ئسرائیل سپاسییا ئەردۆگان دکەت

ئیسرائیل سپاسییا ئەردۆگان دکەت

ئسرائیل پشتراست کر کو سەرۆکێ وێ ئیشاق هەرزۆگ، سپاسییا سەرۆکۆمارێ ترکیێ رەجەپ تاییپ ئەردۆگان کر ژ بۆ بەشدارییا وی د ئازادکرنا دو كه‌سێن ئیسرائیلی دا کو ل وەلاتێ وی ب تۆمەتا سیخۆریێ هاتبوون بنچاڤکرن.

حکوومەتا ئسرائیلی ئیرۆ پێنجشەمێ د داخویانیەکێ دا راگه‌هاند، کو هەرزۆگ، د پێوەندیەکا تەلەفۆنی دا ل گەل ئەردۆگان، كو د “كه‌شه‌كێ ئەرێنی دا” دەرباس بوو، سپاسییا سەرۆکۆمارێ ترکیێ کر ژ بۆ ئالیکاری و بەشدارییا وی یا شەخسی ژ بۆ ڤەگەرا هه‌ردو هەڤژینان «ناتالی و مۆردی ئۆکنین» بۆ وەلاتێ وان ئیسرائیلێ.

ئەڤ هەڤژین بەری نها ل ترکیێ ب تۆمەتا سیخۆریێ هاتبوون گرتن، ژ بەر کو وێنەیێ جهێ روونشتنا ئەردۆگان کشاندبوون.

د داخویانیێ دا هات دەستنیشانکرن کو ئەردۆگان بال کشاند سەر گرنگییا په‌یوه‌ندیێن دگه‌ل ئیسرائیلێ کو ژ بۆ ئاشتی، ئیستقرار و ئەولەهییا رۆژهلاتا ناڤین گرنگن.

ل گۆری داخویانیێ، هەرزۆگ پێشوازی ل هەولا ترکیێ و ئسرائیلێ یا ژ بۆ دیالۆگەکا بەرفرەهـ ل سەر دۆسیایێن دوئالی و هەرێمی یێن گرێدایی ئاشتییا ل هەرێمێ کر و هەر دو سەرۆکان لهه‌ڤ كر كو ئه‌و به‌رده‌وام په‌یوه‌ندیێ ب هه‌ڤ بكه‌ن.