هه‌ولا په‌كه‌كێ یا ته‌سفییه‌كرنا ده‌میرتاش

pkk-tak-selahettin-demirtash-kck (2)

د سەر هێرشا بۆمبەیی يا TAKێ یا ل سەر قەرەقۆلا کو دەمیرتاش لێ بوو، 5 سال دەرباس بوون، لێ بوویەر هێشتا نەهاتییە زەلالکرن.

د 4ێ مژدارا 2016ێ دا ل دیاربەکرێ، هێرشەکا خوەکوژی پێک هاتبوو و د ئەنجامێ دا 12 کەس هاتبوون کوشتن و 100 کەس ژی بریندار ببوون، ئەڤ هێرش د ناڤا هێرشێن سالێن داویێ یێن ل ترکیێ هاتین کرن، هێرشا هەری مەزن بوو، 3 ته‌نێن TNT یێ د ترومبێله‌كا بارهەلگر دا هاتنە تەقاندن.

ئالیێ هه‌ری بالكێش یێ ڤێ هێرشێ ئەو بوو کو ل ڤێ قەرەقۆلا پۆلیسان دا دو رێڤەبەرێن هه‌ده‌پێ سه‌لاحه‌ددین دەمیرتاش و فیگەن یوکسەکداغ لێ د ئامادە بوون، چالاکی هاته‌ کرن، ئەڤ هێرش رێخستنا TAK یا سەر ب په‌كه‌كێ ئه‌نجام دابوو.

ئاژانسا نووچەیان یا په‌كه‌كێ ANF ل سەر ناڤێ TAKێ داخویانی بەلاڤ کر، لێ چما هێرشەک وه‌ها هاته‌ کرن و ئارمانجا ڤێ چالاکیێ چ بوو قەد نەهات رۆژەڤێ.

سه‌لاحه‌ددین دەمیرتاش، ژ بۆ بنپێکرنا مافان یان كێشه‌یه‌كا هەری بچووک ژی دەنگێ خوە بلند دکر، لێ ژ بۆ ڤێ تەقینێ بێدەنگ ما، ل ئالیێ دی په‌كه‌كێ چ داخویانی نەدان و خوە کەڕ کر، ئەڤ بوویەر ژی د ناڤ بوویەرێن کو ل سەر وان هاتنه‌ گرتن جهێ خوه‌ كر.

هەڤسەرۆکێ DBPێ ژیانا خوە ژ دەست دا

د بەریا تەقینێ ب چه‌ند ده‌مژمێره‌كان د ئۆپەراسیۆنەکا هەموەخت دا، هەڤسەرۆکێن گشتی یێن هه‌ده‌پێ سه‌لاحه‌ددین دەمیرتاش و فیگەن یوکسەکداغ، پارلامەنتەرێن هه‌ده‌پێ زیا پیر و سری سورەیا ئۆندەر برن رێڤه‌به‌رییا دژی تەرۆرێ، یا هێرش ل سەر هاتییه‌ كرن، لێ دەمیرتاش و پیر 2 ده‌مژمێران بەریا تەقینێ ژ وێ ئاڤاهیێ دەرێخستن و ئەو ڤه‌گوهاستن دادگەهێ.

هات زانین کو هەڤسەرۆکا گشتی یا هه‌ده‌پێ فیگەن یوکسەکداغ و پارلەمانته‌رێ هه‌ده‌پێ یێ ئەنقەرەیێ سری سورەیا ئۆندەر ل ئاڤاهییا رێڤه‌به‌رییا دژی تەرۆرێ یا کو د تەقینێ دا زیانه‌كا مەزن دیتی، د هاتنه‌ گرتن، د ئاڤاهیێ دا گەلەک رێڤەبەرێن هه‌ده‌پێ و ده‌به‌پێ یێن بنچاڤکری هەبوون، هەڤسەرۆکێ ده‌به‌پێ یێ ناڤچەیا چوونگووشێ، رەجائی ئالتای د ئەنجاما تەقینا مینه‌كێ دا ژیانا خوە ژ دەست دا.

