پارلامەنتەرێ جەهەپێ یێ ستەنبۆلێ توران ئایدۆگان دیار کر کو ل ترکیا و باکورێ کوردستانێ نێزیکی 345 زارۆک و 780 پتک ب نەچاری لگەل دایکێن خوە د گرتیگەھان دا دمینن و گۆت، پێشنیارا وان بۆ سەر راستکرنەکا یاسایی چێبوویە لێ دەستھلاتێ قەبوول نەکریە.
پارلامەنتەرێ پارتیا گەلا کۆماری (جەهەپێ) توران ئایدۆگان ب ھەلکەفتا 20ێ مژدارێ رۆژا مافێن زارۆکان یا جیھانی داخویانیەک دا. ئایدۆگان دبێژیت ل گۆر ئامارێن وەزارەتا دادێ یا ترکیێ یێن 2021 نێزیکا 345 زارۆک و 780 پتک لگەل دایکێن خوە د گرتیگەھان دانە و ئاماژە ب وێ یەکێ دا کو ئەو ب تایبەت ب مژارێن وەک ھەژارتیا زارۆکان، زارۆکێن نەچار دبن تاوانان دکەن، زارۆکێن د گرتیگەھێ دا، زارۆکێن کارکەر و کارپیکرنا زارۆکان ڤە پەیوەندیدار دبن.
ئایدۆگان دا زانین کو ل ترکیێ زارۆک رووبروویێ گەلەک زەحمەتیان دبن و گۆت: “ل گۆر ئامارێن سازیا ئاماران یا ترکیێ (TUIK) یێن ئادارا 2021ێ ل ترکیێ 720 ھەزار زارۆکێن تەمەنێ وان د ناڤبەرا 5 و 17 سالی دا نەچار دبن کار بکەن. ھەروھا 1.5 ملیۆن زارۆکێن خوەندەکارێن کو شاگردیێ دکەن و پەروەردەیا پیشەیی دبینن ل ڤان ئاماران نەھاتنە زێدەکرن. وی دەمی مرۆڤ ب گشتی دکاریت ببێژیت ھەری کێم 2 ملیۆن زارۆک کار دکن.”
ل گۆر ئامارێن دەستەیا ئەولەکاریا کار و تەندرووستیا کارکەران (ISIG)ێن 2021ێ ژ سەدی 30.8ێ زارۆکان د سەکتۆرا چاندنیێ، ژ سەدی 23.7 د سەکتۆرا پیشەسازی و ژ سەدی 45.5 ژی د سەکتۆرا خزمەتکرنێ دا ناچار دمینن کو کار بکەن
