ئارتێشا ترکیێ دەست ب ئۆپەراسیۆنەکا نوو ل دژی پەکەکێ کر

ئارتێشا ترکیێ  دەست ب ئۆپەراسیۆنەکا نوو ل دژی پەکەکێ کر

وەزارەتا ناڤخوەیا ترکیێ راگھاند کو ئارتێشا وان ب بەشداربوونا 718 سەرباز و ھێزێن ئەولەکاریێ ل چیایێن ئامانۆسێ سەر ب پارێزگەھا ھاتایێ دەست ب ئۆپەراسیۆنەکا نوو ب ناڤێ ئەرەن-زڤستان-2 کریە.

ل گۆری داخویانیا وەزارەتا ناڤخوە، ئارتێشا ترکیێ ل چیایێن ئامانۆسێ یێن سەر ب ھاتایێ ڤە ب بەهانەیا ھەبوونا گەریڵایێن پەکەکێ دەست ب ئۆپەراسیۆنەکا نوو کریە. د داخویانیێ دا دهێتە گۆتن کو ئۆپەراسیۆن ژ ئالیێ فەرمانداریا جەندرمەیان یا وێ ھەرێمێ ڤە دهێتە برێڤەبرن و 718 سەرباز و ھێزێن ئەولەکاریێ تێدا بەشدار بوونە.

ئارتێشا ترکیێ ژ رۆژا 23یێ نیسانا 2020ێ ڤە ئۆپەراسیۆنەکا بەرفرەھ ل ھەرێما کانی ماسێ کو دکەڤیتە ناڤ سینۆرێ باشوورێ کوردستانێ ژی دەست پێ کریە و ھەتا نھا بەردەوامە و رۆژانە ئەو ھەرێمێن سینۆری ژ ئالیێ ئارتێشا ترکیێ ڤە تێنە تۆپباران و بۆمبەبارانکرن.

زێدەتری 20 سالانە ب بەهانەیا ھەبوونا گەریلایێن پەکەکێ ل سینۆرێ پارێزگەھا دوھۆکێ، ترکیا بەردەوام ئێریشێن ئەسمانی و بەژایی تینە سەر ناڤچەیێن سینۆر، ھەتا نھا ھێزێن ترکیێ ب کووراھیا 30 ھەتا 45 کیلۆمەترا دەرباسی ناڤچەیێن سینۆری یێن ناحیەیێن دێرالوک، شێلادزێ، کانی ماسێ، باتیفا و دەرکارێ ل سینۆرێ ھەردو قەزایێن ئامێدی و زاخۆیێ بوونە و ل 38 جھێن ستراتەژیک بجیھ بوونە.

ژ بەر وان ئێرشان، تەنێ د 3 سالێن بۆری دا زێدەیی 34 وەلاتیێن پارێزگەھا دوھۆکێ جانێ خوە ژ دەست دانە و ھەژمارەک کەس ژی بریندار بوونە، ھەروەھا زەرار گەھشتیە نێزیکی 450 گوندان و 372 گوند ژی ل سینۆرێ پارێزگەھا دوھۆکێ ڤالا بوونە.