سەرۆکوەزیرێ هەرێما کوردستانێ مەسروور بارزانی د چارچۆڤەیا پانەلەکێ دا ل کۆربەندا ئاشتی و ئاسایيشا رۆژهلاتا ناڤین يا ل زانینگەها ئه‌مەریکی – کوردستانێ ل دهۆکێ راگه‌هاند: «پرسا کۆچبەران ژ بۆ مە جهێ نیگەرانییا کوورە، سەلامەتییا کۆچبەرێن کورد ل سنۆرێن ئەورۆپایێ ژ بۆ مە گرینگە».
سەرۆکوەزیر مەسروور بارزانی دیار کر: «ئاخافتنا ل سەر مژارا کۆچبەرێن ل بیلارووسێ ژ بۆ مە جهێ نیگەرانییا کوورە، سەلامەتییا وان کۆچبەرێن ل سەر سنۆر و ل وان دارستانان ژ بۆ مە خالا پێشینەیە، گەلەک کەسن، ژ وەلاتێن جودا جودا هاتنە، ل وێرێ ئاسێ مانە، لێ بەلێ خەلکێ کوردستانێ ژی تێدا هەیە».
مەسروور بارزانی دەستنیشان کر: «مخابن ئەو کەس هاتنە خاپاندن ژ ئالیێ چەند گرووپان ڤە، کو بازرگانیێ ب مرۆڤان دکه‌ن، هەژمارەک گرووپێن تایبەتن، هندەک کەسێن دن ژی ژ دەرڤە و بیلارووسێ دەستێ وان د ڤێ قەیرانێ دا هەیە، ئەو کەس ژ ڤێرێ ژ بەر چ زەختەکێ نەچوونە، وان ب ئاوایەکی گەلەک یاسایی سەره‌دانا وان دەڤەران کرنە، چ هێلەکا ئەسمانی گەشتا وان قەدەخە نەکرییە، کەس رێ ل بەر وان ناگریت کی گەشتێ دکەت، وان ب ئاوایەکی ئازاد گەشتا خوە کرنە».
هەروه‌ها دا زانین: «ب مخابنی ڤە رەوش ل وێرێ گەلەک سارە، مە هندەک وێنە ل سەر ئەکرانان دیتن، ژ بۆ من جهێ نیگەریانیێ یە، ب تایبەتی زارۆکێن ل وێرێ، ئەو زارۆک بێتاوانن، مخابن ئەو زارۆک باجا ململانێ یا سیاسی دده‌ن، مە پێوەندی پێک ئانیە، ئەم ب ئالیێن پێوەندیدار را کەتنە تێکلیێ و ژ بەغدایێ هەتا وەلاتێن دن، دا کو ئەم رێیەکێ ببینن، ئەوێن دخوازن ب سەلامەتی ڤەگەرن، مە ژ هەڤکار و هەڤبەشێن خوە داخواز کرییە کو بلەز هاریكاریێ بگه‌هینن وان کەسێن ل وێرێ ئاسێ مانە، گەلۆ ئەو ڤەدگەرن یان دچن جهەکی دی، پرسا گرنگ ئەڤ نینە، ئەم چاڤەرێیا ڤەگەرا وان دکه‌ین، تشتێ گرنگ کو ئەز ل ڤێرێ ببێژم، مخابن هندەک زانیاریێن نەراست هاتنە بەلاڤکرن، چما ئەو چوونە و چما ل وێرێنه، پرانیا وان ب ئاوایەکی ئازاد گەشت کرینە، ژ کوردستانێ چوون و چ قەدەخەکرنەک ل کوردستانێ نینه، کوردستان جهەکی ئارامە، ژ بۆ ژیانێ ئاساییش تێدایە».