بارهه‌لگر نەگه‌هشت جهێ ئارمانجێ

دەما بارهه‌لگرا بۆمبەبارکری دچوو سەر رێڤه‌به‌رییا پۆلیسان، د رێکێ دا بوویه‌ره‌كا ترافیكێ كر، خودانێ ترومبێله‌كێ ژ بۆ كو وێ بوویه‌رێ ببینیت ل ناڤا بارهه‌لگرا بۆمبەبارکری ته‌ماشه‌ دكه‌ت و وه‌سا وی بۆمبه‌ دیت، وی یه‌كسه‌ر دا قیران و گۆت «برەڤن بۆمبە هەیە» د ڤێ ناڤبەرێ دا بارهه‌لگرا بۆمبەبارکری هات تەقاندن، واته‌ بەریا کو بگه‌هیته‌ ئارمانجا خوە دهێته‌ تەقاندن، گەر ئه‌و بارهه‌لگر گه‌هشتبا قەرەقۆلێ، ب ئحتیمالەکا مەزن ئەو هه‌ده‌په‌یی یێن د ئاڤاهیێ رێڤه‌به‌رییا دژی ته‌رۆرێ دا هه‌موو دا زیانێ بینن.

هه‌ده‌پێ خه‌لك ده‌رێخستن کۆلانان

هه‌ده‌پێ پشتی بوویەرێ ئالیگرێن خوە رێکرن جهێ کو بارهه‌لگرا بۆمبەبارکری لێ تەقیایی، د رۆژا ئەول دا هه‌ده‌پێ ئدیعا کر کو ئەڤ تەقین ل دژی هه‌ده‌پێ هاتییە کرن، حەسابێن نێزیكی په‌كه‌كێ یێن مەدیایا جڤاکی ئدیعا کر کو ڤێ تەقینێ سه‌لاحه‌ددین دەمیرتاش کرییە ئارمانج.

پشتی بوویەرێ ب رۆژەکێ هه‌ده‌پێ داخویانی دا و ئدیعا کر کو تەقین ژ ئالیێ داعشێ ڤە هاتییە کرن، د داخویانییا هه‌ده‌پێ دا ئەڤ ئاگاهی هاتن به‌لاڤ كرن: «ئەگەر ترومبێلا بۆمبەکری قەزا نەکر با، دا گه‌هیته‌ ئارمانجا خوە، دڤێت هەموو راستیێن ل سەر ڤێ هێرشا بۆمبەیی یا کو ب ئاوایەکی زەلال پلانسازییا وێرانکەریێ بوو، بهێته‌ ئاشکەرا کرن».

سری سورەیا ئۆندەر یێ کو د دەما تەقینێ دا د ئاڤاهیێ دا بوو دیار کر کو ئەڤ تەقین ل دژی وان هاتییە کرن، ئۆندەر د داخویانییا خوە دا گۆت؛ “دەما کو هەڤسەرۆکێ مە سه‌لاحه‌ددین دەمیرتاش د برن دادگەهێ و ئەم د ناڤا وێ ئاڤاهیێ دا بووین، تەقین پێک چێبوو، ئەڤه‌ 26 رۆژن رێڤەبەرێن پارتییا مە ل وێ ئاڤاهیێ د گرتینە، ژ بەر ڤێ یەکێ ئەڤ ئۆپەراسیۆنا كۆمكوژی پڕ ب دیقه‌ت هاتییە حه‌ساب کرن”.

