پەکەکە سڤکاتیێ ب وان 10 پێشمەرگەیێن ل گوندێ خدرجە شەھید بووین دکەت

شەڤا 2ێ مژدارێ د ئەنجاما ئێرشا تەرۆریستێن داعشێ دا ل گوندێ خدرجە یێ سەر ب چیایێ قەرەچووخ یێ سەر ب سینۆرێن ئیدارەیا مەخموورێ ڤە، 10 پێشمەرگە و 3 وەلاتیێن سڤیل شەھید بوون. بوویەر ل کوردستانێ بوو سەدەما نەرازیبوونێ. ھەموو ئاستێن ئیداری یێن ھەرێما کوردستانێ و ھێزێن پێشمەرگە ژ نێزیک ڤە بوویەر شۆپاندن، سەردانا جھێ بوویەرێ و برینداران کرن و ژ بۆ زێدەکرنا ئەولەھیێ بریار دان.

ئێریشا ل سەر گوندێ خدرجە ژ ئالیێ نەتەوەیێن یەکبوویی، رۆژھلاتا ناڤین و وەلاتێن ئەورۆپایێ ڤە ژی ھات شەرمەزارکرن. پەکەکە تاکە ھێز بوو کو ئەڤ بوویەرە ژ بۆی خوە کریە ئالڤێ پرۆپاگاندایێ و ھەول دا قازەنجێ ب دەست بێخیت.

مەدیایا پەکەکێ ئەو بوویەر وەک دەرگەھەک ژ بۆ سڤکاتیکرن ب پێشمەرگە و ھەرێما کوردستانێ و بەلاڤکرنا دەزەنفۆرماسیۆنێ ب کار ئانی.

پێشمەرگە د بەشا سۆرانی یا مەدیایا پەکەکێ دا ب شەهید و د بەشا ترکی دا ب مری هات بناڤکرن

چاپەمەنیا پەکەکێ ل گۆری تەماشەڤانێن کو وێ دشۆپینن ب شێوازێن جودا بوویەر ڤەگۆت. رۆژ نیوسا پەکەکێ کو ل سلێمانیێ وەشانێ دکەت، ب تێگەهشتن ژ هەستیاریا گەلێ باشوورێ کوردستانێ ل سەر پێشمەرگەیان، د بەشا سۆرانی دا ناچار مابوو کو پێشمەرگەیان ب “شەھید” ب ناڤ بکەت.

د ھەمان مالپەرێ دا، د بەشا ترکی و کورمانجی دا ژی ھات گۆتن کو پێشمەرگە مرنە. بەشا ترکی یا رۆژ نیوس ژ ئالیێ خەباتکارێ پەکەکێ سەییت ئەڤران ڤە دهێتە برێڤەبرن. سەییت ئەڤران ب نووچەیێن خوە یێن ل دژی ھەرێما کوردستانێ دهێتە ناسکرن. ئەو ب سەردانا ناڤچەیێن وەکە کەرکووک و خورماتوو کو حەشدا شەعبی تێدا دەستهلاتدارە، نووچەیان چێدکەت.

سەییت ئەڤران، خەباتکارێ چاپەمەنیا پەکەکێ یێ حەژێکەرێ ئیراقێ

د 16ێ جۆتمەھێ دا دەما کەرکووک ھاتیە داگیرکرن سەییت ئەڤران د ناڤا ھەشدی شەعبی دا نووچە چێدکرن. سەییت ئەڤرانێ کو “ئەڤیندارێ ئیراق و حەشدا شەعبی یە” ب نووچەیێن خوە گەلەک جاران پێشنیارێن خوە پێشکێشی حکوومەتا ئیراقێ کرنە. یەک ژ ڤان پێشنیاران ژی د دەما سەردانا مەسعوود بارزانی یا د مژدارا 2018ێ دا بۆ بەخدایێ ھاتبوو کرن. سەییت ئەڤران د وێ نووچەیا نڤیساندی دا گۆتبوو کو ژ بەر رەفەراندووما سەرخوەبوونا کوردستانێ بریارا گرتنا مەسعوود بارزانی ژ لایێ دادگەها ئیراقێ ڤە هاتیە دایین، وی نڤیساندبوو بۆچی مەسعوود بارزانی ل بەغدایێ نەھاتە گرتن، ئەڤ رەوشە دێ پاشەرۆژا ئیراقێ ئێخیت مەترسیێ دا. د ڤێ نووچەیێ دا و ب پێشنیارکرنا گرتنا سەرۆکەکێ کورد ژ لایێ ئیراقێ ڤە حەزکرنا سەییت ئەڤرانا ژ بۆ ئیراقێ دەرکەت هۆلێ.

سەییت ئەڤران روویێ خوەیایێ خەباتا مەدیایا پەکەکێ یە. ئەو تەنێ یەک ژ روویێن ئاشکەرایێن کەرب و کین و دژبەریا پەکەکێ یا ل دژی کوردستانێ و کەسێن وولاتپارێزە.

ئۆزگۆر پۆلتیکا ژ مرنێ مفا وەردگریت

ANF ​​کو یەک ژ سازیێن چاپەمەنیا پەکەکێ یە ژ بلی نووچەیێن شەڤا ئەول چێکری، ب چ ئاوایی بوویەر نەدیت. چیرۆکا 13 کوردێن شەھید بووی، ب قاسی نووچەیێن ترکیایێ ژ بۆی ANFێ گرینگ نەبوو.