سەرۆکوەزیر مەسروور بارزانی بال کشاند سەر ئاوارە و پەنابەرێن ل هەرێما کوردستانێ و دیار کر: «مە جهـ دانە زێدەتری ملیۆنەک ئاوارەیان، مە هەمبێزا خوە ژ بۆ وان ڤەکر، کو ژ وەلاتێن جودا جودا هاتنە، ئەو نەچوون جهەکی دن و هاتن کوردستانێ، چمکی ئارامی حه‌ز کرن، له‌وما چ واتە نینه کو ببێژن ئەو کەس ژ بەر نەئارامیێ کوردستان ب جهـ هێلانه، لێ بەلێ تشتێ تێ گۆتن ئەو کەس ل پەی دەرفەتێن دن دگەرن، هندەک کەسێن دن دبێژن ئاسایی یە کو ئەو بچن، چمکی کێشەیا دارایی هەیە، دبیت کو ئەڤ راست بیت، لێ بەلێ قەیرانا دارایی خەلەتییا حکوومەتا هەرێما کوردستانێ نینە، وەکە هوون ژی دزانن کێشەیا مە ل گەل بەغدایێ هەبوو، کو ب سالانە، ژ سالا 2020 و 2021ێ زێدەتر، د 12 مەهێن وان هەر دو سالان دا بودجەیا هەرێما کوردستانێ ژ بەغدایێ نەهات، تەڤی وێ قەیرانا کۆرۆنایێ ژی ل ئابۆریا مە دا، ئابۆریا کابینەیا نەهەما حکوومەتا هەرێما کوردستانێ تووشی قەیرانێ بوو، دەرفەتێن کار کێم بوونە، بەغدایێ ژی پارە نەدشاند، گەفەکا مەزن ل سەر مە بوو، لێ بەلێ مە کاری خەباتێن خوە بدۆمینن و دەست ب چاکسازیێ بکه‌ن، بەلێ مە نەکاری مووچەیێن هەموویان وەک پێویست بده‌ن، لێ بەلێ مە ل گۆر پارێ ل بەر دەستێ مە بوو مە مووچە دان».
دەرفەتێن کار د سەردەما کابینەیا نەهەم دا
ل سەر پرسا دەربارێ خەباتێن کابینەیا نەهەم و پێکانینا دەرفەتێن کار ژ بۆ گه‌نجان، مەسروور بارزانی دیار کر: «ژ وێ دەما کو کابینەیا نه‌هه‌م دەست ب کار کرییە، مە هەتا نها زێدەتری 120 هەزار دەرفەتێن کار پێک ئانینە، د سه‌كته‌رێن تایبەت و پرۆژەیێن جودا دا، بەشەک ژ وان حکوومەتێ دابین کرنە، بەشەکێ دن ژی سەکتۆرێن جودا دابین کرنە، کو ب سپۆنسۆریا حکوومەتا هەرێما کوردستانێ بوویە، ب راستی دەرفەت هەیە کو خەلکێن دی ژی کار بکه‌ن، ئەگەر بالا خوە بده‌ن، خەلکێ ژ ئاسیا، فلیپین و چەند دەرێن دن هاتنە و ل هەرێما کوردستانێ كار دكه‌ن، خەلک هەنە ژ لوبنان، ئەفریقا، ترکیە، ئیران و چەند بەشێن دن یێن ئراقێ هاتنە هەرێما کوردستانێ و کار ب دەست خستنە، برایێن مەیێن عەرەب هاتنە و کار کەتیە دەستێ وان، چما خەلکێن بیانی دکارن ل هەرێما کوردستانێ کار ب دەست بێخن، لێ خەلکێ مە نکارە، ب راستی ئەڤ پرس ب کارێ کو خەلک دخوازن ڤە گرێدایی یە، ئەگەر تو دخوازی کارەکی باش بکەڤیتە دەستێ تە، دڤێت ل پەی دەرفەتێن جودا بگەری، ئەز خوازیارم ئەڤ مژار ژ خەلکێ رە وەرە زەلالکرن».