هه‌ده‌پێ بانگ ل هەموو ئالیگرێن خوه‌ کر كارڤه‌دانان ل دژی ته‌قینێ نیشان بده‌ن

ANFێ راگه‌هاند کو ئەڤ بوویەر TAKێ کرییە

د 6ێ مژدارێ دا نووچەیەک د ئانفێ دا دەرکەت و راستییا بوویەرێ زەلال کر، نووچەیا ئانفێ دیار کر کو بوویەر ژ ئالیێ رێخستنا TAK ڤە هاتییە کرن، بەردەوامی ئانفێ نڤیساند کو دێ بوویەر پشترە ل سەر مالپەرا فەرمی یا TAKێ ب بەرفرەهی هێته‌ ڤەگۆتن.

د داخویانییا TAKێ دا هاتە گۆتن کو ئەڤ چالاکی ل دژی ره‌فتارێن ئاکه‌پێ هاتییە کرن، ل گۆری داخویانییا TAKێ، ئەڤ بوویەرە کەسێ ب ناڤێ ئەمراح دایان (کەمال هەککاری) ئه‌نجام داییه‌.

TAK کییە؟

ئەو رێخستنە كو په‌كه‌كێ ژ بەر سەدەمێن سیاسی دامەزراندی، پشتی بریارا 1ێ خزیرانا 2004 یا ژ نوو ڤە دەستپێکرنا شەرێ چەکداری، په‌كه‌كێ پێویستی ب رێخستنەکا بێ ناسنامە یا وەکی TAK دیت و دامه‌زراند.

TAK (تەیرێبازێن ئازادییا کوردستانێ)، د تەباخا 2004ێ دا هاتە دامەزراندن و خوە راگه‌هاند، بەرپرسییارییا کریارێن کو په‌كه‌كێ نەدخواست كارڤه‌دانێن رایا گشتی بكێشیته‌ سەر خوە ب ناڤێ TAK دا هێنە راگه‌هاندن.

ئاگرێ دارستانان، کوشتنا گەشتیارێن بیانی، کوشتنا کەسێن سڤیل و هه‌تا دوماهیێ TAKێ خوە وەکە بەرپرسیار دەستنیشان دکر، لێ TAK تەنێ ناڤێ راگه‌هاندنی بوو، یێن چالاکی دکرن ئەندامێن هێزێن تایبەت یێن په‌كه‌كێ بوون، په‌كه‌كێ چالاکڤانێن خوە یێن باژاران وەک TAK ب ناڤ دکرن، TAKێ د لیستەیا رێخستنێن تەرۆرێ یا ئەمەریکا، بریتانیا و گەلەک وەلاتێن دی دا جهـ گرت.

هەتا سه‌لاحه‌ددین دەمیرتاش ژی ژ بەر زیانێن کو TAKێ د گه‌هاندن سڤیلان، مەجبوور مابوو کو بانگا هلوەشاندنا ڤێ رێخستنێ بکەت، دەمیرتاش بەرییا کو ئەو قەرەقۆلا پۆلیسان یا 4 مژدارێ بوویه‌ ئارمانجا تەقینێ، گۆتبوو؛ “ئەم داخواز دکه‌ین کو رێخستن ب تەمامی دەست ژ كارێن خوە بەردەت و بهێته‌ هه‌لوەشاندن”، پشتی چەند مەهان ڤێ جارێ ئەو بوو ئارمانج.

پشتی ڤێ چالاکیێ، TAKێ د سالا 2017 ێ دا گەلەک چالاکی كرن، پشترە چ چالاکیێن مەزن ب ڤی ناڤی نەهاتن بهیستن، ئێدی ئاگرێ دارستان و کارگەهان رێخستنا ب ناڤێ «زارۆکێن ئاگری» هلدا سەرێ خوە.

دیرۆکا کریارێن تاری

چالاکییا 4ێ مژدارێ د ئەنجاما بێدەنگییا هەڤپارا دەولەت، هه‌ده‌پێ و په‌كه‌كێ ڤە هاتە ژ بیر کرن، مینا گەلەک کریارێن تاری یێن د دیرۆکا په‌كه‌كێ دا قەومین، ئەڤ چالاکی ژی کەتە ناڤا لیستەیا بوویەرێن سەرگرتی.