کی بەشداری خوەپێشاندانێن خوەندەکاران ل سلێمانیێ بوو؟

کی بەشداری خوەپێشاندانێن خوەندەکاران ل سلێمانیێ بوو؟

خوەپێشاندانێن خوەندکاران کو بەرییا 2 رۆژان ل باشوورێ کوردستانێ دەست پێ کربوون بەردەوامن. خوەپێشاندانا کو ژ بۆ ڤەگەراندنا دەرمالێن کو بەرێ ب خوەندەکاران دھاتنە دایین ل سلێمانیێ دەست پێ کر.

لێ رەنگ و ئارمانجا ڤێ خوەپێشاندانێ ژ ئالیێ هندەک ئاژاوەگێران ڤە هاتە گوهرین. ب تایبەتی رۆژا سێشەمێ، کارێن نەیاسایی یێن وەکو ھێرسبوون، زیان گەھاندنا ب مال و ملکێن گشتی، پێویستیا جوداکرنا خوەپێشاندەران ئاشکەرە کر. داخوازێن مافدارێن خوەندکاران د بن سێبەرا ئیستیفزازێن کەسێن کو د ھلبژارتنێن 10ێ جۆتمەھێ یێن ئیراقێ دا تێکچووین ژ بۆ وان ڤەگەرییا قادا تۆلھەلدانێ.

داخوازێن خوەندکاران

ئەڤە چەندین سالن کو حکوومەتا ھەرێما کوردستانێ ژ بلی ئیمکانا بەشێن ناڤخۆیی، بێیی کو چ جوداھییەکێ بکەت، دەرمالە ژی ب ھەر خوەندەکارەکی زانینگەھێ ددان. پشترا، دەما کو حکوومەتا ناڤەندی بوودجەیا ھەرێما کوردستانێ بری و پرسگرێکێن دارایی ژ بۆ حکوومەتا هەرێمێ چێبووی، ئەڤ دەرمالە هاتنە راگرتن. د دەستپێکا پەروەردەھیا ئەڤ سالە دا خوەندکاران ژ بۆ کو حکوومەت جارەکا دی مووچە بدەتە وان خوەپێشاندانەک ئەنجامدا.

لێ بوویەر ژ نیشکا ڤە بەر ب ئالۆزی و ئێریشکاریێ ڤە چوو. خویایە کۆمەک سیاسەتمەدارێن کو دخوازن ژ ڤێ خوەپێشندانێ سوود وەرگرن ھەنە کو نە خوەندەکارن و دخوازن تۆلا خوە ڤەکەن.

ھەڤالبەندیا خەرابکاران

د ناڤەندا بوویەرێن خوەندکاران دا، ھندەک لایەن و کەسێن کو ھەم هەڤپەیمانی گرێدایە، ھەم ژی ب ھێرسا تێکچوونێ ئێریشکار بوون ھەنە. د ناڤ ڤان دا ناڤێ سەرەکی نوەی نووێ، تەڤگەرا شاسوار عەبدلواحد و ل کێلەکا وێ ژی پەکەکە یە. کۆمەلا ئیسلاما کو عەلی باپیر سەرۆکاتیا وێ دکەت و د ھلبژارتنان دا نەکاری پەرلەمانتارەکێ ژی سەربێخیت ژی لگەل ڤان ھەر دو ئالیان دا تەڤدگەریت. ھەلبەت لاھوور جەنگی ژی ھەیە کو نکاریبوو ئاشکەرا تەڤبگەریت لێ دیسا ژی پشتگریێ ددەتە بوویەرێن وێرانکاریێ.

د ناڤا زانیاریێن ب دەست مە کەتین دا، پەکەکێ بەشەک ژ وان 2-3 یەکینەیێن ھێزێن کو بەرێ ل دەردۆرا گەرمیان و کەرکووکێ د بن ناڤێ خوەپاراستنا جەوھەری دا بجیهـ کربوون، ئانینە سلێمانیێ. یا راستی ئەڤ کۆمێن چەتەیێن کو ژ ئالیێ پەکەکێ ڤە ھاتنە پەروەردەکرن، پێکھاتەیا سەرەکی یا ئالۆزی و خرابکاریێ نە.

عەلی باپیر ژی بەشداری چالاکیان دبیت، ب تایبەتی ژی ل ھەلەبجە کادرۆیێن خوە تەڤلی چالاکیان دکەت.

