ل ترکیێ پەروەردەیا ئیسلامی ژ بۆ زارۆکێن 4-6 سالی بوو نەچاری

 ل ترکیێ پەروەردەیا دینی ژ بۆ زارۆکێن 4-6 سالی یێن قۆناغا باخچەیێ زارۆکان بوو نەچاری.

رۆژا ئینێ 3یێ کانوونا 2021ێ د رۆژا داوییا شوورایێ دا، پێشنیارەک خستە دەنگدانێ کو ژ ئالیێ سەرۆکاتیا کارووبارێن ئۆلی یا ترکیێ ڤە ھاتبوو ئامادەکرن و بەرێ ل کۆمسیۆنا پەروەردەیا ئۆلی ڤە ھاتبوو رەدکرن.

سەندیکایێن پەروەردەیێ ھەر ژ دەستپێکێ ڤە ئەو پێشنیار رەد کر کو دەرسا ئۆلی بکەڤیتە ناڤ بەرنامەیێ خوەندنێ ژ بۆ زارۆکێن تەمەن 4-6 سالی د قۆناغا باخچەیێ زارۆکان دا و وەک نەرازیبوونێ 20ەمین شوورایا پەروەردەیێ بایکۆت کر.

د رۆژا داوی یا جڤینا شوورایا پەروەردەیا مللی یا ترکیێ دا، ژ 124 ماددەیێن کو دەنگدان ل سەر وان ھات کرن، 17 ژێ ب پرانیا دەنگان و ماددەیێن دی ب ھەموو دەنگان ھاتن پەسەندکرن. پێشنیارا خوەندنا قورئانێ بۆ زارۆکێن تەمەن 4-6 سالی ب پرانیا دەنگان ھات پەسەندکرن.

سەندیکایا پەروەردێ یا ترکیێ ئەو بریار شەرمەزار کر و گۆت: “چ بەهانەیەک نینە، پەروەردەیا دینی ژ بۆ زارۆکێن تەمەن 4-6 سالی د قۆناغا باخجەیێ زارۆکان دا ببیتە نەچاری، بەرەڤاژیا بنگەھێن سەرەکی یێن پەیماننامەیا مافێن زارۆکانە و ئەم دێ ب ھەموو ھێزا خوە ل دژی راوەستین.”

20ەمین شوورایا پەروەردەیا مللی یا ترکیێ پشتی دەرباسبوونا 7 سالان د رۆژێن 1-3ێ کانوونا 2021 دا ل ئەنقەرەیا پایتەختا ترکیێ ھات ئەنجامدان.