حکوومەتا ئیراقێ و ئالیێن شیعە رێکەفتن 3 کەسێن کو دەستێ وان د ھەولا کوشتنا سەرۆکوەزیرێ ئیراقێ مستەفا کازمی دا ھەبوویە، تەسلیمی حکوومەتێ بکەن.
دوھی سەرۆکاتیا کۆمارا ئیراقێ، سەرۆکاتیا حکوومەتا ئیراقێ و سەرۆکاتیا ئەنجومەنا دادوەریێ یا وی وەلاتی ل سەر ھەولا کوشتنا سەرۆکێ حکوومەتا ئیراقێ مستەفا کازمی و ئالۆزیێن ئیراقێ جڤیان.
ل گۆری ئاگاھیان، د جڤینێ دا ل سەر وێ یەکێ رێکەفتن ھاتە کرن کو حکوومەت کەسێن تەقە ل خوەپێشاندانا حەشدا شەعبی یا ل بەر ھەرێما کەسک یا بەغدایێ دادگەھی بکەت و ئالیێن شیعە ژی 3 کەسێن کو دەستێ وان د ئێرشا ل سەر مالا کازمی دا ھەبوویە، تەسلیمی حکوومەتێ بکەن.
ل گۆری ئاگاھیان، ئەو سێ کەسێن کو بریارە تەسلیمی حکوومەتێ بێن کرن، گرێدایی گرووپەکێ حەشدا شەعبی نە.
پێر بەربانگێ ب درۆنان ئێرشی مالا سەرۆکوەزیرێ ئیراقێ مستەفا کازمی ھاتبوو کرن و ھەولا کوشتنا وی ھاتبوو دایین.
د وێ ئێرشێ دا تشتەک ب کازمی نەھاتبوو لێ چەند پاسەوانێن وی بریندار ببوون.
ھەولا کوشتنا کازمی د جیھانێ دا دەنگ ڤەدا و راستی نەرازیبوونا توند یا پرانیا وەلاتێن جیھانێ ھات.
چەند رۆژ بەرێ ئالیگرێن حەشدا شەعبی وەک نەرازیبوونا ل ھەمبەر ئەنجامێن ھلبژارتنێن ئیراقێ، ل بەر ناڤچەیا کەسک یا بەغدایێ کۆم ببوون و خوەپێشاندان کربوون. خوەپێشاندان راستی موداخەلەیا ھێزێن ئەولەھیێ ھاتبوو و د وان ئالۆزیان دا ھەری کێم کەسەک ھاتبوو کوشتن و گەلەک کەس ژی بریندار ببوون.