ل ئالیێ دی، نەوێ نووێ ھەیە. تەڤگەرا شاسوار عەبدلواحد، کو دەیندارێ حکوومەتا ھەرێما کوردستانێ یە و ھەر دەما کو بابەتێ دەینێن وی دەرکەڤیتە پێش، ب رێیا پارتیا خوە ھەول ددەت، ڤی بابەتی پەردەپووش بکەت، لەوما ژی ھێزا سەرەکی یا ڤان ئالۆزییان ئەڤ راستییە یە. د ڤێ مژارێ دا شاسوار و پەکەکە د ناڤا ھەڤکاریەکا مەزن دا نە. د تەڤاھیا خوەپێشاندانان دا رۆژ نیوس یا پەکەکێ و ئێن ئار تی یا  شاسوار وەشانێن ھەڤبەش دکەن. ھەر دو لایەن ژی ھەولدانەکا تایبەتی دا کو ڤان بوویەرێن خەرابکار ل دەرڤەیی ھەلوەستا خوە ڤەبێژن. ژ بۆ ڤێ یەکێ ژی ئاگاھیێن درەو بەلاڤ کرن.

چاپەمەنیا پەکەکێ ئەڤ بوویەرە ئانیە ئاستەکێ ووسا کو د ناڤبەرا ڤێ بوویەرێ و بلندبوونا بهایێ دۆلاری و هەلکشانا ل ترکیەیێ و خوەپێشاندانێن سلێمانیێ دا تێکلیەکا کو ناهێتە فێمکرن چێبکەت. وەکە ھەر جار ھەول دا بوویەرێ وەکە پرسگرێکا پەدەکێ نیشان بدەت، نە وەکە پرسگرێکا حکوومەتێ.

دەما دەسپێکرنا ڤان بوویەران گەلەک بالکێشە

ھەر وەلاتیەکێ ماف ھەیە کو د چارچۆڤەیا قانوونان دا خوەنیشاندانا ئەنجام بدەت. ژ بۆ خوەندکاران دەستڤەئینانا ڤی مافی واتادارترە. ئەرکێ حکوومەتێ یە کو گوھ بدەتە پێدڤییێن خوەندکاران و گوھداریا وان بکەت. لێ بەلێ دڤێت رێک نەهێتە دایین کو ب بەهانەیا خوەپێشاندانا شەوتاندن، ھەلوەشاندن و ئێریشی سەر سازی و دەزگەھێن حکوومی بهێتە کرن. ب تایبەتی ژی ناهێتە قەبوولکرن کو هەڤپەیمانیەکا خراب داخوازێن خوەندکاران ژ بۆ ئارمانجێن خوەیێن سییاسی بکەتە ئاموورەکێ خەرابکاریێ.

ھێژایی گۆتنێ یە کو ئەڤ یەک ژی مە ددەتە فکراندن کو ھێزێن دی ل پشت ئاژاوەگێریێن د ناڤا خوەپیشاندانا خوەندەکاران دا هەنە، ب تایبەتی ل ڤی دەمی کو مژارا چاوانیا ئاڤاکرنا حکوومەتا داهاتی یا ئیراقێ و دانووستاندنێن لگەل کوردان دا د نها دا بابەتێ سەرەکی و گەرمە.

ئیرانێ ژ بۆ رێگریکرن ل ئاڤا کرنا حکوومەتا نوو ل ئیراقێ ئاژاوەگیریێن مەزن چێدکەت. د خوەپێشاندانێن بەغدایێ دا کوشتنا 3 کەسان و ئێرشکرنا سەر سەرۆکوەزیر کازمی ھەموو ژ ئاژاوەگیریێن ئیرانێ بوون. دهێتە زانین کو ئیران ھەول ددەت ھەرێما کوردستانێ ژی بکەتە ناڤا ڤێ پێڤاژۆیا ئالۆزییێ دا. ھەر سێ ھێزێن کو خوەپیشاندانێن خوەندکاران بەر ب ئاژاوەگیریێ ژی بری، لگەل ئیرانێ دا ھەڤکار و پەیوەندیدارن.