“کەسێن بخوازن ڤەگەرن، ئەم دێ وان بینن”
مەسروور بارزانی دەستنیشان کر: «ئەز دخوازم زانیاری ب ئاوایەکی خەلەت نەگه‌هیتە خەلکی، ژ بۆ کو بەر چاڤێ خەلکی زەلالی هه‌بیت، سەدەما ڤێ کۆچبەریێ چیە؟ هندەک کەس دچن ل دەرفەتێن دن دگەرن، نابیت هوون ببێژن رەڤیانە، ئەگەر بچن و هەر دەما بخوازن ڤەگەرن، هەرێما کوردستانێ مالا وانە، ئەم د خزمەتا وان دا نه، ئەم دکارن ببێژن کو هندەک ژ وان کۆچبەران ب دەهـ هەزاران دۆلار دانە کۆمپانیێن گەشتیاریێ، هندەک کەسان ئەڤ رەوش ژ بۆ مەبەستەکا دیارکری ب کار ئانییە، وان کەسان ب کار تینن، ئەگەر کەسەکی کو ئەو قاس دۆلارێن وی هه‌بن، دکاریت دەرفەتەکا كارری ژ بۆ خوە ببینیت، مە دیتیە کو خەلک ل سلێمانی، هەولێر و دهۆکێ پیشەسازیێن بچووک ئاڤا کرنە، نها ئەم ل گەل حکوومەتا فەدەرال كار دكه‌ین، مە هندەک دەستپێشخەری کرنە، کەسێن بخوازن ڤەگەرن، ئەمێ وان بینن».
“بارێ ملیۆنەک ئاوارە ل سەر ملێ کابینەیا نەهەمە”
ل سەر ئابۆریا هەبوونا ئاوارەیان ل هەرێما کوردستانێ، مەسروور بارزانی دەستنیشان کر: «ئەم ژبیر نەکه‌ین کو ملیۆنەک ئاوارە ل هەرێما کوردستانێ هەنە، بارێ وان ل سەر ملێ مەیە، حکوومەتا فەدەرال ئەڤ یەک نەکر، هەر چقاس حکوومەتا فەدەرال پاره ژ بۆ کامپان خەرج کربیت ژی، ئەڤ گەلەک گەلەک کێمە، له‌وما ژ بلی هندەک رێخستنێن مرۆڤی و ناڤدەولەتی کو کار کرنە، بارێ گران و خوەدیکرنا ئاوارەیان ل سەر ملێ حکوومەتا هەرێما کوردستانێ یە».
“بەغدایێ چ جار %17ێ ژ بودجەی بۆ هەرێما کوردستانێ نەشاندییە”
سەرۆکوەزیرێ هەرێما کوردستانێ مەسروور بارزانی دەربارێ بودجەیێ دا دیار کر: «بەریا نها ئەم چەندین جار ل سەر ڤێ یەکێ ئاخڤینە، هەرێما کوردستانێ چ جار %17ێ بودجە وەرنەگرتییە، هەتا دەما رەوشا ئابۆریێ گەلەک باش بوو ژی، تێ گۆتن حکوومەتا هەرێمێ ژ سەدی 17ێ بودجەیێ وەرگرتییە، حکوومەتا هەرێما کوردستانێ چ جار ب ڤێ رێژەیێ بودجە وەرنەگرتییە».
“دەستهلاتا نها یا رۆژئاڤایێ کوردستانێ بەردەواما په‌كه‌كێ یە”
ل سەر پرسا مان و ڤەگەرا کوردێن رۆژئاڤایێ کوردستانێ کو پشتی ئێریشا ترکیێ د سالا 2019ێ دا ب سەر رۆژئاڤا دا کر و گەلەک کەسان خوە سپارتن هەرێما کوردستانێ، سەرۆکوەزیر مەسروور بارزانی دیار کر: «ئەو ڤەنەگەریانە، تەنێ کێم کەس ڤەگەریان، پرانییا وان مان، سەدەم ژی ئەوە کو ئەو ژ بەر شەرێ داعشێ رەڤیان، لێ بەلێ مانا وان ژ بەر شەرێ داعشێ نینە، ئەو وه‌سا دفکرن کو سیستەما نها یا ل رۆژئاڤایێ کوردستانێ هەڤبەش و بەردەواما په‌كه‌كێ یە و ئەو ئارامیێ نابینن، له‌وما ڤەنەگەریانە».
