سەرۆکێ شانەیا راگھاندنا ئەمنی یا ئیراقێ راگھاند کو ئێرشا ل سەر مالا سەرۆکوەزیر مستەفا کازمی ب رێیا سێ درۆنان بوویە و دو ژ وان ژ ئالیێ ھێزێن ئەمنی ڤە ھاتنە خستن، لێ یا سێیەمین گەھشت ئارمانجا خوە و ئێرش پێک ئانی.
سەرۆکێ شانەیا راگھاندنا ئەمنی سەعد مەعن ئیرۆ ژ بۆ کەنالا فەرمی یا ئیراقێ راگھاند، “ئەوا رووی دای و ئارمانجگرتنا سەرۆکوەزیرێ ئیراقێ پێشھاتەکا مەترسیدارە و کریارەکا تەرۆریستییە، لێکۆلینەکا ھوور دهێتە کرن ژ بۆ زانینا ھەموو ھوورگلیێن وی کاری تەرۆریستی.”
سەرۆکێ شانەیا راگھاندنا ئەمنی یا ئیراقێ ھوورگیێلیێن ئێرشی ژی ئاشکەرا کرن و گۆت، ب سێ درۆنان ئێرشی مالا مستەفا کازمی ھاتیە کرن، 2 درۆن ژ ئالیێ ھێزێن ئەمنی ڤە ھاتنە خستن، لێ یەک گەھشت ئارمانجا خوە.
سەعد مەعن کو د ھەمان دەمێ دا بەردەڤکێ وەزارەتا ناڤخوەیا ئراقێ یە، دبێژیت، “ئەنجوومەنا دادوەری دێ لژنەیەکێ ژ بۆ لێکۆلینکرنا وێ بوویەرێ پێک ئینیت.”
ئیرۆ د دەمژمێرێن سەرێ سپیدێ دا، ب درۆنەکا بۆمبەکری ئێرشی مالا سەرۆکوەزیرێ ئیراقێ مستەفا کازمی ھات کرن و ھەولا تەرۆرکرنا وی ھات دایین، لێ شانەیا ئەمنی یا ئیراقێ راگھاند، کو ھەولدانا تەرۆرکرنێ بسەرنەکەتیە و کازمی سلامەتە.
