھل گەلەک خرابترن. لێ یا ھەری مەترسیدار ئەو گرسەنە یێن کو وە دفکرن ئەو ھەرتیشی دزانن لێ د راستیێ دا زۆر جاھێلن، گەلەک زیانێ دگەهینن جڤاکی. خەلک ل سێمالکا نینە، ئەو نە دایکێن دۆزا کوردا نە، نە دایکێن دۆزا کوردستانێ نە، نە دایکێن نەتەوەیی و مللی نە. ئەو کۆمەکا لایەنگرێن پەکەکێ یێن مۆبلن، گۆری پێویستییان تێنە بکارئینان و گێراندن.

پوستێن ھەمان بەش