رۆژنامەیا ئۆزگور پۆلتیکا و ئۆرگانێن چاپەمەنیێ یێن پەکەکێ کو ل ئەورۆپایێ وەشانێ دکەن، خواستن بوویەرێ بەرفرەھ بکەن.

رۆژنامەیا ئۆزگور پۆلتیکا بوویەرا ل گوندێ خدرجە روودای ب سیناریۆیەکا ل سەر ماسەیێ نڤیسی بەرچاڤکر. خەباتکارێن مەدیایا ئاژاوەچی یا ئۆزگور پۆلتیکا ھەول دان پێشمەرگەیان ب “ترسوونەک و رەڤییایی” تاوانبار بکەن. ل گۆری نووچەیا ئۆزگۆر پۆلتیکا نڤیساندی؛ داعشێ ئێرشی پێشمەرگە کر، پێشمەرگە رەڤیان و خەلکێ ژی ژ بۆ پاراستنا پێشمەرگە شەر کر و ل گۆر پەکەکێ ئەو “مرن”. لەوما داعش نە تاوانبار بوو. تاوانبار پێشمەرگە بوون.

لێ بەلێ گۆتنێن دایکا ل گوندێ خدرجەیێ کو بوویەر لێ قەومی و 3 زارۆکێن خوە تێدا ژ دەست دایی ژی تێرا ڤەگۆتنا بوویەرێ کرن. داییکا وان سێ شەھیدان “شێرە ژن” بەیان عۆسمان د داخویانیەکێ دا راگھاند کو ئێریشا یەکەم ل سەر مالا وان بوویە و پێشمەرگە ژ بۆ پاراستنا وان هاتن. ھەروەھا بەری ھەر تشتەکێ 3 پێشمەرگە شەھید بوون. 7 پێشمەرگەیێن دی ژی دەما کو دخواستن موداخەلەیێ بوویەرێ بکەن و هاریکارییا خەلکێ گوندی و پێشمەرگەیێن د گوندی دا بکەن، د رێکێ دا بۆمبەیا داعشێ ل سەر رێیا وان چاندی ب ترۆمبێلا وان ڤە تەقییا و شەهید بوون.

“پێشمەرگە نەشیا شەری بکەت، رەڤیان”. پەکەکێ ب وەرگەراندنا ڤێ نووچەیێ د بەشێن مەدیایا خوەیێن ب زمانێ ئینگیلیزی دا خواست پێشمەرگەیان شەرمەزار بکەت.

ئۆزگور پۆلتیکا ل سەر شۆپا جەمیل بایکە

گۆتنێن پەکەکێ کو تێدا دبێژیت، پێشمەرگە نەشییا شەری بکەت، ئەم ب تەنێ ئەو رێخستنا کوردین کو دزانین شەری بکەین نە گۆتنێن نوونە. دەما کو نێزیکی 100 پێشمەرگەیان شەھید بووین و د وێ ھەیامێ دا کو داعشێ دخواست ئێرشی ھەرێما کوردستانێ بکەت، پەکەکە ل سەر ھەلوەستا خوەیا ل دژی پێشمەرگە بەردەوام بوو.

جەمیل بایک رۆژا 22/8/2014ێ د ھەڤپەیڤینەکێ دا لگەل رۆژنامەیا ئەلمانی فرانکفورتەر ئاڵگەمەن گۆت: “پێشمەرگە رێ دا کو ب ھەزاران ئێزدی بمرن تەنێ ژ بۆ کو دەولەتێن رۆژئاڤا چەکان بدەنە وان. پێشمەرگە نکاریت شەری بکەت، چەکێن کو دێ گەهنە دەستێن پێشمەرگە دێ کەڤنە دەستێ داعشێ دا.” ژ وی دەمی و هێرڤە پەکەکە ژ بۆ کو ڤێ تێگەهێ بئافرینیت د چاپەمەنیێ دا بەردەوام ل دژی پێشمەرگە نووچەیان چێدکەت و دەرەوان بەلاڤ دکەت.

کۆمکرنا قازانجێ ژ خوینا شەهیدان خیانەتە

پەکەکە هەول ددەت ل سەر مرنان مفایەکێ سیاسی ب دەست خوە بێخیت. ھەگەر ل جھەکێ کوردستانێ زارۆکێن کورد بمرن و پارتیەک ڤان جوانان وەک دژمنێ خوە ببینیت و ب گۆتنا “ئەز مەراق دکەم ژ ڤێ مرنێ دێ چ هێت سەرێ من” و ھەول بدەت قازانجێ ب دەست بێخیت، ئەڤە خیانەتە. د دەربارێ مرنا گەنجێن کورد دا ب راستی نرخاندنێن ب نیەتا باش و هندەک جاران ژی یێن کو رەخنە دکەن هەنە. لێ سڤکاتیکرن ژ ھەبوون، تێکۆشین و ھەولێن پێشمەرگەیێن کو خوەدی مالبات و زارۆکێن خوەنە، خیانەت و بێرێزییە ل ھەمبەر وان پێشمەرگەیان. خیانەتە ل ملەتێ کورد، دەما کو جەنازە هێژان ل ئەردێ نە و خوینا کو ل سەر ئەردت هاتیە رژاندن هێژان هشک نەبووی، ھەول بهێتە دایین کو سڤکاتیێ ب پێشمەرگە بکەن و ژ خوینا رژیایی مفا وەربگرن، ئەڤە خیانەتە. پەکەکە ڤێ خیانەتێ ب رێکا مەدیایا خوە ئۆرگانیزە دکەت.