ژ بۆ ڤێ یەکێ ژی دڤێت داخوازێن راستی یێن خوەندکاران و ئاژاوەگێر ژ ھەڤ بێنە جوداکرن و ب رایا گشتی بهێتە نیشاندان کو بنیاتێ مژارێ چیە. ژ بەر کو کەسێن خوە پشت ڤان داخوازیێن خواندەکاران ڤەشارتی، ئارمانجا وان تەنێ ئەوە خوەندکاران وەکە ئاموور ژ بۆ خوە بکار بینن و ھەری زێدە ژی خوەندکار دێ د ڤی بابەتی دا مەخدوور ببن.

لاهۆر جەنگی و پەکەکە و یەکینەیێن شەوتاندنا ئالایێ کوردستانێ و سازیێن حکوومی

یا راست د رۆژا یەکەم دا خوەندکاران ب ئاوایەک نۆرمال و دوور ژ ئاژاوەگێریێ داخوازێن خوە بەیان کرن، لێ پشترا هندەک کەس و ئالیێن سیاسی خواست بکەڤنە ناڤا ڤان خوەپێشاندانان دا و ژ بۆی بەرژەوەندیێن خوە بکار بینن، یەک ژ وان لاهۆر جەنگی بۆرهان هەڤسەرۆکێ ژ کاردەرکری یێ یەنەکێ بوو، لاهۆر ب هاریکارییا پەکەکێ تەڤ لایەنگرێن خوە و پەکەکێ خستن ناڤا خوەپیشاندانا خوەندکاران دا ژ بۆی کو خوەپێشاندانا بەر ب ئالۆزی و تەڤلیهەڤییان ببەن و ب ڤی ئاوا ژ ئالیەکێ گڤاشێن ل سەر حکوومەتا هەرێما کوردستانێ زیدە بکەت و ژ ئالیەکێ دی ژی ووسا بدەتە خویا کرن کو هێژ هیزا وی هەیە و دکاریت ب رێیا خوەپێشاندانان ئالۆزییان ژ بۆی یەنەکێ و رایەدارێن وێ دروست بکەت.

ل گۆر ئاگاهیێن تایبەت یێن کو ب دەست مە کەتین، تو یەک ژ وان گەنجێن ب بنپێکرنا ئالایێ کوردستانێ و شەوتاندنا سازیێن حکوومی وحیزبی رابووی خوەندکار نینە، بەلکو ئەو ئەندامێن یەکینەیێن پاراستنا جەوهەری نە کو ژ هێلا پەکەکێ ڤە هاتنە ئەرکدارکرن، لێ ئەڤ جارە ئەو ل سەر ناڤێ “بزاڤا تشرینێ” تەڤ دگەرن و د داخویانیا وان دا ئەڤ یەک ب زەلالی خوەیا دبیت کو چێکری و ئالگرێن پەکەکێ نە، ژبەرکو د یەکەم داخویانا خوە دا باسی شەوتاندن و ئێریشێن ل سەر ئاڤاهیێن حکوومی و حیزبی ل هەرێما کوردستانێ و هلگرتنا چەک ل دژی حکوومەتا هەرێمێ دکەت، ئەڤ یەک ژی ب زەلالی چەندین جاران ژ ئالیێ پەکەکێ هاتیە ئەنجامدایین و ب بەلگە ڤە هاتیە ئیسبات کرن، باشترین بەلگە ل سەر ڤێ یەکێ ژی خوەپێساندانێن بەرێ یێن هەرێما کوردستانێ بوون، دەما یەکینەیێن چێکری یێن پەکەکێ باژار ب باژار دگەرییان و سازیێن میری د شەوتاندن، تستا هەری بالکێش و دوور ژ ئەخلاق کو ژ بلی پەکەکێ و ئالیگرێن وێ هیچ کەسەک دی نە جورئەت دکە و نە ژی قەبوول دکەت، بن پێ کرنا ئالایێ کوردستانێ بوو. چەندین لایەنگرێن پەکەکێ کو روویێ خوە ڤەشارتیە ب راخستنا ئالا کوردستانێ ل سەر ئەردێ، شۆفێرێن ترۆمبێلا ناچار کرن ب سەر وی ئالا دا بچن.

ئەڤ بوویەرە ب زەلالی خوەیا دکەن کو پەکەکە ب هێسانی دەست ژ قەیوومێ خوە یێ د ناڤا یەنەکێ دا ئانکو “لاهۆر جەنگی بۆرهان” بەر نادەت و دێ هەر کارەکی ئەنجام دەت دا کو دیسا دەستهەلاتێن قەیوومێ خوە ڤەگەرینیت.